മോശം കൈയ്യക്ഷരത്തിന്റെ പേരില് മൂന്ന് ഡോക്ടര്മാര്ക്ക് ശിക്ഷ, കോടതിയില് സമര്പ്പിച്ച രേഖകള് വായിക്കാന് കഴിയാതിരുന്നത് ന്യായാധിപന്മാരെ ചൊടിപ്പിച്ചു
ഭൂരിപക്ഷം ഡോക്ടര്മാരുടെ കുറിപ്പടികളും മെഡിക്കല് ഷോപ്പുകളിലെ 'വിദഗ്ധര്'ക്കല്ലാതെ വായിക്കാന് കഴിയാറില്ല. എന്നാല്, ഇതിനൊരു മാറ്റത്തിനായി കോടതിതന്നെ മുന്നിട്ടിറങ്ങിയിരിക്കുന്നു. അലഹാബാദ് ഹൈകോടതിയാണ് വിവിധ കേസുകളിലായി മോശം കൈയക്ഷരത്തിന്റെ പേരില് മൂന്ന് ഡോക്ടര്മാരെ ശിക്ഷിച്ചിരിക്കുന്നത്. കോടതിയില് സമര്പ്പിച്ച രേഖകള് വായിക്കാന് കഴിയാതിരുന്നതാണ് ന്യായാധിപന്മാരെ ചൊടിപ്പിച്ചത്. ഉത്തര്പ്രദേശിലെ ഉന്നാവിലെ ഡോ. ടി.പി. ജെസ്വാള്, സീതാപുരിലെ ഡോ. പി.കെ. ഗോയല്, ഗോണ്ടയിലെ ഡോ. ആഷിഷ് സക്സേന എന്നിവരെയാണ് കോടതി വിളിച്ചുവരുത്തി 5000 രൂപ വീതം പിഴയടപ്പിച്ചത്.
ജസ്റ്റിസുമാരായ അജയ് ലാംബ, സഞ്ചയ് ഹര്കുലി എന്നിവരാണ് ശിക്ഷവിധിച്ചത്. പിഴതുക കോടതിയുടെ ലൈബ്രറി ആവശ്യങ്ങള്ക്ക് വിനിയോഗിക്കണമെന്നും ഉത്തരവിലുണ്ട്. ക്രിമിനല് കേസുകളുമായി ബന്ധപ്പെട്ട് കോടതിക്കു മുമ്പാകെ വന്ന ഹരജിക്കാരുടെ ദേഹത്തെ പരിക്കുകള് വിവരിക്കുന്ന 'ഇഞ്ച്വറി റിപ്പോര്ട്ട്' വായിക്കാന് കഴിയാതെ ന്യായാധിപന്മാര് വലഞ്ഞതോടെയാണ് റിപ്പോര്ട്ടുകള് എഴുതിയ ഡോക്ടര്മാരെ ശിക്ഷിച്ചത്.ഇതിനെല്ലാം പുറമെ ഭാവിയില് ഇത്തരം മെഡിക്കല് റിപ്പോര്ട്ടുകള് കമ്പ്യൂട്ടറില് ലളിതമായ ഭാഷയില് തയ്യാറാക്കണമെന്നും ഇതിനായി ഡോക്ടര്മാര്ക്ക് നിര്ദേശം നല്കണമെന്നും കോടതി ആഭ്യന്തരവകുപ്പ്, ആരോഗ്യവകുപ്പ് എന്നിവിടങ്ങളിലെ പ്രിന്സിപ്പല് സെക്രട്ടറിമാരോടും ആരോഗ്യവകുപ്പ് ഡയറക്ടറോടും ഉത്തരവിട്ടു.
മരുന്നിലെ കുറിപ്പടികളും മെഡിക്കല് റിപ്പോര്ട്ടുകളും വായിക്കാന് കഴിയുന്ന രീതിയില് വ്യക്തതയോടെ തയാറാക്കണമെന്ന 2012ല് പാസാക്കിയ നിയമവും കോടതി ഉത്തരവില് ചൂണ്ടിക്കാണിച്ചിട്ടുണ്ട്.
https://www.facebook.com/Malayalivartha
