വിദ്യാര്‍ത്ഥിയുടെ ചോദ്യത്തിന് മുന്നില്‍ വികാരാധീനനായി ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥ്. ലക്‌നൗവില്‍ 'യുവ കി മന്‍കി ബാത്' എന്ന പരിപാടിയില്‍ വിദ്യാര്‍ത്ഥികളുടെ ചോദ്യത്തിന് മറുപടി കൊടുക്കുകയായിരുന്നു അദ്ദേഹം. പുല്‍വാമ ഭീകരാക്രമണത്തിലെ സര്‍ക്കാരിന്റെ നടപടിയെന്താണെന്ന വിദ്യാര്‍ത്ഥിയുടെ ചോദ്യത്തിന് മുന്നിലായിരുന്നു യോഗി ആദിത്യനാഥ് വികാരാധീനനായത്.

കശ്മീരില്‍ ഭീകരാക്രമണം നടന്നു,​ ആക്രമണവും അതിന്‍െറ അന്വേഷണവും നടക്കും. കാര്യങ്ങള്‍ വീണ്ടും പഴയപടിയാകും എന്നാല്‍ പ്രശ്നം പരിഹരിക്കാന്‍ നിങ്ങളുടെ സര്‍ക്കാര്‍ എന്ത് നടപടിയാണ് സ്വീകരിച്ചത് എന്നായിരുന്നു വിദ്യാര്‍ത്ഥിയുടെ ചോദ്യം.

പ്രധാനമന്ത്രി നരേന്ദ്രമോദിയുടെ നേതൃത്വത്തില്‍ രാജ്യത്തെ ഭീകരത ഇല്ലാതാക്കപ്പെടും.അണയാന്‍ പോകുന്ന വിളക്ക് ആളിക്കത്തുന്നതാണ് അത് തന്നെയാണ് കശ്മീരില്‍ സംഭവിച്ചത്. ഭീകരത അതിന്‍റെ അവസാന ഘട്ടത്തില്‍ എത്തിനില്‍ക്കുകയാണ്. നരേന്ദ്രമോദി സര്‍ക്കാര്‍ ഇത് അവസാനിപ്പിക്കാന്‍ പ്രതിജ്ഞാബദ്ധരാണ്- യോഗി ആദിത്യനാഥ് മറുപടി പറഞ്ഞു.

യോഗിയുടെ ഉത്തരം കേട്ട് എല്ലാവരും കൈയ്യടിച്ചു. എന്നാല്‍ നിശബ്ദനായി അടുത്ത ചോദ്യം കാത്തിരുന്ന അദ്ദേഹം പെട്ടെന്ന് വികാരാധീനനാവുകയായിരുന്നു. കണ്ണുകള്‍ നിറയുകയും കയ്യിലുണ്ടായിരുന്ന തുണി കൊണ്ട് പെട്ടെന്ന് തന്നെ അദ്ദേഹം മുഖം തുടയ്ക്കുകയും ചെയ്യുകയായിരുന്നു. അതിന് ശേഷമാണ് അദ്ദേഹം വിദ്യാര്‍ത്ഥികളുമായി വീണ്ടും സംസാരിച്ചത്.