പ്രധാനമന്ത്രിയാകാന്‍ മോദിയെക്കാളും മികച്ചയാള്‍ നിതിന്‍ ഗഡ്കരിയെന്ന് അനുരാഗ് കശ്യപ്. 120 കോടി ജനങ്ങളുള്ള രാജ്യത്ത് മോദിക്ക് പകരം മറ്റൊരാളെ കണ്ടെത്താന്‍ ജനങ്ങള്‍ക്ക് സാധിക്കാത്തതെന്താണെന്ന ഒരു ട്വീറ്റിന് മറുപടി നല്‍കുകയായിരുന്നു അദ്ദേഹം. കേന്ദ്രമന്ത്രി നിതിന്‍ ഗഡ്കരിക്ക് പരസ്യ പിന്തുണയുമായി ബോളിവുഡ് സംവിധായകനും നടനുമായ അനുരാഗ് കശ്യപ്. അടുത്ത പ്രധാനമന്ത്രി മോദിയല്ലെന്നും നിതിന്‍ ഗഡ്കരിയാണെന്നുമുള്ള വാര്‍ത്തകള്‍ പ്രചരിക്കുന്നതിനിടെയാണ് അനുരാഗ് കശ്യപിന്റെ പരാമര്‍ശം. 120 കോടി ജനങ്ങളുള്ള രാജ്യത്ത് മോദിക്ക് പകരം മറ്റൊരാളെ കണ്ടെത്താന്‍ ജനങ്ങള്‍ക്ക് സാധിക്കാത്തതെന്താണെന്ന ഒരു ട്വീറ്റിന് മറുപടി നല്‍കുകയായിരുന്നു അദ്ദേഹം. 

'ബിജെപിയ്ക്ക് മോദിയെക്കാള്‍ ഉപരി തെരഞ്ഞെടുക്കാനാകുന്നയാള്‍ ഗഡ്കരിയാണ്. ഇന്ത്യന്‍ രാഷ്ട്രീയത്തില്‍നിന്ന് നിങ്ങള്‍ക്ക് തുടച്ച് മാറ്റാന്‍ കഴിയാത്ത ഒരു കാര്യം അഴിമതിയാണ്. എന്നാല്‍ യഥാര്‍ത്ഥത്തില്‍ വര്‍ഗീയതയും വെറുപ്പിന്റേയും അക്രമത്തിന്റേയും രാഷ്ട്രീയവുമാണ് നിങ്ങള്‍ തുടച്ച് മാറ്റേണ്ടത്', കശ്യപ് ട്വീറ്റ് ചെയ്തു. രാഷ്ട്രീയത്തില്‍ നിന്ന് വിദ്വേഷം നീക്കാനുള്ള ഏക മാര്‍ഗം സഖ്യ സര്‍ക്കാറിനെ തെരഞ്ഞെടുക്കുക എന്നതാണ്. ജനങ്ങള്‍ മോദിക്ക് വോട്ട് ചെയ്യാതിരിക്കുകയും മണ്ഡലത്തിലെ ഏറ്റവും വിശ്വസ്തനായ സ്ഥാനാര്‍ത്ഥിക്ക് വോട്ട് ചെയ്യുകയും ചെയ്യുന്നതിലൂടെ ഇത് സാധ്യമാകുമെന്നും അദ്ദേഹം പറഞ്ഞു.

മോദിയുടെ ചൗക്കിദാര്‍ ക്യാമ്പയിനിനെയും അനുരാഗ് കശ്യപ് രൂക്ഷമായി വിമര്‍ശിച്ചു. ഇന്ത്യയ്ക്ക് വേണ്ടത് ഒരു പ്രധാനമന്ത്രിയെ ആണെന്നും അല്ലാതെ കാവല്‍ക്കാരനെയല്ലെന്നും അനുരാഗ് കശ്യപ് പറഞ്ഞു. മോദി വിമര്‍ശകന്‍ എന്ന് പൊതുവെ അറിയപ്പെടുന്ന ചലച്ചിത്രതാരമാണ് അനുരാഗ് കശ്യപ്.