മോഷ്ടിച്ചവര് തന്നെ കള്ളനെത്തിരയുന്ന പൊറാട്ടുനാടകം... സിഎജി റിപ്പോര്ട്ട് ഉടന് അംഗീകരിക്കില്ലെന്ന് പ്രതിപക്ഷം, റഫാല് ഇടിത്തീയായി മോദിക്കു നേരേ
റഫാല് എന്നാല് ഫ്രഞ്ച് ഭാഷയില് ഇടിത്തീവീഴ്ച എന്നാണ് അര്ത്ഥം. ദസാള്ട്ട് ഏവിയേഷനില്നിന്നു ഇന്ത്യ വാങ്ങുന്ന യുദ്ധവിമാനത്തിന് സായിപ്പ് ഇട്ട പേര് വല്ലാതെ അറംപറ്റുന്ന പ്രയോഗമായിപ്പോയി. നരേന്ദ്ര മോദിയുടെ തലയ്ക്കുമീതേ വലിയ ഇടിത്തീയായി നില്ക്കുകയാണ് ഇപ്പോള് സാക്ഷാല് റഫാല്.
റഫാല് യുദ്ധവിമാന കരാറില് കംപ്ട്രോളര് ആന്ഡ് ഓഡിറ്റര് ജനറലിന്റെ റിപ്പോര്ട്ട് സംബന്ധിച്ചാണ് പുതിയ വിവാദം. ധനകാര്യ സെക്രട്ടറിയെന്ന നിലയില് റാഫാല് കരാറുമായി ബന്ധപ്പെട്ട നടപടിക്രമങ്ങളില് പങ്കാളിയായിരുന്ന രാജീവ് മെഹ്രിഷിയാണ് ഇപ്പോള് കംപ്ട്രോളര് ആന്ഡ് ഓഡിറ്റര് ജനറല്. രാജീവ് മെഹ്രിഷി അടക്കമുള്ളവരുടെ മേല്നോട്ടത്തിലാണ് കരാര് നടപടികള് നടന്നത്. അപ്പോള് റഫാല് കരാര് സംബന്ധിച്ച ഓഡിറ്റിംഗ് അദ്ദേഹം നടത്തിയതിനെ ചോദ്യം ചെയ്ത് കോണ്ഗ്രസ് നേതാവ് കപില് സിബല് രംഗത്തു വന്നിട്ടുണ്ട്.
അതായത് മോഷണക്കേസ് അന്വേഷണം പ്രതി തന്നെ നടത്തുന്ന തരത്തിലാണ് കാര്യങ്ങള്. ഈ സംശയമാണ് കോണ്ഗ്രസ് നേതാവ് കപില് സിബല് ഉയര്ത്തുന്നത്. മോദി സര്ക്കാരിനേയും ബിജെപിയേയും സംരക്ഷിക്കാനേ മെഹ്രിഷി ശ്രമിക്കൂ എന്ന് കപില് സിബല് പറയുന്നത്. താന് പങ്കാളിയായ കരാറുമായി ബന്ധപ്പെട്ട പരിശോധന മെഹ്രിഷി തന്നെ നടത്തുന്നത് അംഗീകരിക്കാനാവില്ല എന്നാണ് സിബലിന്റെ വാദം.
2014 ഒക്ടോബര് മുതല് 2015 ആഗസ്ത് വരെ രാജീവ് മെഹ്രിഷി കേന്ദ്ര ധനകാര്യ സെക്രട്ടറിയായിരുന്ന കാലത്താണ് യുപിഎ സര്ക്കാരുണ്ടാക്കിയ ധാരണ പുനഃപരിശോധിക്കാന് റഫേല് നിര്മാതാക്കളായ ഫ്രഞ്ച് കമ്പനി ദസാള്ട്ടുമായി മോഡി സര്ക്കാര് ചര്ച്ചകള് നടത്തിയത്. 2015 ഏപ്രിലില് ഫ്രാന്സില്വച്ച് റിലയന്സ് ഉടമ അനില് അംബാനിയുടെയും മറ്റും സാന്നിധ്യത്തില് പ്രധാനമന്ത്രി നരേന്ദ്ര മോഡി കരാര് പ്രഖ്യാപനം നടത്തുന്ന ഘട്ടത്തിലും രാജീവ് മെഹ്രിഷിയായിരുന്നു ധനകാര്യ സെക്രട്ടറി. മോഡി സര്ക്കാരിന്റെ വിശ്വസ്തനായ അദ്ദഹേം 2015 ആഗസ്തില് കേന്ദ്ര ആഭ്യന്തര സെക്രട്ടറിയായി നിയമിക്കപ്പെട്ടു. 2017 ആഗസ്തില് ആഭ്യന്തര സെക്രട്ടറി സ്ഥാനത്തുനിന്ന് വിരമിച്ച മെഹ്രിഷിയെ രണ്ടുമാസത്തിനുള്ളില് മോഡി സര്ക്കാര് സിഎജിയായി നിയമിച്ചു. ഈ വിവരങ്ങള് കാണിക്കുന്നത് കപില് സിബലിന്റെ ആരോപണങ്ങളില് കഴമ്പുണ്ടെന്നാണ്. അതായത് സിഎജി റിപ്പോര്ട്ട് പൊറാട്ടുനാടകമാകാനുള്ള എല്ലാ സാധ്യതതയുമുണ്ട്.
