ബി.ജെ.പിക്ക് എത്ര സീറ്റ്; 162 മണ്ഡലങ്ങളില് നേരിട്ട് എന്.ഡി.എ-യു.പി.എ പോരാട്ടം
ഒരു വിഭാഗം നിരീക്ഷകര് പറയുന്നത് 13 സംസ്ഥാനങ്ങളിലെ 353 സീറ്റുകളെ ആശ്രയിച്ചാണ് ബി.ജെ.പിയുടെ മാജിക് നമ്പര് കിടക്കുന്നത് എന്നാണ്. 2014ല് ഇതില് 74 ശതമാനം സീറ്റുകളും ബി.ജെ.പിക്കാണ് കിട്ടിയിരുന്നത്. ഈ സംസ്ഥാനങ്ങളില് ബി.ജെ.പി നേരിടുന്ന രാഷ്ട്രീയ വെല്ലുവിളികള് മനസ്സിലാക്കിയാല് സീറ്റുകളുടെ അന്തിമ എണ്ണം സംബന്ധിച്ചും രൂപം ലഭിക്കും. 162 മണ്ഡലങ്ങളില് നേരിട്ട് എന്.ഡി.എ-യു.പി.എ പോരാട്ടം. എട്ടു സംസ്ഥാനങ്ങളിലാണ് സഖ്യത്തോടുകൂടിയോ അല്ലാതെയോ ബി.ജെ.പിയും കോണ്ഗ്രസും നേരിട്ട് മത്സരിക്കുന്നത്. ഹിമാചല് പ്രദേശ്, ഉത്തരാഖണ്ഡ്, രാജസ്ഥാന്, മധ്യപ്രദേശ്, ഛത്തിസ്ഗഢ്, ഗുജറാത്ത്, മഹാരാഷ്ട്ര, ഝാര്ഖണ്ഡ് എന്നിവയാണിത്. 2014ല് ഇവിടങ്ങളില്നിന്നുള്ള ആകെ സീറ്റായ 162ല് 151 ഉം എന്.ഡി.എ നേടിയതാണ്. ഇതില് മഹാരാഷ്ട്ര ഒഴികെ ബാക്കി സംസ്ഥാനങ്ങളിലെല്ലാം കഴിഞ്ഞതവണ ബി.ജെ.പി ഒറ്റക്കാണ് മത്സരിച്ചിരുന്നത്. മഹാരാഷ്ട്രയിലും ഗുജറാത്തിലും കോണ്ഗ്രസ് സഖ്യം ചേര്ന്നായിരുന്നു മത്സരം.
148 സീറ്റുകളില് 2014ലേതിനെക്കാളും മികച്ച പ്രതിപക്ഷ ഐക്യം ബി.ജെ.പിക്ക് കൂടുതല് ഐക്യമുള്ള പ്രതിപക്ഷത്തെ നേരിടേണ്ടിവരുന്ന സംസ്ഥാനങ്ങളാണ് ഉത്തര്പ്രദേശ്, ബിഹാര്, കര്ണാടക എന്നിവ. വലിയ നേട്ടങ്ങളുണ്ടാക്കുമെന്ന് ബി.ജെ.പി പ്രതീക്ഷിക്കുന്നവയാണ് പശ്ചിമ ബംഗാളിലെയും ഒഡിഷയിലെയും 63 സീറ്റുകള്. 2014ല് ഇതില് രണ്ട് സീറ്റ് മാത്രമായിരുന്നു ബി.ജെ.പി സമ്പാദ്യം. ഭരണ പാര്ട്ടികളായ തൃണമൂല് കോണ്ഗ്രസിനും ബിജു ജനതാദളിനുമെതിരെയാണ് തങ്ങളുടെ പോരാട്ടമെന്ന് ബി.ജെ.പി പറയുന്നുണ്ടെങ്കിലും യഥാര്ഥത്തില് പ്രതിപക്ഷമായ ബംഗാളിലെ ഇടതുപാര്ട്ടികളുടെയും ഒഡിഷയിലെ കോണ്ഗ്രസിന്റെയും എത്ര വോട്ടുകള് ബി.ജെ.പിക്ക് നേടാന് കഴിയുമെന്നതായിരിക്കും നിര്ണായകമാവുക.
ബംഗാളില് ഇടതുവോട്ട് പൂര്ണമായും ബി.ജെ.പിക്ക് ലഭിക്കുകയാണെങ്കില് 42ല് 32 സീറ്റ് ലഭിക്കും. പകുതി വോട്ടാണ് ലഭിക്കുന്നതെങ്കില് സീറ്റ് 11 ആയിരിക്കും. 25 ശതമാനം വോട്ട് ലഭിക്കുകയാണെങ്കില് സീറ്റ് നാലായി കുറയും. ആദ്യത്തേത് സംഭവിക്കാന് സാധ്യതയില്ലെങ്കിലും രണ്ട്, മൂന്ന് സാധ്യതകള്ക്കിടയിലുള്ളത് സംഭവിക്കാനിടയുണ്ട്. ഇടതുപക്ഷത്തിന്റെ മുസ്ലിം വോട്ടുകള് തൃണമൂലിലേക്കും ഹിന്ദു വോട്ടുകള് ബി.ജെ.പിയിലേക്കും പോയേക്കുമെന്നാണ് നിരീക്ഷണം.
സമാനമായി ഒഡിഷയില് കോണ്ഗ്രസ് വോട്ട് മുഴുവനായി കിട്ടുകയാണെങ്കില് ബി.ജെ.പിക്ക് 21ല് 13 സീറ്റ് സ്വന്തമാക്കാം. പകുതിയാണ് കിട്ടുന്നതെങ്കില് അഞ്ച് സീറ്റ് ലഭിക്കും. അതേസമയം, തൃണമൂലിന്റെയും ബിജു ജനതാദളിന്റെയും വോട്ട് ബാങ്കുകളിലേക്ക് കടന്നുകയറുകയാണെങ്കില് ബി.ജെ.പിക്ക് വന് നേട്ടമുണ്ടാക്കാം എന്ന സാധ്യതയും നിലനില്ക്കുന്നു. ഇവ കൂടാതെ കഴിഞ്ഞതവണ ബി.ജെ.പി മികച്ച പ്രകടനം കാഴ്ചവെച്ച ഡല്ഹി, ഹരിയാന, അസം തുടങ്ങിയ സംസ്ഥാനങ്ങളുണ്ട്. ഇവിടങ്ങളിലെ 31ല് 21 സീറ്റും ബി.ജെ.പിയാണ് സ്വന്തമാക്കിയിരുന്നത്. ഈ സംസ്ഥാനങ്ങളില് പ്രതിപക്ഷത്തിന് പ്രതീക്ഷയേകുന്നതൊന്നും കാര്യമായി സംഭവിച്ചിട്ടില്ലാത്തതിനാല് ബി.ജെ.പിക്ക് തിരിച്ചടി ലഭിക്കാന് സാധ്യത കുറവാണ്. അതിനാല് തന്നെ 13 സംസ്ഥാനങ്ങളിലെ 353 സീറ്റുകള് തന്നെയാവും ഇത്തവണ ബി.ജെ.പിയുടെ ഭാഗധേയം നിര്ണയിക്കുക എന്നാണ് കരുതപ്പെടുന്നത്.
https://www.facebook.com/Malayalivartha