ബിജെപി നേതൃത്വത്തിലുള്ള എന്‍ഡിഎയും കോണ്‍ഗ്രസ് നേതൃത്വത്തിലുള്ള യുപിഎയും മികച്ച പ്രകടനം നടത്താതിരിക്കുകയും ബംഗാളില്‍ 2014 ലെ വിജയം തൃണമൂല്‍ ആവര്‍ത്തിക്കുകയും ചെയ്യുന്നതിലാണ് മമത ബാനര്‍ജിയുടെ സാധ്യത. എന്‍ഡിഎയ്ക്കു സര്‍ക്കാരുണ്ടാക്കാന്‍ കഴിയാതിരിക്കുകയും കോണ്‍ഗ്രസ് ഉള്‍പ്പെടുന്ന വിശാല പ്രതിപക്ഷത്തിനു കണക്കുകള്‍ അനുകൂലമാവുകയും വേണം. ലോക്‌സഭാ തിരഞ്ഞെടുപ്പിനു ശേഷം മമത തലയുയര്‍ത്തിയാല്‍ പ്രതിപക്ഷ കക്ഷികള്‍ക്കിടയില്‍ മമതയുടെ സ്വീകാര്യത വര്‍ധിക്കും. കെ. ചന്ദ്രശേഖര്‍ റാവു, ചന്ദ്രബാബു നായിഡു, അരവിന്ദ് കേജ്‌രിവാള്‍ തുടങ്ങിയവര്‍ക്ക് മമതയുമായി വ്യക്തിപരമായ അടുപ്പമുണ്ട്.

ബിജെപിയെ പുറത്തു നിര്‍ത്താന്‍ ബംഗാളികളുടെ പ്രിയപ്പെട്ട മമതയെ മുന്നില്‍ നിര്‍ത്തി രാഷ്ട്രീയ നീക്കമുണ്ടായാല്‍ കോണ്‍ഗ്രസിനും പിന്തുണയ്ക്കുകയല്ലാതെ വേറെ വഴിയുണ്ടാവില്ല. അതിന് അവര്‍ മടിക്കുകയുമില്ല. 2004ലെ മോദി തരംഗത്തിനിടെ ഒരു സീറ്റു പോലുമില്ലാതെയാണു ബിഎസ്പി കരയണഞ്ഞത്. എങ്കിലും 20% വോട്ടു നേടിയ പാര്‍ട്ടിയുടെ അടിത്തറ ഇളകിയിരുന്നില്ല. എസ്പിയുടെ 22.5 ശതമാനവും ആര്‍എല്‍ഡിയുടെ 0.86 ശതമാനവും വോട്ടും കൂടി ചേരുമ്പോള്‍ വോട്ട് ശതമാനം, കഴിഞ്ഞ തവണത്തെ തരംഗകാലത്തു ബിജെപി നേടിയതിനൊപ്പം. ഇത്തവണ തരംഗമില്ലെന്നു കണക്കാക്കിയാല്‍ പുതിയ കൂട്ടുകെട്ടിനു യുപിയിലെ സീറ്റുകള്‍ കയ്യടക്കാം. ബിജെപി, കോണ്‍ഗ്രസ് വിരുദ്ധ കുറുമുന്നണി മായാവതിയുടെ പ്രസക്തി കൂട്ടി. ദേശീയ തലത്തില്‍ ബിജെപിക്കും കോണ്‍ഗ്രസിനുമുണ്ടാകുന്ന നഷ്ടം അവര്‍ക്കു നേട്ടമാകും. എസ്പിയും ബിഎസ്പിയും ചേര്‍ന്ന് 80ല്‍ 55 സീറ്റു നേടുമെന്നാണ് ഒരു പ്രവചനം. അതു ശരിയായാല്‍, പ്രധാനമന്ത്രി ആരാകണമെന്നു മായാവതി നിശ്ചയിക്കും. രാജ്യത്തെ ആദ്യ ദലിത് പ്രധാനമന്ത്രിയെന്ന സാധ്യത, മറ്റു പ്രതിപക്ഷ പാര്‍ട്ടികളെ മായാവതിക്കു പിന്നില്‍ അണിനിരത്താനുളള സാധ്യത.