ഇന്ത്യന്‍ വ്യോമപരിധിയെ കാത്തു സൂക്ഷിക്കാന്‍ ഉതകുംവിധം കരയില്‍ നിന്നും ആകാശത്തേക്ക് തൊടുക്കാവുന്ന റഷ്യന്‍ നിര്‍മിത എസ് 400 ട്രയംഫ് വ്യോമപ്രതിരോധ മിസൈലുകള്‍ വാങ്ങുന്നതിനുള്ള കരാറില്‍ ഇന്ത്യന്‍ ഉടന്‍ ഒപ്പിടും. വാര്‍ഷിക ഇന്ത്യന്‍ -റഷ്യന്‍ സമ്മേളനത്തിന് ഒക്‌ടോബര്‍ 4-ന് ഡല്‍ഹിയിലെത്തുന്ന റഷ്യന്‍ പ്രസിഡന്റ് വ്‌ലാദ്മിര്‍ പുടിനുമായിട്ടായിരിക്കും കരാര്‍ ഒപ്പിടുന്നത്. പുടിന്റെ സന്ദര്‍ശനത്തിന്റെ പ്രധാന ഉദ്ദേശങ്ങളിലൊന്ന് മിസൈല്‍ കരാര്‍ ഒപ്പിടുകയെന്നതാണെന്ന് അദ്ദേഹത്തിന്റെ വിദേശകാര്യ സെക്രട്ടറി യൂറി യുഷാകോവ് വ്യക്തമാക്കി. 5 ബില്യന്‍ അമേരിക്കന്‍ ഡോളര്‍ (ഏതാണ്ട് 36,000 കോടിരൂപ) മതിപ്പ് വരുന്നതാണ് കരാറെന്നും അദ്ദേഹം വ്യക്തമാക്കി. ഇതിന് പുറമെ നാല് യുദ്ധക്കപ്പലുകള്‍ കൂടി റഷ്യ ഇന്ത്യയ്ക്ക് കൈമാറും.

അതേസമയം, റഷ്യയില്‍ നിന്ന് എസ് 400 മിസൈല്‍ സംവിധാനം വാങ്ങാന്‍ ഇന്ത്യ ഒരുങ്ങുന്നത് അമേരിക്കയുടെ ശക്തമായ എതിര്‍പ്പ് മറികടന്നാണ്. റഷ്യയില്‍ നിന്ന് മിസൈല്‍ സംവിധാനം വാങ്ങുന്നതിന് തങ്ങളുടെ അനുമതി വേണമെന്നാണ് അമേരിക്കന്‍ നിലപാട്. എന്നാല്‍ ഇന്ത്യ ഒരു പരമാധികാര രാജ്യമാണെന്നും വിദേശശക്തികളുടെ സമ്മര്‍ദ്ദത്തിന് വഴങ്ങില്ലെന്നും കേന്ദ്രസര്‍ക്കാരും വിദേശകാര്യമന്ത്രി സുഷമാ സ്വരാജും വ്യക്തമാക്കിയിട്ടുണ്ട്. കഴിഞ്ഞ ദിവസം പാകിസ്ഥാന്‍ ഹെലിക്കോപ്ടര്‍ അതിര്‍ത്തി ലംഘിച്ചതിന്റെ പശ്ചാത്തലത്തില്‍ മിസൈല്‍ സംവിധാനം എത്രയും പെട്ടെന്ന് സ്വന്തമാക്കാനുള്ള നീക്കത്തിലാണ് കേന്ദ്രസര്‍ക്കാരും ആഭ്യന്തരമന്ത്രാലയവും.

റഷ്യ വികസിപ്പിച്ച കരയില്‍ നിന്നും തൊടുക്കാവുന്ന വ്യോമപ്രതിരോധ സംവിധാനമാണിത്. 2007 മുതല്‍ റഷ്യന്‍ സൈന്യം ഉപയോഗിക്കുന്ന മിസൈല്‍, 400 കിലോമീറ്റര്‍ പരിധിയിലെ മൂന്ന് ഡസനോളം ലക്ഷ്യസ്ഥാനങ്ങളിലേക്ക് തൊടുക്കാനാവും. സാധാരണ റഡാറുകള്‍ക്ക് കണ്ടുപിടിക്കാന്‍ സാധിക്കാത്ത രഹസ്യവിമാനങ്ങളെപ്പോലും കണ്ടെത്തി വെടിവച്ചിടാന്‍ ഇവയ്ക്ക് കഴിവുണ്ട്.

അമേരിക്കന്‍ വ്യോമപ്രതിരോധ സംവിധാനങ്ങളെപ്പോലും കവച്ച് വയ്ക്കുന്ന എസ് 400 ട്രയംഫ് മിസൈലുകള്‍ ലോകത്തിലെ മികച്ച വ്യോമപ്രതിരോധ സംവിധാനമെന്ന പേരിലാണ് അറിയപ്പെടുന്നത്‌.