മൈസൂരു-കുട്ട സംസ്ഥാനപാതയിലെ മൈസൂരു നാഗര്‍ഹോളെ വന്യജീവിസങ്കേതത്തില്‍ സ്വകാര്യബസിടിച്ച് കാട്ടാന ചരിഞ്ഞു. റൗഡി രംഗ എന്ന പേരിലറിയപ്പെടുന്ന 48 വയസ്സുള്ള കൊമ്പനാണു ചരിഞ്ഞത്. തിങ്കളാഴ്ച പുലര്‍ച്ചെ മൂന്നിന് ഗോണിക്കൊപ്പയ്ക്കു സമീപം മത്തിഗോഡില്‍ ആണ് സംഭവം.

കണ്ണൂരില്‍നിന്നു ബെംഗളൂരുവിലേക്കു വരുകയായിരുന്ന കല്‍പക ട്രാവല്‍സിന്റെ ബസാണ് ഇടിച്ചത്. ബസിന്റെ മുന്‍വശം തകര്‍ന്നെങ്കിലും യാത്രക്കാര്‍ പരുക്കേല്‍ക്കാതെ രക്ഷപ്പെട്ടു. തലയ്ക്കു ഗുരുതര പരുക്കേറ്റു മറിഞ്ഞുവീണ ആനയ്ക്കു വനംവകുപ്പു വെറ്ററിനറി ഡോക്ടറെത്തി പ്രഥമശുശ്രൂഷ നല്‍കിയെങ്കിലും ജീവന്‍ രക്ഷിക്കാനായില്ല.

മത്തിഗോഡ് ആനവളര്‍ത്തല്‍ ക്യാംപിലുണ്ടായിരുന്ന ആനയെ പതിവു സവാരിക്കായി ഞായറാഴ്ച വനത്തിലേക്കു തുറന്നുവിട്ടിരുന്നു. തിരികെ ക്യാമ്പിലേക്ക് മടങ്ങും വഴിയാണ് അപകടമുണ്ടായത്. പണ്ട് 2 പേരെ ചവിട്ടിക്കൊന്ന ആനയ്ക്കു ഗ്രാമീണരാണു റൗഡി രംഗ എന്ന പേരു നല്‍കിയത്. എന്നാല്‍ 2017-ല്‍ പിടികൂടി ക്യാമ്പിലെത്തിച്ച് ചട്ടങ്ങള്‍ പരിശീലിച്ച ശേഷം രംഗ ശാന്തനായിരുന്നു.

ബസ് ഡ്രൈവര്‍ക്കെതിരെ കേസെടുത്തതായി കര്‍ണാടക വനംവകുപ്പു പ്രിന്‍സിപ്പല്‍ ചീഫ് കണ്‍സര്‍വേറ്റര്‍ പുനതി ശ്രീധര്‍ പറഞ്ഞു. ബന്ദിപ്പൂര്‍ വന്യജീവിസങ്കേതത്തില്‍ രാത്രി യാത്രാ നിരോധനം നിലവിലുള്ളതിനാല്‍ മലബാര്‍ മേഖലയിലേക്കുള്ള ബസുകളടക്കം ഗോണിക്കൊപ്പ, കുട്ട വഴിയാണു സര്‍വീസ് നടത്തുന്നത്. നാഗര്‍ഹോളെ വനത്തിലും രാത്രികാല നിരോധനം ആവശ്യപ്പെട്ടു പരിസ്ഥിതി സംഘടനകള്‍ രംഗത്തെത്തിയിട്ടുണ്ട്.