സാമൂഹ്യമാധ്യമങ്ങളെ ദേശവിരുദ്ധ ശക്തികള് കൂടുതലായി ഉപയോഗപ്പെടുത്തുന്നു... ചെന്നായെപ്പോലെ കൗശലക്കാരായ ഭീകരരുടെ ഒറ്റയ്ക്കുള്ള അക്രമങ്ങളാണ് ഇപ്പോള് നേരിടുന്ന വലിയ വെല്ലുവിളിയെന്ന് കേന്ദ്ര ആഭ്യന്തരമന്ത്രി
ചെന്നായെപ്പോലെ കൗശലക്കാരായ ഭീകരരുടെ ഒറ്റയ്ക്കുള്ള അക്രമങ്ങളാണു (ലോണ് വുള്ഫ് അറ്റാക്കേഴ്സ്) രാജ്യം ഇപ്പോള് നേരിടുന്ന വലിയ വെല്ലുവിളിയെന്ന് കേന്ദ്ര ആഭ്യന്തരമന്ത്രി രാജ്നാഥ് സിംഗ്. ഒറ്റയ്ക്കു കാര്യം നടപ്പാക്കുന്ന ഭീകരരോടൊപ്പം സാമൂഹ്യമാധ്യമങ്ങളെ ദേശവിരുദ്ധ ശക്തികള് കൂടുതലായി ഉപയോഗപ്പെടുത്തുന്നതും വലിയ ഭീഷണിയാണെന്ന് അദ്ദേഹത്തിന്റെ മുന്നറിയിപ്പ. ന്യൂയോര്ക്കിലും ലണ്ടനിലും അടുത്തിടെ ജനക്കൂട്ടത്തിലേക്കു വാഹനം ഇടിച്ചുകയറ്റിയതു പോലുള്ള ഭീകരാക്രമണങ്ങളെ പരാമര്ശിച്ചു കൊണ്ടാണ് ഇന്ത്യയിലും ഭീകരര് ഒറ്റയ്ക്ക് അക്രമണം നടത്താനുള്ള സാധ്യതകളെക്കുറിച്ച് ആഭ്യന്തരമന്ത്രി മുന്നറിയിപ്പു നല്കിയത്.
ഇന്ത്യയെ അക്രമിക്കാന് ഭീകരര് പുതിയ തന്ത്രങ്ങള് മെനയുകയാണെന്ന് മന്ത്രി പറഞ്ഞു. ദേശീയ സുരക്ഷാ സേനയായ നാഷണല് സെക്യൂരിറ്റി ഗാര്ഡ്സിന്റെ (എന്എസ്ജി) 34ാമത് രൂപീകരണ ദിവസത്തോടനുബന്ധിച്ച് ഗുരുഗ്രാമിലെ മനേസറില് ഇന്നലെ നടന്ന ചടങ്ങിലാണ് രാജ്നാഥ് സിംഗ് ഇക്കാര്യങ്ങള് വിശദീകരിച്ചത്.
വാഹനങ്ങളിലും മറ്റും ഒറ്റയ്ക്കെത്തി ഭീകരാക്രമണം നടത്താനുള്ള സാധ്യതകള് രാജ്യത്തിനും സുരക്ഷാ ഏജന്സികള്ക്കും വലിയ വെല്ലുവിളിയാണ് ഉയര്ത്തുന്നത്. അതിനാല് ഇത്തരം ഭീഷണികളെ നേരിടുന്നതിനു നമ്മുടെ തന്ത്രങ്ങള് പതിവായി പുതുക്കുകയും മാറ്റുകയും ചെയ്യണം. ഭീകരത ഇന്ത്യയുടെ മാത്രമല്ല, ലോകത്തെയാകെ ബാധിക്കുന്ന പ്രശ്നമാണ്. തീവ്രവാദികളുടെ ആശയസംഹിതകള് പ്രചരിപ്പിക്കുന്നതില് സാമൂഹ്യമാധ്യമങ്ങള് കാര്യമായി സഹായിക്കുന്നുണ്ടെന്നും അദ്ദേഹം ചൂണ്ടിക്കാട്ടി.
https://www.facebook.com/Malayalivartha
