ഉത്തരാഖണ്ഡില്‍ നിന്നും കാണാതായ പെണ്‍കുട്ടിയെ 18 ദിവസങ്ങള്‍ക്കു ശേഷം ഡല്‍ഹിയില്‍ നിന്നും കണ്ടെത്തി. ജൂലൈ ഒന്നിനാണ് കുട്ടിയെ കാണാതായത്. ടാക്‌സി ഡ്രൈവര്‍-2 എന്ന ഗെയിമിന് അടിമയായിരുന്ന പെണ്‍കുട്ടി പതിനേഴ് ദിവസങ്ങള്‍ കൊണ്ട് ഏഴ് നഗരങ്ങളിലൂടെയാണ് സഞ്ചരിച്ചത്. ഈ ഗെയിമിലെ എല്ലാഘട്ടങ്ങളും കുട്ടി വിജയിച്ചിരുന്നു. അതുകൊണ്ട് തന്നെ എല്ലാ നഗരങ്ങളിലും സഞ്ചരിക്കുന്ന ഒരു ടാക്‌സി ഡ്രൈവറാകാന്‍ തീരുമാനിക്കുകയായിരുന്നു.

ഈ ഗെയിമില്‍ ടാക്‌സിഡ്രൈവര്‍ യാത്രക്കാരുമായി വളരെ അപകടം പിടിച്ച വഴികളിലൂടെ സഞ്ചരിച്ച് യാത്രക്കാരെ എത്തേണ്ട സ്ഥലത്ത് എത്തിക്കുന്നു. ഇതുപോലുള്ള ഒരു ടാക്‌സി ഡ്രൈവറാകാനാണ് ഈ പെണ്‍കുട്ടി ജീവിതത്തിലും ശ്രമിച്ചത് എന്നാണ് പോലീസ് പറയുന്നത്.

ജുലൈ ഒന്നിന് പന്ത്‌നഗറില്‍ നിന്നുമാണ് പെണ്‍കുട്ടിയെ കാണാതായത്. 12000 രൂപ വീട്ടില്‍ നിന്നും മോഷ്ടിച്ചുകൊണ്ടാണ് പെണ്‍കുട്ടി വീട്ടില്‍ നിന്ന് ഇറങ്ങിയത്. ആദ്യം ഉത്തരാഖണ്ഡിലെ കിച്ചാ നഗരത്തിലേക്ക് പുറപ്പെട്ടു. അവിടെ നിന്ന് ഉത്തര്‍ പ്രദേശിലെ ബറെയ്ലിയിലേക്ക് ബസ് മാര്‍ഗം യാത്ര തിരിച്ചു. അവിടെനിന്ന് ലക്‌നൌവിലേക്കും ജയ്പൂരിലേക്കും പോയി. പിന്നീട് ഉദൈപൂര്‍, ജോദ്പൂര്‍, അഹമ്മദാബാദ്, പൂനെ എന്നിവിടങ്ങളിലുമെത്തി.

പിന്നീട് പൂനെയില്‍ നിന്ന് ജയ്പൂരിലെത്തിയ കുട്ടി അവിടെ നിന്നാണ് ഡല്‍ഹിയിലേയ്ക്ക് പോയത്. ഡല്‍ഹിയില്‍ നിന്ന് റിഷികേശ് യാത്ര നടത്തിയതിനു ശേഷം തിരികെ ഡല്‍ഹിയില്‍ എത്തിയപ്പോഴാണ് പെണ്‍കുട്ടിയെ പോലീസ് പിടികൂടുന്നത്. പെണ്‍കുട്ടിയെ കാണാനില്ലെന്ന് മാതാപിതാക്കള്‍ പോലീസില്‍ പരാതി നല്‍കിയിരുന്നു. ജയ്പൂരില്‍ വെച്ച് ടിക്കറ്റ് ബുക്ക് ചെയ്തപ്പോള്‍ സഹോദരന്റെ ഇ-മെയെില്‍ ഐഡിയാണ് പെണ്‍കുട്ടി നല്‍കിയത്. തുടര്‍ന്ന് പോലീസ് പെണ്‍കുട്ടി ജയ്പൂരില്‍ ഉണ്ടെന്ന് കണ്ടെത്തി. എന്നാല്‍ പോലീസ് അവിടെ എത്തിപ്പോഴേക്കും പെണ്‍കുട്ടി അടുത്ത സ്ഥലത്തേക്ക് പോയിരുന്നു.

തിരിച്ചറിയല്‍ കാര്‍ഡ് ഇല്ലാത്തതിനാല്‍ ഹോട്ടല്‍ മുറികളില്‍ റൂം ലഭിച്ചില്ല. അതിനാല്‍ രാത്രി സ്ലീപ്പര്‍ ബസുകളില്‍ യാത്ര ചെയ്താണ് പെണ്‍കുട്ടി ഉറങ്ങിയിരുന്നത്. ചിപ്പ്‌സ്, ബിസ്‌കറ്റ്, വെള്ളം എന്നിവ കഴിച്ച് വിശപ്പടക്കി. പതിനെട്ട് ദിവസത്തിനിടെ ഒരിക്കല്‍പ്പോലും കുളിച്ചില്ലെന്ന് പെണ്‍കുട്ടി പറഞ്ഞു. എന്തായാലും സംഭവം അറിഞ്ഞ് നിരവധി മാതാപിതാക്കളാണ് സോഷ്യല്‍ മീഡിയയിലൂടെ ഞെട്ടല്‍ രേഖപ്പെടുത്തിയിരിക്കുന്നത്.