ഭീകരതയ്ക്കെതിരായ പോരാട്ടം ഏതെങ്കിലും മതത്തിന് എതിരെയല്ല. ഒരു മതവും തീവ്രവാദത്തെ അനുകൂലിക്കുന്നുമില്ല; ഭീകരത പ്രോത്സാഹിപ്പിക്കുന്നവരെ ഒറ്റപ്പെടുത്തണമെന്ന് കേന്ദ്ര വിദേശകാര്യമന്ത്രി സുഷമാ സ്വരാജ്
തീവ്രവാദത്തിനും ഭീകരതയ്ക്കുമെതിരായ പോരാട്ടം ഏതെങ്കിലും മതത്തിനെതിരല്ലെന്ന് കേന്ദ്ര വിദേശകാര്യമന്ത്രി സുഷമാ സ്വരാജ് പ്രസ്താവിച്ചു. അബുദാബിയില് വെള്ളിയാഴ്ച ആരംഭിച്ച ഇസ്ലാമിക രാജ്യങ്ങളുടെ വിദേശകാര്യമന്ത്രിമാരുടെ 44-ാം സമ്മേളനത്തില് പ്രഭാഷണം നടത്തുകയായിരുന്നു സുഷമ സ്വരാജ് .
ഭീകരത പ്രോത്സാഹിപ്പിക്കുന്നവരെ ഒറ്റപ്പെടുത്തണം എന്നും സുഷമ സ്വരാജ് ആവശ്യപ്പെട്ടു. ഇന്ത്യയുടെ അതിര്ത്തി കടന്നുള്ള ഭീകര പ്രവര്ത്തനം സുഷമ സ്വരാജ് ഇസ്ലാമിക രാജ്യങ്ങളുടെ വിദേശ കാര്യ മന്ത്രിമാരുടെ ശ്രദ്ധയില് പെടുത്തി . പാകിസ്താന്റെ പേര് പറയാതെ തന്നെ പാകിസ്താന് എതിരായ കടുത്ത വിമര്ശനമാണ് സുഷമ ഉന്നയിച്ചത്. ഭീകരതയ്ക്കെതിരായ പോരാട്ടം ഏതെങ്കിലും മതത്തിന് എതിരെയല്ല. ഒരു മതവും തീവ്രവാദത്തെ അനുകൂലിക്കുന്നുമില്ല. ഭീകരത പ്രോത്സാഹിപ്പിക്കുന്നവരെ ഒറ്റപ്പെടുത്തണം എന്നും സുഷമ സ്വരാജ് ആവശ്യപ്പെട്ടു.
ഇസ്ലാമിക രാജ്യങ്ങളുമായുള്ള ഇന്ത്യയുടെ ബന്ധം കൂടുതല് ദൃഢമായി എന്നും സമ്മേളനത്തില് സുഷമ സ്വരാജ് പറഞ്ഞു . സമ്മേളനത്തിനു മുന്പ് ഇസ്ലാമിക രാജ്യങ്ങളുടെ വിദേശ കാര്യ മന്ത്രിമാരുമായി സുഷമ സ്വരാജ് പ്രത്യേക ചര്ച്ച നടത്തി. പാകിസ്താന് അതിര്ത്തി കടന്ന് നടത്തുന്ന ഭീകര വാദവും പ്രവര്ത്തനവും അവസാനിപ്പിക്കാതെ മേഖലയില് സമധാനം ഉണ്ടാകില്ല എന്ന് സുഷമാ സ്വരാജ് പറഞ്ഞു.
