തൃണമൂല് കോണ്ഗ്രസ് എം.എല്.എ സത്യജിത് ബിശ്വാസ് വെടിയേറ്റ് മരിച്ച സംഭവത്തില് ബിജെപി നേതാവിനെതിരെ എഫ്.ഐ.ആര്
പശ്ചിമ ബംഗാളില് തൃണമൂല് കോണ്ഗ്രസ് എം.എല്.എ സത്യജിത് ബിശ്വാസ് വെടിയേറ്റ് മരിച്ച സംഭവത്തില് ബിജെപി നേതാവിനെതിരെ എഫ്.ഐ.ആര്.ബിജെപി നേതാവ് മുകുള് റോയിയ്ക്കെതിരെയാണ് പൊലീസ് എഫ്.ഐ.ആര് രജിസ്റ്റര് ചെയ്തിരിക്കുന്നത്.
പശ്ചിമ ബംഗാളിലെ ഫുല്ബാരിയില് സരസ്വതി പൂജ ആഘോഷത്തില് പങ്കെടുക്കുന്നതിനിടെയാണ് കൃഷ്ണഗഞ്ജ് മണ്ഡലത്തിലെ എം.എല്.എയായ സത്യജിത് ബിശ്വാസിന് വെടിയേറ്റത്. വേദിയില് നിന്ന് ഇറങ്ങുന്നതിനിടെയാണ് അക്രമി വെടിയുതിര്ത്തത്. വെടിവയ്പ്പില് ഗുരുതരമായി പരിക്കേറ്റ സത്യജിത് ബിശ്വാസിനെ ഉടന്തന്നെ ആശുപത്രിയിലെത്തിച്ചെങ്കിലും ജീവന് രക്ഷിക്കാനായില്ല.
ബിശ്വാസിന് വെടിയേല്ക്കുമ്ബോള് സംസ്ഥാന മന്ത്രി രത്ന ഘോഷും തൃണമൂല് കോണ്ഗ്രസ് ജില്ലാ അദ്ധ്യക്ഷന് ഗൗരിശങ്കര് ദത്തയും ഒപ്പമുണ്ടായിരുന്നു. ഇത് രാഷ്ട്രീയ കൊലപാതകമാണെന്നും ബിജെപിയാണ് പിന്നിലെന്നും ഗൗരി ശങ്കര് ദത്ത ആരോപിച്ചു. ബിജെപിയെപ്പോലെ രക്തദാഹിയായ ഒരു പാര്ട്ടിക്ക് മാത്രമേ ഇത് ചെയ്യാനാകൂ എന്ന് പശ്ചിമബംഗാള് വിദ്യാഭ്യാസ മന്ത്രി പാര്ത്ഥ ചാറ്റര്ജി പറഞ്ഞു.
എന്നാല് ആരോപണങ്ങള് നിഷേധിച്ച ബിജെപി സംസ്ഥാന അദ്ധ്യക്ഷന് ദിലീപ് ഘോഷ് കേസ് സിബിഐ അന്വേഷിക്കണമെന്നും ബംഗാള് പൊലീസില് വിശ്വാസമില്ലെന്നും വ്യക്തമാക്കി.
മന്മോഹന് സിംഗ് സര്ക്കാരിന്റെ കാലത്ത് കേന്ദ്ര റെയില്വെ മന്ത്രി ആയിരുന്ന മുകുള് റോയി, തൃണമൂല് കോണ്ഗ്രസിന്റെ പാര്ലമെന്റ് അംഗവുമായിരുന്നു. പിന്നീട് മമത ബാനര്ജിയുമായി തെറ്റിയാണ് മുകുള് റോയി ബിജെപിയില് ചേര്ന്നത്. കൊലപാതകവുമായി ബന്ധപ്പെട്ട് രണ്ട് പേരെ കൂടി അറസ്റ്റ് ചെയ്തിട്ടുണ്ട്.
കൊലപാതകത്തിന് പിന്നില് ബിജെപിയാണെന്ന് തൃണമൂല് കോണ്ഗ്രസ് ആരോപിച്ചിരുന്നു. തൃണമൂല് കോണ്ഗ്രസിന്റെ പ്രതികരണത്തിന് പിന്നാലെ മുകുള് റോയിയെ പ്രതിചേര്ത്തത് ബിജെപി പാളയത്തില് ഞെട്ടലുണ്ടാക്കിയിട്ടുണ്ട്. വിവാദമായ ശാരദ ചിട്ടിഫണ്ട് കേസിലും മുകുള് റോയി ഉള്പ്പെട്ടിരുന്നു.തൃണമൂല് കോണ്ഗ്രസ് വിട്ട് ബിജെപിയില് ചേര്ന്ന നേതാവാണ് മുകുള് റോയ്. തൃണമൂല് കോണ്ഗ്രസില് നിന്നും നിരവധി നേതാക്കളെ ബിജെപിയിലേക്ക് എത്തിച്ചതില് പ്രധാന പങ്കുവഹിച്ച നേതാവാണ് മുകുള് റോയ്.
ബംഗാള് സര്ക്കാരും കേന്ദ്രസര്ക്കാരും തമ്മിലുള്ള തര്ക്കം രൂക്ഷമായതിനിടെയാണ് തൃണമൂല് എം.എല്.എയുടെ കൊലപാതകം അരങ്ങേറിയത്. ഇതിനുപിന്നാലെ ബി.ജെ.പിക്കെതിരേ തൃണമൂല് ആരോപണം ഉന്നയിച്ചതും വലിയ വാര്ത്തയായി. ഏറെ വിവാദമായ ശാരദ ചിട്ടിഫണ്ട് കേസില് മുകുള് റോയിയും നേരത്തെ പ്രതിയായിരുന്നു. എന്നാല് കഴിഞ്ഞവര്ഷം ബി.ജെ.പിയില് ചേര്ന്നതിന് പിന്നാലെ അന്വേഷണം നിലച്ചത് വന് വിവാദമായിരുന്നു. മുഖ്യമന്ത്രി മമതാ ബാനര്ജി അടക്കമുള്ളവര് ഇക്കാര്യം ചൂണ്ടിക്കാട്ടിയാണ് കേന്ദ്രത്തിനെതിരേയും ബി.ജെ.പിക്കെതിരേയും വിമര്ശനമുന്നയിച്ചിരുന്നത്.സത്യജിത് ബിശ്വാസ് വെടിയേറ്റ് മരിച്ച സംഭവം ബംഗാള് സര്ക്കാരും ബിജെപിയും തമ്മില് പുതിയ പോര്മുഖം തുറക്കുകയാണെന്നാണ് രാഷ്ട്രീയനിരീക്ഷകരുടെ വിലയിരുത്തല്.
https://www.facebook.com/Malayalivartha
