വടക്കന് കശ്മീരിലെ ഹന്ദ്വാരയില് സുരക്ഷസേനയുമായുള്ള ഏറ്റുമുട്ടല്... മന്നാന് ബഷീര് വാനിയെ വധിച്ചു, കാശ്മീരില് ഇന്ന് ബന്ദ്
ഹിസ്ബുല് മുജാഹിദീന് തീവ്രവാദികള് എന്നു കരുതുന്ന രണ്ടുപേര് വടക്കന് കശ്മീരിലെ ഹന്ദ്വാരയില് സുരക്ഷസേനയുമായുള്ള ഏറ്റുമുട്ടലില് കൊല്ലപ്പെട്ടു. മന്നാന് ബഷീര് വാനിയെന്ന മുന് പിഎച്ച്.ഡി വിദ്യാര്ഥിയും സഹായിയുമാണ് കൊല്ലപ്പെട്ടതെന്ന് ഉദ്യോഗസ്ഥര് അറിയിച്ചു.
ഏറ്റുമുട്ടല് കൊലയില് പ്രതിഷേധിച്ചും മന്നാന് അനുശോചനം അര്പ്പിക്കുന്നതിനുമായി കശ്മീര് താഴ്വരയില് വിഘടനവാദി നേതാക്കള് വെള്ളിയാഴ്ച ബന്ദിന് ആഹ്വാനം ചെയ്തു. മുന് മുഖ്യമന്ത്രി മഹ്ബൂബ മുഫ്തി മന്നാനിയുടെ കൊലയില് ഖേദം രേഖപ്പെടുത്തി. ലാന്ഗേറ്റ് മേഖലയില്നിന്നുള്ള ആഷിഖ് ഹുസൈനാണ് കൊല്ലപ്പെട്ട മറ്റൊരാള്. മന്നാനും സഹായിയും മേഖലയിലെത്തിയ വിവരത്തിന്റെ അടിസ്ഥാനത്തില് നടത്തിയ തിരച്ചിലിനിടെയാണ് ഏറ്റുമുട്ടലുണ്ടായതെന്ന് സേനാവൃത്തങ്ങള് അറിയിച്ചു. കീഴടങ്ങാന് ആവശ്യപ്പെട്ടെങ്കിലും നിരസിച്ചതായി പൊലീസ് പറയുന്നു.
അലീഗഢ് സര്വകലാശാലയില് പിഎച്ച്.ഡി ചെയ്തിരുന്ന 27കാരനായ മന്നാന് പഠനം നിര്ത്തി ഈ വര്ഷം ജനുവരിയിലാണ് തീവ്രവാദ സംഘടനയില് ചേര്ന്നതെന്ന് ഉദ്യോഗസ്ഥര് പറഞ്ഞു. പഠനം ഉപേക്ഷിക്കാനും ഹിസ്ബുല് മുജാഹിദീനില് അംഗമാവാനും തീരുമാനമെടുത്തതിനു പിന്നിലെ കാരണങ്ങള് സംബന്ധിച്ച് അടുത്തിടെ അദ്ദേഹം എഴുതിയ ലേഖനങ്ങള് സമൂഹമാധ്യമങ്ങളില് വലിയ പ്രചാരം നേടിയിരുന്നു.
വാനിയുടെ മൃതദേഹം ബന്ധുക്കള്ക്ക് കൈമാറി. ആയിരക്കണക്കിന് പേര് സംസ്കാരച്ചടങ്ങില് പങ്കെടുത്തതായാണ് റിപ്പോര്ട്ട്. വാനിയുടെ മരണവാര്ത്ത അറിഞ്ഞയുടന് ചിലയിടങ്ങളില് ജനങ്ങള് പ്രതിഷേധവുമായി ഇറങ്ങി സുരക്ഷസേനക്കുനേരെ കല്ലേറു നടത്തി. മുന്കരുതലിന്റെ ഭാഗമായി സ്കൂളുകളും മറ്റു വിദ്യാഭ്യാസ സ്ഥാപനങ്ങളും അടച്ചു. ഇന്റര്നെറ്റ് സേവനം തടസ്സപ്പെട്ടു. കൊല്ലപ്പെട്ടവരോടുള്ള ആദരസൂചകമായി വിഘടനവാദ നേതാക്കള് വെള്ളിയാഴ്ച ഹര്ത്താലിന് ആഹ്വാനം ചെയ്തിട്ടുണ്ട്.
മറ്റൊരു സംഭവത്തില് ദക്ഷിണ ഷോപിയാനില് അജ്ഞാതരായ തോക്കുധാരികള് വിഘടനവാദിയായ മുസ്ലിം ലീഗ് നേതാവിനെ വെടിവെച്ചുകൊന്നു. മൗലവി താരിഖ് അഹ്മദ് ഗനാഇ എന്നയാളാണ് കൊല്ലപ്പെട്ടത്. ഇയാള് മുമ്പ് തീവ്രവാദിയായിരുന്നുവെന്ന് പൊലീസ് പറഞ്ഞു
https://www.facebook.com/Malayalivartha
