മാലെഗാവ് സ്‌ഫോടനക്കേസ് പ്രതി സാധ്വി പ്രഗ്യ താക്കൂര്‍ ബി.ജെ.പിയില്‍ ചേര്‍ന്നു; പ്രഗ്യാ സിംഗ് ഭോപ്പാലില്‍ മത്സരിച്ചേക്കുമെന്ന് ദേശീയ മാദ്ധ്യമങ്ങള്‍ റിപ്പോര്‍ട്ട് ചെയ്തു
മാലെഗാവ് സ്‌ഫോടനക്കേസിലെ മുഖ്യ പ്രതി സാധ്വി പ്രഗ്യ താക്കൂര്‍ ബി.ജെ.പിയില്‍ ചേര്‍ന്നു. ഞാന്‍ ഔദ്യോഗികമായി ബി.ജെ.പിയില്‍ ചേര്‍ന്നു. ഞാന്‍ തിരഞ്ഞെടുപ്പില്‍ മത്സരിക്കുകയും ജയിക്കുകയും ചെയ്യും." -പ്രഗ്യാ സിംഗ് പറഞ്ഞതായി ദേശീയ മാദ്ധ്യമങ്ങള്‍ റിപ്പോര്‍ട്ട് ചെയ്തു. ഭോപ്പാലില്‍ കോണ്‍ഗ്രസ് സ്ഥാനാര്‍ത്ഥിയും മുന്‍ മുഖ്യമന്ത്രിയുമായ ദ്വിഗ് വിജയ് സിംഗിനെതിരെ അവര്‍ മത്സരിച്ചേക്കുമെന്നാണ് സൂചന.
ഭോപ്പാലിലെ ബി.ജെ.പി സ്ഥാനാര്‍ത്ഥി ആരെന്ന് ബി.ജെ.പി ഇതുവരെ പ്രഖ്യാപിച്ചിട്ടില്ല. മുന്‍ മുഖ്യമന്ത്രി ശിവരാജ് സിംഗ് ചൗഹാന്‍ അടക്കമുള്ളവരുടെ പേരുകള്‍ ഉയര്‍ന്നു കേള്‍ക്കുന്നുണ്ട്. 1984ലാണ് ഈ മണ്ഡലത്തില്‍ അവസാനമായി ഒരു കോണ്‍ഗ്രസ് സ്ഥാനാര്‍ത്ഥി ജയിച്ചത്. അതേസമയം, സ്വതന്ത്രസ്ഥാനാര്‍ത്ഥിയാകാന്‍ താന്‍ തയ്യാറല്ലെന്നും പ്രഗ്യ വ്യക്തമാക്കിയിട്ടുണ്ട്. നരേന്ദ്ര സിംഗ് തോമര്‍, ശിവരാജ് സിംഗ് ചൗഹാന്‍, ഉമാഭാരതി എന്നിവര്‍ മത്സരിക്കാന്‍ വിമുഖത അറിയിച്ചതോടെയാണ് സാധ്വി പ്രഗ്യയുടെ പേര് പരിഗണിക്കുന്നത്.
2008ല്‍ മാലേഗാവില്‍ നടന്ന സ്‌ഫോടനത്തില്‍ ആറ് പേര് കൊല്ലപ്പെടുകയും 100 പേര്‍ക്ക് പരിക്കേല്‍ക്കുകയും ചെയ്തിരുന്നു. ഈ കേസില്‍ ദേശീയ അന്വേഷണ ഏജന്‍സി പ്രഗ്യാ സിംഗിന് ക്ലിന്‍ ചിറ്റ് നല്‍കിയതിനെ തുടര്‍ന്ന് ബോംബെ ഹൈക്കോടതി രണ്ടു വര്‍ഷം മുമ്പ് ജാമ്യം അനുവദിച്ചിരുന്നു.
https://www.facebook.com/Malayalivartha
