മാധ്യമപ്രവര്ത്തകനെ തല്ലിച്ചതച്ചു; ബിജെപി നേതാക്കളുടെ വാര്ത്താ സമ്മേളനങ്ങളിലെല്ലാം ഹെല്മെറ്റ് ധരിച്ച് മാധ്യമപ്രവർത്തകരുടെ പ്രതിഷേധം
പ്രാദേശികമാധ്യമപ്രവര്ത്തകനെ തല്ലിച്ചതച്ച ബിജെപി നേതാക്കള്ക്കെതിരെ പ്രതിഷേധവുമായി റായ്പൂര് പ്രസ് ക്ലബ്. ബിജെപി നേതാക്കളുടെ വാര്ത്താ സമ്മേളനങ്ങളിലെല്ലാം ഹെല്മെറ്റ് വച്ചാണ് മാധ്യമപ്രവര്ത്തകര് നിന്നത്. ചൊവ്വാഴ്ചയാണ് സുമന് പാണ്ഡേ എന്ന പ്രാദേശിക മാധ്യമപ്രവര്ത്തകനെ സംസ്ഥാന ബിജെപി അധ്യക്ഷന് രാജീവ് അഗര്വാളും മറ്റ് മൂന്ന് ബിജെപി നേതാക്കളും ചേര്ന്ന് തല്ലിച്ചതച്ചത്.
ഇതേത്തുടര്ന്ന് രാജീവ് അഗര്വാളടക്കം നാല് പേരെ പൊലീസ് അറസ്റ്റ് ചെയ്യുകയും ചെയ്തിരുന്നു. ഇതേത്തുടര്ന്നാണ് ബുധനാഴ്ച ബിജെപി നേതാക്കളുടെ വാര്ത്താസമ്മേളനങ്ങളിലെല്ലാം ഹെല്മറ്റ് വച്ച് നില്ക്കാന് മാധ്യമപ്രവര്ത്തകര് തീരുമാനിച്ചത്. ''ഞങ്ങളുടെ സുരക്ഷയില് വിട്ടുവീഴ്ച ചെയ്യാന് വയ്യ'' - റായ്പൂര് പ്രസ് ക്ലബ് പ്രസിഡന്റ് ദാമു അമെദരെ പറയുന്നു.
അഞ്ഞൂറോളം പ്രാദേശികലേഖകരെ സംഘടിപ്പിച്ച് ബിജെപി ഓഫീസിലേക്ക് റായ്പൂര് പ്രസ് ക്ലബ് ബൈക്ക് റാലിയും പ്രതിഷേധവും സംഘടിപ്പിച്ചു. മാധ്യമപ്രവര്ത്തകരെ ആക്രമിച്ച സംസ്ഥാന ബിജെപി അധ്യക്ഷനെ മാറ്റണമെന്നാവശ്യപ്പെട്ടായിരുന്നു പ്രതിഷേധം.മാധ്യമപ്രവര്ത്തകരുടെ സുരക്ഷയ്ക്കായി ഒരു പ്രത്യേകനിയമം പാസ്സാക്കണമെന്നും പ്രസ് ക്ലബ് ആവശ്യപ്പെടുന്നു.
https://www.facebook.com/Malayalivartha
