റഫേല്‍ അഴിമതി ആരോപണത്തിലൂടെ പ്രതിച്ഛായ നഷ്ടപ്പെട്ട പ്രധാനമന്ത്രി നരേന്ദ്രമോദി കഴിഞ്ഞ ഒരു മാസം കൊണ്ട് അത് തിരിച്ചുപിടിച്ചെന്ന് ദ ഹിന്ദു പത്രവും സി.എസ്.ഡി.എസ്- ലോക്‌നീതിയും നടത്തിയ പ്രീ പോള്‍ സര്‍വ്വേ ഫലം വ്യക്തമാക്കുന്നു. റഫേല്‍ ഇടപാടില്‍ അഴിമതി നടന്നിട്ടുണ്ടെന്ന് പറയുന്ന രേഖകള്‍ പുറത്ത് വിട്ടത് ദ ഹിന്ദുവാണ്. എന്‍.ഡി.എ സര്‍ക്കാരിന്റെ പ്രധാനപ്പെട്ട മൂന്ന് തീരുമാനങ്ങളാണ് മോദിയുടെ ഇമേജ് മാറ്റിമറിച്ചതെന്നും സര്‍വ്വേ ചൂണ്ടിക്കാട്ടുന്നു. ബാലക്കോട്ട് വ്യോമാക്രമണം, മുന്നോക്കക്കാര്‍ക്ക് 10 ശതമാനം സാമ്പത്തിക സംവരണം, കൃഷിക്കാര്‍ക്കുള്ള പ്രധാന്‍മന്ത്രി പദ്ധതി എന്നിവയാണ് ആ നിര്‍ണയക തീരുമാനങ്ങള്‍. മാര്‍ച്ച് അവസാനമാണ് സര്‍വ്വേ നടത്തിയത്. ജനുവരി ഏഴിനും ഫെബ്രുവരി 26നും ഇടയ്ക്കാന് മോദി സര്‍ക്കാര്‍ ഈ സുപ്രാധനമായ തീരുമാനങ്ങള്‍ കൈക്കൊണ്ടത്. 

സര്‍വ്വേയില്‍ 43 ശതമാനം പേര്‍ മോദി വീണ്ടും പ്രധാനമന്ത്രിയാകണമെന്ന് ആഗ്രഹിക്കുന്നു. 2014ല്‍ ഇതേ ടീം നടത്തിയ സര്‍വ്വേയേക്കാള്‍ ഏഴ് ശതമാനം കൂടുതലാണിത്. അതേസമയം ബാലക്കോട്ട് ആക്രമണവും സാമ്പത്തിക സംവരണവും കിസാന്‍ പദ്ധതികളും തെരഞ്ഞെടുപ്പില്‍ പ്രധാന വിഷയമാകുമോ എന്ന് സര്‍വ്വേയില്‍ പങ്കെടുത്തവരില്‍ ഭൂരിഭാഗം പേരും തുറന്ന് പറയുന്നില്ല. തൊഴിലില്ലായ്മയും വികസനവുമാണ് ജനങ്ങള്‍ നേരിടുന്ന പ്രധാനപ്രശ്‌നങ്ങളെന്നും അഞ്ചില്‍ ഒരാള്‍ വീതം ചൂണ്ടിക്കാട്ടുന്നു. ദേശീയ സുരക്ഷയും ബാലക്കോട്ടെ തിരിച്ചടിയും വലിയ വിഷയമാണെന്ന് കേവലം രണ്ട് ശതമാനം പേര്‍മാത്രമാണ് പറയുന്നത്. മുന്നോക്ക സാമ്പത്തിക സംവരണം മൂന്ന് ശതമാനം പേരും ചൂണ്ടിക്കാട്ടുന്നു. 

മോദിയുടെ ജനപിന്തുണ വര്‍ദ്ധിപ്പിച്ച് മൂന്ന് കാര്യങ്ങളും തെരഞ്ഞെടുപ്പില്‍ വോട്ടര്‍മാരെ സ്വീധിനിക്കുമോ എന്ന് പൂര്‍ണമായും പറയാനാകില്ലെന്നും സര്‍വ്വേ പറയുന്നു. സര്‍വ്വേയില്‍ പങ്കെടുത്തവരില്‍ ഭൂരിഭക്ഷം പേരും ബാലക്കോട്ട് വ്യോമാക്രമണത്തെ കുറിച്ച് വായിക്കുകയോ, കേള്‍ക്കുകയോ ചെയ്തിട്ടുണ്ട്. അവരില്‍ 46 ശതമാനം പേരും മോദി വീണ്ടും പ്രധാനമന്ത്രിയാകണമെന്ന് ആഗ്രഹിക്കുന്നു. ബാലക്കോട്ട് ആക്രമണത്തെ കുറിച്ച് അറിവില്ലാത്തവര്‍ക്കിടയില്‍ മോദിക്ക് 32 ശതമാനം ജനപിന്തുണയേ ഉള്ളൂ. ഇത് രാജ്യം മുഴുവന്‍ നടത്തിയ സര്‍വ്വേയിലെ അഭിപ്രായമാണ്. പ്രത്യേകിച്ച് മോദിക്ക് ഉത്തരേന്ത്യയിലെ പോലെ അത്ര ജനപിന്തുണയില്ലാത്ത ദക്ഷിണേന്ത്യയിലടക്കം ആളുകളോട് നേരിട്ട് സംസാരിച്ചാണ് സര്‍വ്വേ നടത്തിയത്. 

സാമ്പത്തിക സംവരണം മോദിസര്‍ക്കാര്‍ ഏര്‍പ്പെടുത്തിയ കാര്യം സര്‍വ്വേയില്‍ ഉള്‍പ്പെട്ട 57 ശതമാനം പേര്‍ക്കേ അറിയാവൂ. അവരില്‍ 47 ശതമാനം പേരും മോദിയെ വീണ്ടും പിന്തുണയ്ക്കുന്നു. സാമ്പത്തിക സംവരണത്തെ കുറിച്ച് അറിയാത്ത 37 ശതമാനം പേരും മോദിക്ക് ഒപ്പമാണ്. അതേസമയം വീണ്ടും മോദി ഭരണം വരണമെന്ന് ഏറ്റവും കൂടുതല്‍ ആഗ്രഹിക്കുന്നത് കര്‍ഷകരാണ്. 54 ശതമാനം. മോദിയെ എതിര്‍ക്കുന്നത് 42 ശതമാനം പേരും. കഴിഞ്ഞ ബജറ്റിന് ശേഷം തങ്ങളുടെ അക്കൗണ്ടില്‍ കിസാന്‍ പദ്ധതി വഴി പണം ലഭിച്ചതിനെ തുടര്‍ന്നാണ് മോദിക്ക് കര്‍ഷക പിന്തുണ കൂടിയത്. റഫേല്‍ ഇടപാടിലെ അഴിമതി ആരോപണങ്ങളും വിവാദങ്ങളും പാവങ്ങള്‍ക്ക് മിനിമം വരുമാന പദ്ധതി നടപ്പാക്കുമെന്ന കോണ്‍ഗ്രസിന്റെ പ്രകടനപത്രികയിലെ വാഗ്ദാനവും വലിയ ജനസ്വാധീനം ഉണ്ടാക്കില്ലെന്നും സര്‍വ്വേ റിപ്പോര്‍ട്ട് ചൂണ്ടിക്കാട്ടുന്നു.