ജനങ്ങൾ കൂടുതലായി ഉപയോഗിക്കുന്ന സാമൂഹിക മാധ്യമമായ ഇന്‍സ്റ്റാഗ്രാമില്‍ ഗുരുതരമായ സുരക്ഷാ വീഴ്ച കണ്ടെത്തിയ യുവാവിന് 20 ലക്ഷം രൂപ സമ്മാനം. തമിഴ്നാട് സ്വദേശിയായ ലക്ഷ്മണ്‍ മുത്തയ്യക്കാണ് 20 ലക്ഷം സമാനമായി ലഭിച്ചത്. ലക്ഷ്മണിൻറെ ഈ കണ്ടെത്തൽ വ്യക്തികളുടെ അനുവാദമില്ലാതെ പാസ്‍വേഡ് ഹാക്ക് ചെയ്യുന്നതും, ഇന്‍സ്റ്റാഗ്രാം അക്കൗണ്ടുകളില്‍ നിന്ന് വിവരങ്ങള്‍ ചോര്‍ത്തുന്നതുമൊക്കെ തടസ്സപ്പെടുത്തിയിരിക്കുകയാണ്. ലക്ഷ്മണ്‍ മുത്തയ്യ സുരക്ഷാ ഗവേഷകനാണ്.

സുരക്ഷാ വീഴ്ചയുണ്ടെന്നു മുത്തയ്യ ഫേസ്ബുക്കിന്‍റെ സുരക്ഷാ സംഘത്തെ ബോധ്യപ്പെടുത്തുകയായിരുന്നു . ഇന്‍സ്റ്റാഗ്രാമിലെ ഈ പിഴവ് കണ്ടെത്തിയതിന് 30,000 യുഎസ് ഡോളറാണ് നൽകിയത്. അതായത് ഇന്ത്യയിൽ 20,64,645 രൂപ. ഇന്‍സ്റ്റാഗ്രാം അധികൃതരാണ് പ്രതിഫലം മുത്തയ്യക്ക് കൈ മാറിയത്. പാസ്‍വേഡ് റീസെറ്റ് ചെയ്യുമ്പോൾ ഒരു റിക്കവറി കോഡ് ആവശ്യപ്പെടാറുണ്ട്. അതിനെ ഉപയോഗിച്ച്‌കൊണ്ടുള്ള അക്കൗണ്ട് ഹാക്കിങ്ങിനുള്ള സാധ്യതയാണ് ഒഴിവാക്കപ്പെട്ടിരിക്കുന്നത് . ഫേസ്ബുക്ക് ബഗ് ബൗണ്ടി പ്രോഗ്രാമിന്‍റെ ഭാഗമായി നേരത്തെയും ഇത്തരം സുരക്ഷാപ്രശ്നങ്ങളും സാങ്കേതിക തകരാറുകളും മുത്തയ്യ ഫേസ്ബുക്കിനെ ബോധ്യപ്പെടുത്തിയിരുന്നു.

ഉപയോക്താക്കളുടെ അറിവോടെയല്ലാതെ പാസ്‍വേഡ് റീസെറ്റ് സന്ദേശം, അക്കൗണ്ട് റിക്കവറി കോഡ് എന്നിവ എസ്‌എംഎസ് സന്ദേശമായി കിട്ടുകയാണെങ്കില്‍ അതിനു പിന്നിൽ ഹാക്കര്‍മാരാണ് എന്ന് ഇന്‍സ്റ്റാഗ്രാം ഉപയോക്താക്കള്‍ ഉറപ്പായും അറിയണമെന്ന മുന്നറിയിപ്പുണ്ട്. ഇത്തരം സന്ദര്‍ഭങ്ങളില്‍ ഈ വിവരം ഉടന്‍ തന്നെ ഇന്‍സ്റ്റാഗ്രാമിനെ അറിയിക്കേണ്ട ബാധ്യസ്ഥതയും ഇന്‍സ്റ്റാഗ്രാം ഉപയോഗിക്കുന്നവർക്ക് ഉണ്ട്.