കേരളത്തിലെ എന്‍.ഡി.എ നേതാക്കളെ പോലും അമ്പരിച്ചുകൊണ്ട് ഒരു സ്വതന്ത്ര സ്ഥാനാര്‍ത്ഥിക്കായി വോട്ട് ചോദിച്ച് കേന്ദ്രമന്ത്രിയും റിപ്പബ്ലിക്കന്‍ പാര്‍ട്ടി ഒഫ് ഇന്ത്യ (എ) നേതാവുമായ രാംദാസ് അത്തേവാല കോഴിക്കോട്ട് എത്തിയത് വലിയ വാര്‍ത്തയായിരുന്നു. അപ്പോഴേ ഉയരുന്ന ഒരു ചോദ്യമുണ്ട്. ആരാണാ സ്ഥാനാര്‍ത്ഥിയായ നുസ്രത്ത് ജഹാന്‍. കോഴിക്കോട്ട് ലോക്‌സഭാ മണ്ഡലത്തിലെ ഏക വനിതാ സ്ഥാനാര്‍ത്ഥി ആള് ചില്ലറക്കാരിയല്ല

ഖത്തര്‍, ഒമാന്‍, എമിറേറ്റ്‌സ്, ഇത്തിഹാദ്, കിംഗ്ഫിഷര്‍ എന്നീ വിമാനകമ്പനികളില്‍ വിവിധ തസ്തികകളില്‍ ജോലി ചെയ്തിരുന്ന ഇവര്‍ പിന്നീട് രാജിവച്ച് ഇവന്റ് മാനേജ്‌മെന്റ് രംഗത്തെത്തുകയായിരുന്നു. ഇന്റര്‍ നാഷണല്‍ ഹ്യൂമന്‍ റെറ്റ്‌സ് ഓര്‍ഗനൈസേഷന്‍, മലബാര്‍ ഡെവലപ്‌മെന്റ് ഫോറം, എന്നിങ്ങനെ നിരവധി സംഘടനകളുടെ പ്രവര്‍ത്തകയുമാണ്. 'കഥയുള്ളൊരു പെണ്ണ്' എന്ന പേരില്‍ ഒരു സിനിമ നിര്‍മ്മിക്കുകയും അതില്‍ നായികയായി അഭിനയിക്കുകയും ചെയ്തിട്ടുണ്ട്. 1970 നവംബര്‍ 2 ന് മാവൂര്‍ എളമരത്ത് എടക്കുനിമേല്‍ വീട്ടിലാണ് ജനനം. പിതാവ് പരേതനായ ഇ.കെ മുഹമ്മദ്, മാതാവ്: കെ.പി നഫീസ. ലീഗിന്റെ സംസ്ഥാന കമ്മിറ്റി ഓഫീസ് സെക്രട്ടറി എം.കെ ഹംസയാണ് ഭര്‍ത്താവ്.
സ്വതന്ത്ര സ്ഥാനാര്‍ത്ഥി നുസ്രത്തിന് അനുവദിച്ച തിരഞ്ഞെടുപ്പ് ചിഹ്നം ഓട്ടോയാണ്. രാവിലെ മുതല്‍ പ്രചാരണത്തിന് ഇറങ്ങുന്നതും ഓട്ടോയിലാണ്. സാധാരണക്കാരില്‍ സാധാരണക്കാരിയായ തനിക്ക് ഓട്ടോ അല്ലാതെ മറ്റൊരു ചിഹ്നം ആവശ്യമില്ല നുസ്രത്ത് പറയുന്നു. റിപ്പബ്ലിക്കന്‍ പാര്‍ട്ടിയുടെ എല്ലാ പിന്തുണയും നുസ്രത്തിന് വാഗ്ദാനം ചെയ്ത ശേഷമാണ് കേന്ദമന്ത്രി

അത്തേവാല മടങ്ങിയത്. 17 വര്‍ഷമായി തനിക്ക് അത്തേവാലയെ പരിചയമുണ്ടെന്ന് ഇന്നലെയും നുസ്രത്ത് ആവര്‍ത്തിച്ചു.
തന്റെ മത്സരം സ്ത്രീകള്‍ക്കും പാവപ്പെട്ടവര്‍ക്കും അവഗണിക്കപ്പെടുന്ന വിഭാഗത്തിനും വേണ്ടിയാണ്. ജയിച്ചാലും തോറ്റാലും താന്‍ ജനങ്ങള്‍ക്കൊപ്പമുണ്ടാകും. സ്വതന്ത്രയായി മത്സരിക്കാന്‍ തീരുമാനിച്ചത് തന്നെ കഷ്ടപ്പെട്ട് ജീവിതം തള്ളി നീക്കുന്നവരുടെ ഉന്നമനത്തിനായാണ്.