ബന്ധുവായ സ്ത്രീയുമായുള്ള സ്വത്തു തർക്കത്തിന്റെ പേരിൽ യുവാവിനെ പച്ചയ്ക്ക് കത്തിക്കാൻ നാട്ടുകൂട്ടത്തിന്റെ ഉത്തരവ്. ഗുരുതരമായി പരിക്കേറ്റ യുവാവിനെ ആശുപത്രിയിൽ പ്രവേശിപ്പിച്ചു. പശ്ചിമബംഗാളിലെ മാൽഡ ജില്ലയിലാണ് സംഭവം. യുവാവും ബന്ധുവായ സ്ത്രീയും തമ്മിൽ സ്വത്തു തർക്കമുണ്ടായിരുന്നു. നാട്ടുക്കൂട്ടത്തിനെ സമീപിച്ച സ്ത്രീതന്റെ ഭാഗം ന്യായീകരിച്ചതോടെയാണ് യുവാവിനെ കത്തിക്കാൻ നാട്ടുക്കൂട്ടം ആവശ്യപ്പെട്ടത്.

മൊണ്ടാൽ ഹൻസ്ദ എന്നയുവാവാവിനാണ് ഗുരുതരമായി പൊള്ളലേറ്റത്. നാട്ടുകൂട്ടത്തിന്റെ ഉത്തരവ് പ്രകാരം കഴിഞ്ഞ ദിവസം രാത്രി ഇയാളുടെ വീട്ടിലെത്തിയ ഒരു സംഘമാണ് ഇയാളുടെ മേൽ തീകൊളുത്തിയത്. കാര്യങ്ങൾ ചോദിച്ചറിഞ്ഞ സംഘാംഗങ്ങൾ നാട്ടുക്കൂട്ടത്തിന്റെ വിധിനടപ്പാക്കുകയാണെന്ന് പറഞ്ഞശേഷം വീടിനു പുറത്തു കൊണ്ടുപോയി കൈകാലുകൾ ബന്ധിപ്പിച്ച ശേഷംമണ്ണെണ്ണയൊഴിച്ച് തീ കൊളുത്തുകയായിരുന്നു.

സംഭവത്തെ കുറിച്ച് പൊലീസ് അന്വേഷണം ആരംഭിച്ചു. സംഘത്തിലുണ്ടായിരുന്ന ചിലർ പിടിയിലായിട്ടുണ്ട്. നാട്ടുക്കൂട്ടത്തിലെ പ്രധാനിക്കു വേണ്ടിയും സ്ത്രീക്കു വേണ്ടിയും തെരച്ചിലാരംഭിച്ചു.