കൂടംകുളം ആണവ നിലയം കമ്മീഷന് ചെയ്യുന്നത് വീണ്ടും നീട്ടിവെച്ചു
കൂടംങ്കുളം ആണവനിലയം കമ്മീഷന് ചെയ്യുന്നത് ഒരു മാസത്തേക്ക് നീട്ടിവെച്ചു. ആണവനിലയത്തിന്റെ ആദ്യ യൂണിറ്റ് ഈ മാസം കമ്മീഷന് ചെയ്യാനിരുന്നു ന്യൂക്ലിയര് പവര് കോര്പറേഷന് ഓഫ് ഇന്ത്യ (എന്.പി.സി.ഐ.എല്)തീരുമാനിച്ചിരുന്നത്. എന്നാല് സുപ്രീം കോടതി നിര്ദ്ദേശിച്ച മാനദണ്ഡങ്ങള് പാലിക്കാന് ഇതുവരെ സാധിക്കാത്തതിനാല് കമ്മീഷന് ചെയ്യുന്നത് നീട്ടിവെക്കുകയായിരുന്നു.
മെയ് ആറിനാണ് ആണവ നിലയം കമ്മീഷന് ചെയ്യുന്നതിന് സുപ്രീം കോടതിയുടെ അനുമതി ലഭിച്ചത്. എന്നാല് പരിസ്ഥിതി പ്രശ്നങ്ങളും, സുരക്ഷയും മുന് നിര്ത്തി 15 മാനദണ്ഡങ്ങള് സുപ്രീം കോടതി നിര്ദേശിച്ചിരുന്നു. കൂടാതെ ആണവ നിലയം പ്രവര്ത്തനം തുടങ്ങുന്നതിനു മുന്പ് ഇതിന്റെ റിപ്പോര്ട്ട് കോടതിയില് സമര്പ്പിക്കണമെന്നും കോടതി ആവശ്യപ്പെടുകയുണ്ടായി.
റഷ്യയുടെ സഹകരണത്തോടെ തമിഴ്നാട്ടില് തിരുനെല്വേലി ജില്ലയിലെ കൂടംങ്കുളത്ത് 1000 മെഗാവാട്ടിന്റെ രണ്ടു ആണവനിലയങ്ങളാണ് എന്.പി.സി.ഐ.എല് നിര്മ്മിക്കുന്നത്. ആണവനിലയത്തിനെതിരെ ഉയര്ന്നിരിക്കുന്ന ശക്തമായ ജനരോഷത്തെ മറികടന്നു നിര്മാണ പ്രവര്ത്തനങ്ങളുമായി എന്.പി.സി.ഐ.എല് മുന്നോട്ടു പോവുകയായിരുന്നു.
എന്നാല് കൂടംകുളം ആണവ നിലയം കമ്മീഷന് ചെയ്യുന്നതില് ആശങ്ക പ്രകടിപ്പിച്ച് രാജ്യത്തെ പ്രമുഖ ശാസ്ത്ര സ്ഥാപനങ്ങളിലെ ശാസ്ത്രജ്ഞര് പ്രധാന മന്ത്രിക്ക് കത്തെഴുതിയിരുന്നു. കൂടംകുളത്ത് ഉപയോഗിക്കുന്ന യന്ത്രസാമഗ്രികള് നിലവാരമില്ലാത്തവയാണെന്ന റിപ്പോര്ട്ടുകളുടെ പശ്ചാത്തലത്തില് നിലയം കമ്മീഷന് ചെയ്യുന്നതിലുള്ള തങ്ങളുടെ ആശങ്കകളാണ് ശാസ്ത്രജ്ഞര് കത്തില് ചൂണ്ടിക്കാട്ടിയിരുന്നത്. കേരള-തമിഴ്നാട് മുഖ്യമന്ത്രിമാര്ക്കും ശാസ്ത്രജ്ഞര് കത്തെഴുതിയിരുന്നു.
https://www.facebook.com/Malayalivartha
