സഹോദരിയുടെ ഭര്‍ത്താവിനെ സ്വന്തമാക്കാനായി ഗര്‍ഭിണിയായിരുന്ന ചേച്ചിയെ കൊലപ്പെടുത്തി പത്തൊമ്പത്കാരിയായ അനിയത്തി. മദ്ധ്യപ്രദേശിലെ ജബല്‍പൂരിലാണ് സംഭവം നടന്നത്. ശതാഷി രജ്പുതാണ് ചേച്ചി അഭിലാഷയെ കത്തി ഉപയോഗിച്ച് കുത്തി കൊലപ്പെടുത്തിയത്. 

ചേച്ചിയെ ഇല്ലായ്മ ചെയ്യാന്‍ തക്കം പാര്‍ത്തിരുന്ന അനിയത്തി ശതാഷി, അഭിലാഷ ടോയ്‌ലറ്റില്‍ പോയപ്പോള്‍ പിറകില്‍ നിന്നും എത്തി കത്തിവച്ച് കുത്തുകയായിരുന്നു. അഭിലാഷയുടെ കഴുത്തിലും വയറ്റിലുമാണ് ശതാഷി കത്തി കുത്തിയിറക്കിയത്. അഭിലാഷ കുത്തുകൊണ്ട് താഴെ വീണ് നിലവിളിച്ചപ്പോള്‍ അയല്‍വാസികള്‍ ഓടിയെത്തി. ഉടന്‍ തന്നെ ഇവരെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാന്‍ ആയില്ല. കൊല്ലപ്പെടുമ്പോള്‍ അഭിലാഷ ഏഴ് മാസം ഗര്‍ഭിണിയായിരുന്നു.

അഭിലാഷയ്ക്ക് അസുഖം ബാധിച്ചപ്പോള്‍ ശുശ്രൂഷിക്കാനാണ് ശതാഷി ഇവരുടെ വീട്ടില്‍ എത്തിയത്. തുടര്‍ന്ന് അന്മോലുമായി അനിയത്തി ബന്ധം സ്ഥാപിക്കുകയായിരുന്നു. ഈ വിവരം അറിഞ്ഞ് അനിയത്തിയോട് വീട്ടില്‍ നിന്നും മാറി താമസിക്കാന്‍ അഭിലാഷ ആവശ്യപെട്ടിരുന്നു. അന്മോലും ഇതേ കാര്യം ശതാഷിയോട് ആവശ്യപെട്ടിരുന്നു. ഇതിന് മുന്‍പും മൂന്ന് തവണ ശതാഷി തന്റെ ചേച്ചിയെ കൊലപ്പെടുത്താന്‍ ശ്രമിച്ചിരുന്നു.
കുത്തിയ ശേഷം മുഖം തുണി കൊണ്ട് മറച്ചായിരുന്നു ശതാഷി വീട്ടില്‍ നിന്നും പുറത്തുവന്നത്. അഭിലാഷയെ കുത്തിവീഴ്ത്തിയ ശേഷം ഓടി രക്ഷപ്പെടാന്‍ ശതാഷി ശ്രമിച്ചുവെങ്കിലും നാട്ടുകാര്‍ പിടികൂടി പൊലീസില്‍ ഏല്‍പ്പിക്കുകയായിരുന്നു. ചേച്ചിയുടെ ഭര്‍ത്താവിനൊപ്പം കഴിയാന്‍ വേണ്ടിയാണ് താന്‍ ചേച്ചിയെ കൊലപ്പെടുത്തിയതെന്ന് ശതാഷി പൊലീസിന്റെ ചോദ്യം ചെയ്യലില്‍ സമ്മതിച്ചിട്ടുണ്ട്. ശതാഷി അഭിലാഷയെ കൊല്ലാന്‍ ഉപയോഗിച്ച കത്തി പൊലീസ് ഇവരുടെ വീട്ടില്‍ നിന്നും കണ്ടെടുത്തു. ശേഷം ശതാഷിയെ പൊലീസ് കോടതിയില്‍ ഹാജരാക്കി.