കോണ്‍ഗ്രസ് ദേശീയ അദ്ധ്യക്ഷന്‍ രാഹുല്‍ ഗാന്ധി സ്ഥിരമായി മത്സരിക്കുന്ന ഉത്തര്‍പ്രദേശിലെ അമേത്തി മണ്ഡലത്തില്‍ മത്സരിച്ചാല്‍ ജയ സാധ്യത കുറവെന്ന് കോണ്‍ഗ്രസ് നേതാക്കള്‍. നേതാക്കളുടെ ഈ നിര്‍ദ്ദേശത്തെ തുടര്‍ന്നാണ് അദ്ദേഹം കളം മാറ്റിച്ചവിട്ടുന്നു എന്ന് ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നു.

അമേത്തിയില്‍ രാഹുല്‍ ഗാന്ധിയുടെ പിന്തുണ കുറഞ്ഞുവരുന്നതിനെ തുടര്‍ന്നാണ് അമേതിയോടൊപ്പം മറ്റു രണ്ടു മണ്ഡലങ്ങളില്‍ കൂടി മത്സരിക്കാനുള്ള തീരുമാനമെന്നാണ് റിപ്പോര്‍ട്ടുകള്‍. അമേതിയില്‍ രാഹുലിനെതിരെ മത്സരിക്കുന്നത് കേന്ദ്രമന്ത്രി സമൃതി ഇറാനിയായിരിക്കും. സ്മൃതിക്ക് ജനപിന്തുണ വര്‍ദ്ധിച്ചെന്നും റിപ്പോര്‍ട്ടുണ്ട്. മുഴുവന്‍ സമയ പ്രവര്‍ത്തനങ്ങളുമായി സ്മൃതി അമേത്തിയില്‍ നിറഞ്ഞു നില്‍ക്കുകയാണ്.

സമൃതിക്കുള്ള പിന്തുണ മാറ്രിനിര്‍ത്തി രാഹുല്‍ മത്സരിച്ചാല്‍ തന്നെ ഭൂരിപക്ഷം നന്നേ കുറഞ്ഞേക്കും. ഇത് പ്രധാനമന്ത്രി സ്ഥാനാര്‍ത്ഥിയെന്ന കോണ്‍ഗ്രസിന്റെ കണക്കൂട്ടല്‍ തെറ്റിച്ചേക്കും. മൂന്ന് മണ്ഡലങ്ങളില്‍ മത്സരിക്കാനാണ് രാഹുലിന്റെ തീരുമാനം. ഇതില്‍ മഹാരാഷ്ട്രയിലെ നന്ദേഡ മണ്ഡലവും മദ്ധ്യപ്രദേശ് മുഖ്യമന്ത്രി കമല്‍നാഥിന്റെ മണ്ഡലമായ ചിന്ദ്വാരയിലും മത്സരിക്കാനാണ് കോണ്‍ഗ്രസ് നീക്കം. കോണ്‍ഗ്രസിന്റെ കോട്ടകളില്‍ ഒന്നായ അമേത്തിയില്‍ 2004 മുതല്‍ രാഹുല്‍ ഗാന്ധി മത്സരിക്കുന്നതാണ്. രാഹുലിനെ കൂടാതെ സഞ്ജയ് ഗാന്ധിയും രാജീവ് ഗാന്ധിയും ഇവിടെ നിന്ന് വമ്പന്‍ ഭൂരിപക്ഷത്തില്‍ വിജയിച്ചവരാണ്. ഒരിക്കല്‍ സോണിയാ ഗാന്ധിയും ഈ മണ്ഡലത്തില്‍ നിന്ന് വിജയിച്ചിരുന്നു.

2014 ല്‍ അമേത്തിയില്‍ രാഹുല്‍ ഗാന്ധിക്കെതിരെ സ്മൃതി ഇറാനിയായിരുന്നു മത്സരിച്ചത്. കോണ്‍ഗ്രസിന്റെ തട്ടകമായിരുന്ന അമേത്തിയില്‍ കോണ്‍ഗ്രസിന് പരാജയം മണത്ത വര്‍ഷമായിരുന്നു അത്. തന്റെ മണ്ഡലം ഒരിക്കലും സന്ദര്‍ശിക്കാതിരുന്ന രാഹുല്‍ ഗാന്ധി തിരഞ്ഞെടുപ്പ് വേളയില്‍ മാത്രമാണെന്നതായിരുന്നു എതിരാളികളുടെ ആരോപണം.

ലോക്‌സഭ തെരഞ്ഞെടുപ്പില്‍ ബിജെപിയുടെ ഈ മുന്നേറ്റം തങ്ങളെ പ്രതിസന്ധിയിലാക്കുമെന്ന് കോണ്‍ഗ്രസിന് ഭയമുണ്ട്. അതുകൊണ്ട് തന്നെ സീറ്റ് നിലനിര്‍ത്താനായി കോണ്‍ഗ്രസ് പുതിയ പദ്ധതിയുമായാണ് ഇറങ്ങിയിരിക്കുന്നത്

രാഹുല്‍ ഗാന്ധിയെ മഹാരാഷ്ട്രയിലും മദ്ധ്യപ്രദേശിലും മത്സരിപ്പിക്കുന്നതിലൂടെ മറ്റ് ലക്ഷ്യങ്ങളും കോണ്‍ഗ്രസ് നേതൃത്വത്തിനുണ്ട്. 2014ല്‍ ഉത്തര്‍പ്രദേശില്‍ മോദി മത്സരിച്ചത് സംസ്ഥാനത്തെ തിരഞ്ഞെടുപ്പില്‍ ഒരു തരംഗം സൃഷ്ടിച്ചിരുന്നു. ഈ തരംഗം മദ്ധ്യപ്രദേശിലും മഹാരാഷ്ട്രയിലും സൃഷ്ടിക്കാനാണ് കോണ്‍ഗ്രസ് നീക്കം. ഭാവി പ്രധാനമന്ത്രി സ്വന്തം സംസ്ഥാനത്ത് നിന്നാണ് മത്സരിക്കുന്നതെന്ന് പറയുമ്പോള്‍ ജനങ്ങളില്‍ വലിയൊരു ഓളം ഉണ്ടാക്കാനാവും. ഇതായിരുന്നു മോദി കൊണ്ടുവന്ന തരംഗം. 2014ലെ പോലെ മുമ്പൊന്നും ബി.ജെ.പിക്ക് ഇത്ര സീറ്റ് ഉത്തര്‍പ്രദേശില്‍ ലഭിച്ചിരുന്നില്ല.