യജമാനന്‍മാരുടെ ശബ്ദത്തില്‍ സംസാരിക്കുന്ന കൂട്ടിലിട്ട തത്തയാണ് സി.ബി.ഐ എന്ന സുപ്രീംകോടതിയുടെ നിരീക്ഷണം ശരിയാണെന്ന് സി.ബി.ഐ മേധാവി രഞ്ജിത് സിന്‍ഹ. സി.ബി.ഐയെ കുറിച്ച് സുപ്രീംകോടതി നടത്തിയ പരാമര്‍ശങ്ങള്‍ എല്ലാം ശരിയാണെന്നാണ് തന്റെ അഭിപ്രായമെന്നും അദ്ദേഹം പറഞ്ഞു.അതേസമയം, സുപ്രീം കോടതി ചില പരാമര്‍ശങ്ങള്‍ നടത്തുക മാത്രമാണുണ്ടായതെന്നും അത് വിധിയായി കണക്കാക്കേണ്ടതില്ലെന്നും കോണ്‍ഗ്രസ് നേതാവ് ദിഗ്‌വിജയ് സിങ് പറഞ്ഞു. സര്‍ക്കാര്‍ തെറ്റായി ഒന്നും ചെയ്തിട്ടില്ലെന്നും സിങ് വിശദീകരിച്ചു. കല്‍ക്കരി കുംഭകോണം സംബന്ധിച്ചുള്ള അന്വേഷണത്തില്‍ സര്‍ക്കാര്‍ ഇടപെട്ടിട്ടില്ല. 

കല്‍ക്കരി ബ്ലോക്കുകള്‍ അനുവദിച്ചത് സംബന്ധിച്ചുള്ള റിപ്പോര്‍ട്ടില്‍ നിയമ മന്ത്രി അശ്വനി കുമാറും പ്രധാനമന്ത്രിയുടെ ഓഫീസിലെ ചില ഉന്നതരും കല്‍ക്കരി മന്ത്രാലയവും മാറ്റങ്ങള്‍ വരുത്തിയെന്ന് സി.ബി.ഐ മേധാവി രണ്ടാമത് കോടതിയില്‍ സമര്‍പ്പിച്ച സത്യവാങ് മൂലത്തില്‍ വ്യക്തമാക്കിയിരുന്നു.

 സത്യവാങ് മൂലം പരിശോധിച്ച കോടതി സി.ബി.ഐയുടെ പ്രവര്‍ത്തനം സ്വതന്ത്രമാക്കാന്‍ നടപടിയെടുക്കുമോ എന്ന് പരിഹാസ സ്വരത്തില്‍ സര്‍ക്കാരിനോട് അന്വേഷിച്ചിരുന്നു. സി.ബി.ഐയുടെ പ്രവര്‍ത്തനങ്ങളില്‍ പുറത്തുനിന്നുള്ള ആരും ഇടപെടാതിരിക്കാന്‍ നടപടിയെടുക്കുമോ എന്നും കോടതി ചോദിച്ചിരുന്നു. ഇതിന് മടികാണിക്കുകയാണെങ്കില്‍ ആവശ്യമെന്ന് കണ്ടാല്‍ ഇടപെടേണ്ടി വരുമെന്നും കോടതി മുന്നറിയിപ്പ് നല്‍കിയിരുന്നു.