രണ്ടാം മോദി മന്ത്രി സഭയിൽ സുപ്രധാനമായ മന്ത്രിസ്ഥാനം ലഭിച്ചതോടെ അമിത് ഷാ ഇനി പാർട്ടി അധ്യക്ഷ പദവി ഒഴിഞ്ഞേക്കുമെന്ന് സൂചന. മോദി സർക്കാരിലെ ആഭ്യന്തര വകുപ്പിന്റെ ചുമതലയാണ് അമിത് ഷായ്ക്ക് നൽകിയിരിക്കുന്നത്. അമിത് ഷായുടെ പകരക്കാരനായി പരിഗണിക്കുന്ന പേരുകളിൽ ഏറ്റവും സാധ്യത കൂടുതൽ മുൻ കേന്ദ്ര ആരോഗ്യ വകുപ്പ് മന്ത്രിയായിരുന്ന ജെപി നദ്ദയുടേതാണ്.

അമിത് ഷാ കടന്നു വന്ന വഴികളിലൂടെ തന്നെയാണ് നദ്ദയും ദേശീയ രാഷ്ട്രീയത്തിലേക്ക് എത്തുന്നത്. രണ്ടാം മോദി സർക്കാരിൽ ജെപി നദ്ദയ്ക്ക് മന്ത്രിസ്ഥാനം നൽകാതിരുന്നതോടെ നദ്ദ ബിജെപിയുടെ തലപ്പത്തേയ്ക്ക് എത്തുമെന്ന സൂചന വർധിക്കുന്നു.

സത്യപ്രതിജ്ഞയ്ക്ക് മണിക്കൂറുകൾ മുമ്പ് മാത്രമാണ് അമിത് ഷാക്ക് മന്ത്രിസ്ഥാനം ഉറപ്പിച്ചത്. നരേന്ദ്ര മോദിക്കും രാജ്നാഥ് സിംഗിനും ശേഷം മന്ത്രിസഭയിലെ മൂന്നാമനായി അമിത് ഷാ സത്യപ്രതിജ്ഞ ചെയ്ത് അധികാരമേൽക്കുകയായിരുന്നു.

അമിത് ഷാ കഴിഞ്ഞാൽ പാർട്ടിയുടെ പ്രധാന തന്ത്രജ്ഞരിൽ ഒരാളാണ് ജെപി നദ്ദ. ഒന്നാം മോദി സർക്കാരിലെ ആരോഗ്യവകുപ്പ് മന്ത്രിയായിരുന്നു നദ്ദ. ആയുഷ് മാൻ ഭാരത് ഉൾപ്പെടെ നരേന്ദ്രമോദി സർക്കാരിന്റെ അഭിമാനപദ്ധതികളിൽ പലതും വിജയകരമാക്കിയതിന് പിന്നിൽ നദ്ദയുടെ പ്രവർത്തനങ്ങളുണ്ടായിരുന്നു. ഉത്തർപ്രദേശിൽ നിന്നും ബിജെപി അധ്യക്ഷ സ്ഥാനത്തേയ്ക്ക് എത്തും മുമ്പ് അമിത് ഷാ ഉത്തർപ്രദേശിൽ തന്റെ കഴിവ് തെളിയിച്ചത് പോലെ നദ്ദയും ഇത്തവണ യുപിയിൽ ബിജെപിയുടെ വിജയ ശിൽപ്പിയായി. 2014ലെ തിരഞ്ഞെടുപ്പിന് മുമ്പ് യുപിയുടെ തിരഞ്ഞെടുപ്പ് ചുമതല അമിത് ഷായ്ക്ക് നൽകിയതു പോലെ 2019ൽ ജെപി നദ്ദയ്ക്കായിരുന്നു ഉത്തർപ്രദേശിന്റെ ചുമതല.

ബീഹാറിൽ ഹിമാചൽ പ്രദേശിലാണ് നദ്ദയുടെ കുടുംബവേരുകൾ. ബീഹാറിലെ പാട്നയിലായിരുന്നു ജനനം. എബിവിപിയിലൂടെയാണ് നദ്ദ പൊതുരംഗത്തെത്തിയത്. 1886 മുതൽ 1989 വരെ എബിവിപിയുടെ ദേശീയ ജനറൽ സെക്രട്ടറിയായിരുന്നു. 1991ൽ ഭാരതീയ ജനതാ യുവമോർച്ചാ അധ്യക്ഷനായി. 1933ലൽ തന്റെ 33ാമത്തെ വയസിലാണ് ആദ്യമായി ഹിമാചൽ പ്രദേശിലെ നിയമസഭാംഗം ആകുന്നത്. ദേശീയ രാഷ്ട്രീയത്തിലേക്ക് ഹിമാചൽപ്രദേശിലെ ബിജെപി മന്ത്രിസഭയിൽ രണ്ട് വട്ടം മന്ത്രിയായിരുന്നു ജെപി നദ്ദ. 2010ൽ പ്രേംകുമാർ ദുമാൽ സർക്കാരിൽ നിന്നും മുഖ്യമന്ത്രിയുമായുള്ള ഭിന്നതകളെ തുടർന്ന് രാജിവച്ചൊഴുഞ്ഞു. തുടർന്ന് നിതിൻ ഗഡ്കരിയാണ് ദേശീയ രാഷ്ട്രീയത്തിലേക്ക് ജെപി നദ്ദയെ എത്തിക്കുന്നത്. ബിജെപി സർക്കാർ മഹാരാഷ്ട്രയിൽ അധികാരത്തിൽ എത്തിയതോടെ മോദി സർക്കാരിലെ ആരോഗ്യ വകുപ്പ് മന്ത്രിയായി ജെപി നദ്ദയെ നിയമിക്കുകയായിരുന്നു.