ചന്ദ്രയാന്‍-2 വിക്ഷേപണത്തിനുള്ള ഒരുക്കങ്ങള്‍ ശ്രീഹരിക്കോട്ടയില്‍ തകൃതിയില്‍. തിങ്കളാഴ്ച ഉച്ച തിരിഞ്ഞ് 2.43നാണ് വിക്ഷേപണം. കഴിഞ്ഞ തിങ്കളാഴ്ച പുലര്‍ച്ചെ നടക്കേണ്ടിയിരുന്ന വിക്ഷേപണം സാങ്കേതിക കാരണങ്ങളെ തുടര്‍ന്ന് മാറ്റി വയ്ക്കുകയായിരുന്നു. ജിഎസ്എല്‍വി മാര്‍ക്ക് ത്രീയുടെ പ്രശ്‌നങ്ങള്‍ പരിഹരിച്ച് വിക്ഷേപണം ഈ തിങ്കളാഴ്ച നടത്താന്‍ തീരുമാനിക്കുകയായിരുന്നു. വിക്ഷേപണത്തിന് മുന്നോടിയായുള്ള കൗണ്ട്ഡൗണ്‍ നാളെ തുടങ്ങും. ജിഎസ്എല്‍വി മാര്‍ക്ക് ത്രീയുടെ ക്രയോജനിക് ഘട്ടത്തിലുണ്ടായ ചോര്‍ച്ചയാണ് തിങ്കളാഴ്ച രാവിലെ 2.51 നടക്കേണ്ടിയിരുന്ന വിക്ഷേപണം മാറ്റിവയ്ക്കാന്‍ കാരണം. 2 മണിക്കൂറും 24 സെക്കന്റും ബാക്കി നില്‍ക്കെയാണ് കൗണ്ട് ഡൗണ്‍ നിര്‍ത്തിയത്.
കൗണ്ട് ഡൗണ്‍ നിര്‍ത്തിയതിന് പിനന്നാലെ തന്നെ പരിശോധന തുടങ്ങി പ്രശ്‌നം കണ്ടെത്താന്‍ കഴിഞ്ഞു. ഇത് പെട്ടെന്ന് പരിഹരിക്കാന്‍ കഴിഞ്ഞതാണ് വിക്ഷേപണം കൂടുതല്‍ താമസിക്കാതെ നടത്താന്‍ സഹായകമായത്. ചോര്‍ച്ച ഗുരതരമായിരുന്നെങ്കില്‍ റോക്കറ്റ് ലോഞ്ച് പാഡില്‍ നിന്ന് നീക്കി പരിശോധിക്കേണ്ടി വന്നേനെ. റോക്കറ്റിന്റെ വിവിധ ഘട്ടങ്ങള്‍ അഴിച്ചു നടത്തുന്ന പരിശോധന വിക്ഷേപണം വീണ്ടും വൈകാനും കാരണമായേനെ. ഈ മാസം തന്നെ വിക്ഷേപണം നടത്താനുള്ള തീവ്രശ്രമത്തിലായിരുന്നു ഐഎസ്ആര്‍ഒ.