ഭഗവത് ഗീതയിലെയും ഖുറാനിലെയും സൂക്തങ്ങള് ഉദ്ധരിച്ചായിരുന്നു സുഷമയുടെ പ്രസംഗം.ബാലാക്കോട്ടിലെ ഭീകരതാവളം ആക്രമിച്ചതിന്റെ പേരില് സമ്മേളനത്തില്നിന്ന് ഇന്ത്യയെ ഒഴിവാക്കാന് പാക്കിസ്ഥാന് ശ്രമിച്ചെങ്കിലും ഫലമുണ്ടായില്ല. ഇന്ത്യയെ ക്ഷണിച്ചതില് പ്രതിഷേധിച്ച് ഇന്നും നാളെയും നടക്കുന്ന സമ്മേളനം ബഹിഷ്കരിക്കുമെന്ന് പാക് വിദേശകാര്യ മന്ത്രി ഷാ മഹ്മൂദ് ഖുറേഷി അറിയിച്ചു. അതിഥിയായി സുഷമാ സ്വരാജിനെ ക്ഷണിച്ച സാഹചര്യത്തില് സമ്മേളനത്തില് പങ്കെടുക്കുന്നില്ലെന്ന് ഖുറേഷി പാര്ലമെന്റിന്റെ സംയുക്ത സമ്മേളനത്തെ അറിയിച്ചു.
യുഎഇ വിദേശകാര്യമന്ത്രി ഷെയ്ഖ് അബ്ദുല്ല ബിന് സായിദ് അല് നഹ്യാനാണ് ഇസ്ലാമിക സഹകരണ സംഘടനാ സമ്മേളനത്തിനു ഇന്ത്യയെ ക്ഷണിച്ചത്. പാക്കിസ്ഥാന് അംഗമായ ഒഐസിയുടെ അബുദാബിയിലെ സമ്മേളനത്തിലെ അതിഥി രാഷ്ട്രമാണ് ഇന്ത്യ. പതിനെട്ടര കോടിയിലധികം ഇസ്ലാം മതവിശ്വാസികള് ജീവിക്കുന്ന ഇന്ത്യയെ സമ്മേളനത്തിലേക്ക് യുഎഇ പ്രത്യേകം ക്ഷണിക്കുകയായിരുന്നു. ഇതൊരു വലിയ ബഹുമതിയാണെന്നും അബുദാബിയില് നടക്കുന്ന ഈ യോഗത്തില് വിദേശകാര്യമന്ത്രി സുഷമാ സ്വരാജ് പങ്കെടുക്കുമെന്നും വിദേശകാര്യ മന്ത്രാലയ ഉദ്യോഗസ്ഥര് അറിയിച്ചിരുന്നു.
ഭീകരവാദത്തിനെതിരെ ഒഐസി രാജ്യങ്ങളുടെ പിന്തുണ ഉറപ്പാക്കാനുള്ള അവസരം ഇന്ത്യ പ്രയോജനപ്പെടുത്തുമെന്നാണ് കരുതുന്നത്. അതേസമയം, കശ്മീരില് ഭീകരാക്രമണങ്ങള് തുടരുന്ന പശ്ചാത്തലത്തില് ഇരുരാജ്യങ്ങളും ചര്ച്ചകളിലൂടെ പരിഹാരം കണ്ടെത്തണമെന്നാണ് ഗള്ഫ് രാജ്യങ്ങളുടെ നിലപാട്.
ഇതേസമയം, സുഷമയെ യോഗത്തിനു വിളിച്ചതു മഹത്തായ സംഭവം പോലെ സര്ക്കാര് കൊട്ടിഘോഷിക്കുന്നതില് കോണ്ഗ്രസ് അദ്ഭുതം പ്രകടിപ്പിച്ചു. പൊതുജനങ്ങളെ കബളിപ്പിക്കാനുള്ള ഒരടവാണ് ഈ അത്യാഹ്ലാദമെന്ന് പാര്ട്ടി വക്താവ് ആനന്ദ ശര്മ ചൂണ്ടിക്കാട്ടി. ഇന്ത്യയിലെ മുസ്ലിം ജനസംഖ്യയുടെ വലുപ്പം കണക്കിലെടുത്ത് ഇന്ത്യയെ ഒഐസി പൂര്ണ അംഗമായി സ്വീകരിക്കണമെന്നും അല്ലാത്തപക്ഷം സമ്മേളനങ്ങളില് പങ്കെടുക്കുകയില്ലെന്നുമായിരുന്നു ഇന്ത്യയുടെ വര്ഷങ്ങളായുള്ള നയമെന്ന് യുപിഎ സര്ക്കാരില് വിദേശകാര്യസഹമന്ത്രി കൂടിയായിരുന്ന ആനന്ദ ശര്മ വ്യക്തമാക്കി.
https://www.facebook.com/Malayalivartha
