അച്ഛനും രണ്ടാനമ്മയും നിര്‍ബന്ധച്ച് വിവാഹ നിശ്ചയം നടത്തിയ പതിനാറുകാരിയായ പെണ്‍കുട്ടിയെ 24കാരനായ പ്രതിശ്രുത വരന്‍ ബലാത്സംഗം ചെയ്ത് ഗര്‍ഭിണിയാക്കി. തെലങ്കാനയിലെ സങ്കാറെഡ്ഡി ജില്ലയിലാണ് സംഭവം. സംഭവത്തെ തുടര്‍ന്ന് യുവാവിനെതിരെ കേസെടുക്കുകയും പെണ്‍കുട്ടിയുടെ മാതാപിതാക്കളെ അറസ്റ്റ് ചെയ്യുകയും ചെയ്തു.

കുറച്ച് വര്‍ഷങ്ങള്‍ക്ക് മുമ്ബ് പെണ്‍കുട്ടിയുടെ അമ്മ മരിച്ചുപോയിരുന്നു. ഇതോടെ അച്ഛന്റെയും രണ്ടാനമ്മയുടെയും അവരുടെ കുട്ടികളുടെയും കൂടെയാണ് പെണ്‍കുട്ടി താമസിച്ചിരുന്നത്. പെണ്‍കുട്ടി പത്താം ക്ലാസ് പാസായതോടെ തുടര്‍ പഠനത്തിന് അയയ്ക്കാതെ നിര്‍ബന്ധപൂര്‍വ്വം ജൂണില്‍ വിവാഹ നിശ്ചയം നടത്തുകയായിരുന്നു.പ്രതിശ്രുത വരന്‍ പെണ്‍കുട്ടിയുടെ മാതാപിതാക്കളുടെ സമ്മതപ്രകാരം പെണ്‍കുട്ടിയെ കാണാനായി വീട്ടിലെത്തിയപ്പോഴാണ് ബലാത്സംഗം ചെയ്തത്. ഇത്തരത്തില്‍ മൂന്ന് തവണ പെണ്‍കുട്ടി ബലാത്സംഗത്തിനിരയായി. ഇതോടെ സഹികെട്ട പെണ്‍കുട്ടി വീടുവിട്ടിറങ്ങി. തുടര്‍ന്ന് വനിതാശിശുക്ഷേമ വകുപ്പിനെ ഹെല്‍പ്പ് ലൈന്‍ മുഖേന പരാതിപ്പെടുകയായിരുന്നു. മാതാപിതാക്കള്‍ തന്നെ ബലമായി വിവാഹം കഴിപ്പിക്കാന്‍ ശ്രമിക്കുന്നുവെന്ന് പെണ്‍കുട്ടി പരാതിപ്പെട്ടു. ഇതോടെ വനിതാശിശുക്ഷേമ വകുപ്പ് ഇടപെട്ട് പെണ്‍കുട്ടിയെ അഭയകേന്ദ്രത്തിലേക്ക് മാറ്റി.
ജില്ലാ വെല്‍ഫയര്‍ ഓഫീസര്‍ പെണ്‍കുട്ടിയെ സന്ദര്‍ശിക്കാനെത്തിയപ്പോള്‍ പെണ്‍കുട്ടിക്ഷീണിതയായി കാണപ്പെട്ടു. തുടര്‍ന്ന് പെണ്‍കുട്ടിയെ പരിശോധിക്കാന്‍ ഒരു ഡോക്ടറെ നിയോഗിച്ചു. ഡോക്ടര്‍ നടത്തിയ പരിശോധനയിലാണ് പെണ്‍കുട്ടി ഗര്‍ഭിണിയാണെന്ന് വ്യക്തമായത്.
തുടര്‍ന്ന് പെണ്‍കുട്ടിയെ കൗണ്‍സലിങ്ങിന് വിധേയമാക്കിയപ്പോഴാണ് പ്രതിശ്രുതവരന്‍മൂന്ന് തവണ ബലാത്സംഗം ചെയ്തതായി പെണ്‍കുട്ടി വെളിപ്പെടുത്തിയത്. ഇതോടെ പെണ്‍കുട്ടിയെ ഗര്‍ഭഛിദ്രത്തിന് വിധേയമാക്കി. ഭ്രൂണത്തിന്റെ സാംപിളുകള്‍ ഡിഎന്‍എ പരിശോധനയ്ക്ക് അയച്ചിട്ടുണ്ട്.