കോണ്ഗ്രസിന്റെ 55 വര്ഷത്തെ ഭരണവും ബി.ജെ.പി സര്ക്കാരിന്റെ 55 മാസത്തെ ഭരണവും തമ്മില് ജനങ്ങള് താരതമ്യം ചെയ്യണം; കോണ്ഗ്രസിനെയും രാഹുല് ഗാന്ധിയെയും കടന്നാക്രമിച്ച് പ്രധാനമന്ത്രി നരേന്ദ്ര മോദി
കോണ്ഗ്രസിനെയും രാഹുല് ഗാന്ധിയെയും കടന്നാക്രമിച്ച് പ്രധാനമന്ത്രി നരേന്ദ്ര മോദി രംഗത്ത്. തിരഞ്ഞെടുപ്പ് യന്ത്രങ്ങളില് കൃത്രിമം നടന്നെന്ന് ആരോപിച്ച് കോണ്ഗ്രസ് ലണ്ടനില് നടത്തി പത്ര സമ്മേളനം രാജ്യത്തെ അപമാനിക്കുന്നതിന് വേണ്ടിയായിരുന്നെന്ന് നരേന്ദ്ര മോദി പറഞ്ഞു. കോണ്ഗ്രസിന്റെ 55 വര്ഷത്തെ ഭരണവും ബി.ജെ.പി സര്ക്കാരിന്റെ 55 മാസത്തെ ഭരണവും തമ്മില് ജനങ്ങള് താരതമ്യം ചെയ്യണമെന്നും പ്രധാനമന്ത്രി പാര്ലമെന്റില് പറഞ്ഞു.
കോണ്ഗ്രസിനെ രൂക്ഷമായി വിമര്ശിച്ച മോദി ബി.ജെ.പി സര്ക്കാരിന്റെ ഭരണനേട്ടങ്ങള് എണ്ണിപ്പറഞ്ഞു. ബി.ജെ.പി കേന്ദ്രം ഭരിക്കാന് ആരംഭിച്ചതിന് ശേഷം രാജ്യം വിദേശ നിക്ഷേപങ്ങളില് ഒന്നാം സ്ഥാനത്തെത്തിയെന്നും ജനങ്ങളോടുള്ള പ്രതിബദ്ധത നിറവേറ്റാന് സര്ക്കാരിനായെന്നും മോദി പാര്ലമെന്റില് വ്യക്തമാക്കി. താനിതുവരെ പാര്ലമെന്റിന് അകത്തും പുറത്തും സത്യം മാത്രമേ പറഞ്ഞിട്ടുള്ളു. കോണ്ഗ്രസ് ഇത്രയും കാലം രാജ്യം ഭരിച്ചിട്ടും രാജ്യത്തെ പാവപ്പെട്ടവന് വൈദ്യുതി എത്തിച്ച് നല്കിയിട്ടില്ല. കേരളത്തിലെ കമ്മ്യൂണിസ്റ്റ് സര്ക്കാരിനെ കോണ്ഗ്രസാണ് അട്ടിമറിച്ചത്. രാജ്യത്തെ കള്ളന് കാവല്ക്കാരനെ കുറ്റപ്പെടുത്തുകയാണെന്നും മോദി പാര്ലമെന്റില് വ്യക്തമാക്കി
https://www.facebook.com/Malayalivartha