റിപ്പോര്ട്ടുമായി ബന്ധപ്പെട്ട നടപടികളില് നിന്ന് മെഹ്രിഷി മാറിനില്ക്കണമെന്നും മെഹ്രിഷിയുടെ പരിശോധന റിപ്പോര്ട്ട് പാര്ലമെന്റില് വച്ചാല് അത് വലിയൊരു അഴിമതിയായേ കാണാനാകൂ എന്നും കപില് സിബല് പറയുന്നു. സിഎജി റിപ്പോര്ട്ട് പാര്ലമെന്റില് വച്ച് കേസ് ഒതുക്കാമെന്ന ബിജെപിയുടെ മോഹത്തിനു മേലാണ് ഇതോടെ റഫാല് ഇടിത്തീ ആയി വീണിരിക്കുന്നത്.
ഒരു കാര്യം വ്യക്തമാണ്. റഫാല് ഇടന്തന്നെ പാര്ലമെന്റില് പൊട്ടിത്തെറിയാകും. രാഹുലിന്റെ ശിവതാണ്ഡവമാകും പാര്ലമെന്റില് കാണാന് പോകുന്നത്. മാസങ്ങളായി തുടരുന്ന റഫാല്ക്കലാപത്തിന് വലിയ മാനമാണ് ഇപ്പോള് കൈവന്നിരിക്കുന്നത്.
പ്രതിപക്ഷം ഉന്നയിച്ചതും മോദി ഇത്രനാള് ഉത്തരം പറയാതിരുന്നതുമായ ഓരോരോ ചോദ്യങ്ങളുടെ പിന്നിലെ യാഥാര്ത്ഥ്യങ്ങള് മാധ്യമങ്ങളിലൂടെ പുറത്തുവന്നുകൊണ്ടിരിക്കുകയാണ്. അതൊക്കെയും മോദിയുടെ കുരുക്കുന്നവയാണ്. എന് റാം ദി ഹിന്ദുവില് പ്രസിദ്ധീകരിച്ച രണ്ട് റിപ്പോര്ട്ടും നിര്ണ്ണായകമായ തെളിവുകളാണ് പുറത്തുകൊണ്ടുവന്നത്. പ്രധാനമന്ത്രിയുടെ ഓഫീസും പ്രധാനമന്ത്രി നേരിട്ടും വിഷയത്തില് ഇടപെട്ടു എന്നാണ് അവ തെളിയിക്കുന്നത്. വിമാനങ്ങളുടെ വിലവര്ദ്ധന അടക്കമുള്ള കാര്യങ്ങളില് പ്രധാനമന്ത്രിയുടെ ഇടപെടലാണ് കാരണമെന്ന് റിപ്പോര്ട്ട് വ്യക്തമാക്കുന്നു.
പാര്ലമെന്റിലെത്തുന്ന സിഎജി റിപ്പോര്ട്ട് മോദിക്ക് അനുകൂലമായാലും പ്രതികൂലമായാലും പ്രതിപക്ഷം റഫാലിനെ വലിച്ചുകീറുമെന്നാണ് ഈ പശ്ചാത്തലം കാണിക്കുന്നത്. വിവാദത്തില് സിഎജിയുടെ പങ്ക് വ്യക്തമാക്കിക്കൊണ്ട് പ്രതിപക്ഷ നേതാക്കള് അതാണ് വ്യക്തമാക്കിയിരിക്കുന്നത്. ബിജെപി സര്ക്കാര് തെറ്റായ വിവരങ്ങള് മനഃപൂര്വ്വം കോടതിയില് നല്കി തെറ്റിദ്ധരിപ്പിച്ചാണ് സിബിഐ അന്വേഷണം ആവശ്യമില്ലെന്ന തരത്തില് സുപ്രീം കോടതിയില്നിന്ന് അനുകൂല വിധി സമ്പാദിച്ചത് എന്ന പ്രതിപക്ഷ ആരോപണവും ഇവിടെ ശക്തമായി നിലനില്ക്കുന്നണ്ട്. അടുത്ത ദിവസങ്ങളില്ത്തന്നെ അതും ശക്തി പ്രാപിക്കും.
അതേസമയം, റഫാല് ഇടപാട് പരിശോധിച്ച് സിഎജി തയ്യാറാക്കിയ ഓഡിറ്റ് റിപ്പോര്ട്ട് ഇന്ന് രാഷ്ട്രപതിക്കും കേന്ദ്ര സര്ക്കാരിനും മുന്നിലെത്തുന്നതോടെ കാര്യങ്ങള് വേഗത്തിലാകും. റിപ്പോര്ട്ട് പരിശോധിച്ചശേഷം രാഷ്ട്രപതി അത് പാര്ലമെന്റില് വയ്ക്കുന്നതിനായി ലോക്സഭാ സ്പീക്കര്ക്കും രാജ്യസഭാ അധ്യക്ഷനും കൈമാറും. ബജറ്റ് സമ്മേളനത്തിന്റെ അവസാനദിവസമായ ബുധനാഴ്ച പാര്ലമെന്റിന്റെ ഇരുസഭകളിലും റിപ്പോര്ട്ട് പ്രമ്പനമുണ്ടാക്കാനാണ് സാധ്യത.
അതോടെ റഫാല്, പേരു സൂചിപ്പിക്കും പോലെ അഗ്നിയുടെ കൊടുങ്കാറ്റായി ബിജെപി സര്ക്കാരിനു നേരേ വരുമെന്നാണ് സൂചനകള് കാണിക്കുന്നത്.
https://www.facebook.com/Malayalivartha
