ടിക് ടോക് എല്ലാവരുടെയും ഒരു 'വീക്നെസ്'സായി മാറി കൊണ്ടിരിക്കുകയാണ്. എന്നാൽ ജോലിക്കിടയിൽ ടിക് ടോക് ചെയ്യുന്നതും ഒരു വീക്നെസ്സായി മാറി കൊണ്ടിരിക്കുന്നു എന്ന് മാത്രമല്ല മുട്ടൻ പണിയും അത്തരക്കാർക്കു കിട്ടി കൊണ്ടിരിക്കുന്നു. ഓഫീസ് ജോലിക്കിടെ ടിക് ടോക് ആപ്പില്‍ അഭിനയിച്ച സര്‍ക്കാര്‍ ഉദ്യോഗസ്ഥര്‍ക്ക് സ്ഥലംമാറ്റം കിട്ടിയിരിക്കുകയാണ്‌. തെലങ്കാനയിലാണ് സംഭവം. തെലങ്കാനയിലെ ഖമ്മം മുന്‍സിപ്പല്‍ കോര്‍പ്പറേഷനിലെ സര്‍ക്കാര്‍ ജീവനക്കാരാണ് ജോലിക്കിടയിൽ ടിക് ടോക്കില്‍ അഭിനയിച്ചത്. പിന്നാലെ സ്ഥല മാറ്റവും വന്നു.

സിനിമ പാട്ടുകൾക്കും ഡയലോഗുകൾക്കും അനുസരിച്ചായിരുന്നു അഭിനയം. വീഡിയോകളില്‍ പലതും സോഷ്യല്‍മീഡിയയില്‍ വൈറലായിട്ടുണ്ട്. ഇതിന് പിന്നാലെ സര്‍ക്കാര്‍ ഉദ്യോഗസ്ഥര്‍ ജോലി സമയത്ത് ടിക് ടോക്കില്‍ കളിച്ചിരിക്കുകയാണെന്ന വാർത്തകളും പുറത്തു വന്നു. ഇതേ തുടർന്ന് ജില്ലാ കളക്ടര്‍ ഇടപെട്ട് സ്ഥലംമാറ്റ നടപടിക്ക് പുറമെ ഇവരുടെ വേതനം വെട്ടിക്കുറക്കാനും ഉത്തരവിട്ടു. ഇവർക്കെതിരെയും ഇവരെ അനുകൂലിച്ചും പ്രതികരണങ്ങൾ സോഷ്യൽ മീഡിയ വഴി വരുന്നുണ്ട്. ഭുവനേശ്വറിൽ ആശുപത്രി ഡ്യൂട്ടിക്കിടെ ടിക് ടോക് വീഡിയോ ചിത്രീകരിച്ച നഴ്‌സുമാര്‍ക്ക് ആരോഗ്യവകുപ്പിന്റെ നടപടി നേരിടേണ്ടി വന്നിരിന്നു. ഈ സംഭവത്തിന് പിന്നാലെയാണ് സർക്കാർ ഉദ്യോഗസ്ഥരുടെ ടിക് ടോക് വാർത്ത പുറത്തു വരുന്നത്.