ഹൃദയത്തില്‍ ഘടിപ്പിക്കുന്ന പേസ്‌മേക്കറും കൃത്രിമ ഇടുപ്പെല്ലും ഉള്‍പ്പെടെ 400ലേറെ മെഡിക്കല്‍ ഉപകരണങ്ങള്‍ക്ക് വില കുറയ്ക്കുമെന്ന് ആരോഗ്യമന്ത്രാലയം. രക്തസമ്മര്‍ദമളക്കുന്ന ഉപകരണം, സി.ടി.എം.ആര്‍.ഐ. സ്‌കാനിങ് മെഷിനുകള്‍, കൃത്രിമ അസ്ഥിഘടകങ്ങള്‍ തുടങ്ങി ഇതുവരെ വിലനിയന്ത്രണപട്ടികയില്‍ ഉള്‍പ്പെടാത്ത ഉപകരണങ്ങള്‍ക്കാണ് വില കുറയ്ക്കുക. 50 മുതല്‍ 80 വരെ ശതമാനം വില നിയന്ത്രണമേര്‍പ്പെടുത്താനാണ് ആലോചന. ഇറക്കുമതിചെയ്യുന്ന ഉപകരണങ്ങള്‍ക്കും ഈ നിയന്ത്രണം ബാധകമാകും. ഇവയുടെ ഗുണനിലവാരം കര്‍ശനമായി നിരീക്ഷിക്കും. ഇതിനായി ഡ്രഗ്‌സ് ആന്‍ഡ് കോസ്‌മെറ്റിക്‌സ് നിയമത്തില്‍ ഭേദഗതി വരുത്തും.
എന്നാല്‍ അവശ്യമരുന്നുകളെ നിര്‍ബന്ധമായും വിലനിയന്ത്രണപട്ടികയില്‍ ഉള്‍പ്പെടുത്തുന്ന രീതി കേന്ദ്രം അവസാനിപ്പിച്ചു. കഴിഞ്ഞദിവസം രൂപവത്കരിച്ച നീതി ആയോഗിനുകീഴിലുള്ള സമിതിക്കാണ് ഇനിമുതല്‍ വില കുറയ്ക്കുന്ന മരുന്നുകളെ നിശ്ചയിക്കുന്നതിനുള്ള അധികാരം. നീതി ആയോഗിന്റെ ആരോഗ്യവിഭാഗത്തിലെ അംഗം, ധനമന്ത്രാലയത്തിലെ മുഖ്യ സാമ്പത്തിക ഉപദേഷ്ടാവ്, ആരോഗ്യ സേവനവിഭാഗം ഡയറക്ടര്‍ ജനറല്‍, ബയോമെഡിക്കല്‍ രംഗത്തെ വിദഗ്ധന്‍ എന്നിവരടങ്ങിയ ഏഴംഗസമിതിക്കാണ് രൂപംനല്‍കിയത്.ഇതോടെ ദേശീയ ഔഷധവിലനിര്‍ണയ സമിതിയുടെ (എന്‍.പി.പി.എ.) അധികാരങ്ങള്‍ ഭാഗികമായി നഷ്ടപ്പെട്ടു.
നേരത്തേ ആരോഗ്യമന്ത്രാലയവും ഫാര്‍മസ്യൂട്ടിക്കല്‍ വകുപ്പും തയ്യാറാക്കുന്ന പട്ടികയില്‍നിന്ന് വില കുറയ്‌ക്കേണ്ട മരുന്നുകളെ തിരഞ്ഞെടുക്കുന്നത് എന്‍.പി.പി.എ. ആയിരുന്നു. ഇതേ അധികാരമുപയോഗിച്ചാണ് സ്‌റ്റെന്റുകള്‍ക്കും കാല്‍മുട്ട് മാറ്റിവെക്കല്‍ ശസ്ത്രക്രിയയ്ക്കുപയോഗിക്കുന്ന അസ്ഥിഘടകങ്ങള്‍ക്കും വില കുറച്ചത്. എന്നാല്‍, അവശ്യമരുന്നുകളുടെ പട്ടികയില്‍ നിലവിലുള്ള 750 മരുന്നുസംയുക്തങ്ങളുടെ വിലനിയന്ത്രണം അതേപടിയായിരിക്കും.