ബിജെപിക്ക് മുന്നറിയിപ്പുമായി മമതാ ബാനര്‍ജി. തൃണമൂൽ കോൺഗ്രസിനെതിരെ പശ്ചിമ ബംഗാളിൽ ബിജെപി അക്രമം തുടര്‍ന്നാൽ ബിജെപിയെ പൂര്‍ണ്ണമായും തകര്‍ക്കുമെന്ന് മുഖ്യമന്ത്രി മമതാ ബാനര്‍ജി മുന്നറിയിപ്പ് നൽകി. ഈദുൽഫിത്തറുമായി ബന്ധപ്പെട്ട് സംഘടിപ്പിച്ച പരിപാടിയ്ക്കിടെയായിരുന്നു നമ്മളെ ആക്രമമിക്കാൻ വരുന്നവരെ തകര്‍ക്കുമെന്ന മമതയുടെ പരാമര്‍ശം.

പശ്ചിമ ബംഗാളിലെ ബിജെപി വിജയത്തെ സൂര്യോദയത്തോട് ഉപമിച്ച മമത അവര്‍ അതേ വേഗത്തിൽ തന്നെ അസ്തമിച്ച് ഇല്ലാതാകുമെന്ന് പറഞ്ഞു. ഉദയസമയത്ത് അത് ജ്വലിച്ചു നിൽക്കും. ഇവിഎമ്മുകള്‍ പിടിച്ചെടുത്താണ് അവര്‍ ഉയര്‍ന്നു വന്നത്. അതേ വേഗതയിൽ തന്നെ അവര്‍ ഇല്ലാതാകും എന്നും മമത പറഞ്ഞു.

ബിജെപി മതവും രാഷ്ട്രീയവും തമ്മിൽ കൂട്ടിക്കലലര്‍ത്തുകയാണെന്ന് മമത ബാനര്‍ജി അഭിപ്രായപ്പെട്ടു. ആദ്യം ജയ് ശ്രീറാം എന്ന് മുദ്രാവാക്യം വിളിച്ച ബിജെപി ഇപ്പോള്‍ ജയ് മഹാകാളിയെന്നാണ് മുദ്രാവാക്യം വിളിക്കുന്നത്. തെരഞ്ഞെടുപ്പിന് ശേഷം ജയ് ശ്രീറാം വിളഇയുടെ ടിആര്‍പി കുറഞ്ഞെന്ന് പാര്‍ട്ടി നേതാവും മമതാ ബാനര്‍ജിയുടെ സഹോദരീപുത്രനുമായ അഭിഷേക് ബാനര്‍ജി കഴിഞ്ഞ ദിവസം പറഞ്ഞിരുന്നു.

അതേസമയം, തൃണമൂൽ കോൺഗ്രസ് സര്‍ക്കാരിനെ രൂക്ഷമായി വിമര്‍ശിച്ച് ബിജെപി നേതാവ് കൈലാഷ് വിജയ്‍‍വര്‍ഗിയ രംഗത്തു വന്നു. തൃണമൂൽ സര്‍ക്കാരിന് കാലാവധി തികയ്ക്കാൻ കഴിയില്ലെന്നും അസംബ്ലി തെരഞ്ഞെടുപ്പിന് മുൻപ് പാര്‍ട്ടി അധികാരത്തിൽ നിന്ന് താഴെ വീണുമെന്നും അദ്ദേഹം അഭിപ്രായപ്പെട്ടു. മമത ധാര്‍ഷ്ട്യമുള്ള ഭരണാധികാരിയാണെന്നും അദ്ദേഹം കൂട്ടിച്ചേര്‍ത്തു.