എന്‍ഡിഎ സ്ഥാനാര്‍ത്ഥികളുടെ പ്രചരണാര്‍ത്ഥം കേന്ദ്ര ആഭ്യന്തര മന്ത്രി രാജ്‌നാഥ് സിംഗ് കേരളത്തില്‍. കൊല്ലം, കോട്ടയം, പാലക്കാട് മണ്ഡലങ്ങളിലാണ് രാജ്‌നാഥ് സിംഗ് പ്രചാരണത്തിനെത്തുന്നത്. പ്രധാനമന്ത്രി നരേന്ദ്ര മോദി കേരളത്തിലെത്തിയതിന് പിന്നാലെയാണ് ആഭ്യന്തര മന്ത്രിയും എത്തുന്നത്.

കൊല്ലം കന്റോണ്‍മെന്റ് മൈതാനിയില്‍ എന്‍ഡിഎ സ്ഥാനാര്‍ത്ഥി കെ.വി സാബുവിന്റെ തെരഞ്ഞെടുപ്പ് പ്രചാരണത്തില്‍ പങ്കെടുത്തതിന് ശേഷം കോട്ടയത്തെ എന്‍ഡിഎ സ്ഥാനാര്‍ത്ഥി പിസി തോമസിന്റെ പ്രചാരണത്തിനായി കോട്ടയത്തും പാലക്കാട്ടെ എന്‍ഡിഎ സ്ഥാനാര്‍ത്ഥി സി കൃഷ്ണകുമാറിന്റെ പ്രചാരണത്തിനായി അദ്ദേഹം പാലക്കാടുമെത്തും. കേന്ദ്ര നേതാക്കളെയെത്തിച്ച് പ്രചാരണത്തില്‍ ഒരു ലാപ്പ് മുന്‍പിലെത്താനുള്ള ശ്രമത്തിലാണ് എന്‍ഡിഎ. പ്രധാനമന്ത്രി നരേന്ദ്ര മോദി, പ്രതിരോധ മന്ത്രി നിര്‍മ്മലാ സീതാരാമന്‍, സ്മൃതി ഇറാനി അടക്കമുള്ള കേന്ദ്രമന്ത്രിമാര്‍ തുടങ്ങിയവര്‍ തെരഞ്ഞെടുപ്പ് പ്രാചാരണം കൊഴുപ്പിക്കാന്‍ വരും ദിവസങ്ങളില്‍ കേരളത്തിലെത്തുന്നുണ്ട്. ബിജെപി വീണ്ടും അധികാരത്തില്‍ എത്തിയാല്‍ രാജ്യദ്രോഹ നിയമം കുടുതല്‍ കര്‍ശ്ശനമാക്കുമെന്ന് കേന്ദ്ര ആഭ്യന്തരമന്ത്രി രാജ്നാഥ് സിങ്. കോണ്‍ഗ്രസ് പ്രകടന പത്രികയില്‍ രാജ്യദ്രോഹ നിയമം എടുത്ത് കളയുമെന്ന് പ്രതിപാദിച്ചിരുന്നു. ഇതുമായി ബന്ധപ്പെട്ട പ്രതികരണത്തിലാണ് രാജ്നാഥ് സിങ് ഇക്കാര്യം അറിയിച്ചത്.

പ്രകടന പത്രികയിലെ ഈ വാഗ്ദാനത്തെ രൂക്ഷമായി വിമര്‍ശിച്ച അദ്ദേഹം ഇന്ത്യയെ ആരെങ്കിലും തകര്‍ക്കാന്‍ ശ്രമിച്ചാല്‍ അവര്‍ക്ക് മാപ്പ് കൊടുക്കണമെന്നാണോ നിങ്ങള്‍ പറയുന്നതെന്നും ചോദിച്ചു. രാജ്യ ദ്രോഹക്കുറ്റം ഇല്ലാതാക്കുമെന്ന് പറയുന്ന കോണ്‍ഗ്രസ് അങ്ങിനെയൊരു സൂചനയല്ലേ നല്‍കുന്നത്. എന്‍ഡിഎ സര്‍ക്കാര്‍ വീണ്ടും അധികാരത്തില്‍ എത്തിയാല്‍ രാജ്യദ്രോഹക്കുറ്റത്തിനെതിരെയുള്ള നടപടികള്‍ കര്‍ശ്ശനമാക്കുക തന്നെ ചെയ്യുമെന്നും അദ്ദേഹം അറിയിച്ചു. ഗുജറാത്തില്‍ തെരഞ്ഞെടുപ്പ് പ്രചാരണ റാലിയെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.

രാജ്യത്തെ അഴിമതി ഇല്ലാതാക്കാന്‍ മോദിസര്‍ക്കാരിന് ഒരു പരിധി വരെ സാധിച്ചിട്ടുണ്ട്. ഇത് രാജ്യത്തു നിന്ന് തുടച്ചു നീക്കുന്നതിന് ആവശ്യമായ നടപടികള്‍ക്ക് എന്‍ഡിഎ സര്‍ക്കാര്‍ ആരംഭം കുറിച്ച് കഴിഞ്ഞു. രാജ്യത്തോടുള്ള മോദിയുടെ പ്രതിബദ്ധതയും സമഗ്രതയും ഒരാള്‍ക്കും ചോദ്യം ചെയ്യാനാവുന്നതല്ലെന്നും കേന്ദ്രമന്ത്രി അറിയിച്ചു.