ബിജെപി നേതാവും മുന്‍ കേന്ദ്രമന്ത്രിയുമായ സ്വാമി ചിന്മായനന്ദിനെ യുപിയില്‍ നിയമവിദ്യാര്‍ഥിനിയെ പീഡിപ്പിച്ചെന്ന കേസില്‍ ഷാജഹാന്‍പുരില്‍ ആശ്രമത്തില്‍നിന്നും അറസ്റ്റു ചെയ്തു.

ലൈംഗിക പീഡനാരോപണം ഉന്നയിച്ച പെണ്‍കുട്ടി തെളിവായി 43 വിഡിയോ ദൃശ്യങ്ങള്‍ അടങ്ങിയ പെന്‍ഡ്രൈവ് പ്രത്യേക അന്വേഷണ സംഘത്തിനു കൈമാറിയതിനെ തുടര്‍ന്ന് പ്രത്യേക അന്വേഷണ സംഘമാണ് അറസ്റ്റ് ചെയ്തത്. ഫൊറന്‍സിക് വിദഗ്ധരുടെ സഹായത്തോടെ ചിന്മയാനന്ദിന്റെ കിടപ്പറ പരിശോധിച്ച സംഘം അവിടെ നിന്നു തെളിവുകള്‍ ശേഖരിച്ച ശേഷം മുറി പൂട്ടി മുദ്രവച്ചു.

ചിന്മയാനന്ദിന്റെ കോളജിലെ പിജി വിദ്യാര്‍ഥിനിയായിരുന്ന പെണ്‍കുട്ടിയോടൊപ്പമാണ് തെളിവെടുപ്പിനു സംഘം എത്തിയത്. തിരുമ്മുന്നതിനുള്ള എണ്ണ വച്ചിരുന്ന രണ്ടു പാത്രങ്ങളും ചിന്മയാനന്ദ് ഉപയോഗിച്ചിരുന്ന ടവല്‍, ടൂത്ത്‌പേസ്റ്റ്, സോപ്പ് എന്നിവയും തെളിവായി ശേഖരിച്ചു. കിടപ്പറയില്‍ നിന്ന് പ്രധാന തെളിവുകളെല്ലാം നീക്കിയെന്നും പഴയ പെയിന്റിങ് അടക്കം എല്ലാം മാറ്റി മുറി പുതുക്കിയെന്നും പെണ്‍കുട്ടി പറഞ്ഞു. ചിന്മയാനന്ദിനെ കഴിഞ്ഞ ദിവസം മണിക്കൂറുകളോളം ചോദ്യം ചെയ്തിരുന്നു. ഇദ്ദേഹത്തിന്റെ അറസ്റ്റ് വൈകുന്നതിനെ കോണ്‍ഗ്രസ് ഉള്‍പ്പെടെയുള്ള പ്രതിപക്ഷ പാര്‍ട്ടികള്‍ വിമര്‍ശിച്ചിരുന്നു.

തന്നോടൊപ്പം പീഡനത്തിനിരയായ മറ്റൊരു വിദ്യാര്‍ഥിനിയുടെ വിവരവും സംഘത്തെ അറിയിച്ചിട്ടുണ്ടെന്നും ഡല്‍ഹി പൊലീസിനു നല്‍കിയ പരാതിയില്‍ ഈ വിവരം ചേര്‍ത്തിട്ടുണ്ടെന്നും പെണ്‍കുട്ടി പറഞ്ഞു. എല്‍എല്‍എം കോഴ്‌സില്‍ പ്രവേശനം ലഭിച്ചതിനെ തുടര്‍ന്നു ചിന്മയാനന്ദിന്റെ ആള്‍ക്കാര്‍ അയാളുടെ വീട്ടിലേക്ക് വിളിപ്പിച്ചെന്നും പിന്നീട്, താന്‍ കുളിക്കുന്ന വിഡിയോ ചിന്മയാനന്ദ് കാണിച്ചെന്നും തുടര്‍ന്നാണു പീഡനം പതിവാക്കിയതെന്നും പെണ്‍കുട്ടി മൊഴി നല്‍കി.

ഒരു വര്‍ഷമായി ചിന്മയാനന്ദ് (72) പീഡിപ്പിച്ചു വരികയാണെന്ന ആരോപണം ഡല്‍ഹിയില്‍ മാധ്യമപ്രവര്‍ത്തകരുടെ മുന്നിലും പെണ്‍കുട്ടി ആവര്‍ത്തിച്ചു. കറുത്ത സ്‌കാര്‍ഫ് കൊണ്ടു മുഖം മറച്ചു മാധ്യമങ്ങള്‍ക്കു മുന്നില്‍ പ്രത്യക്ഷപ്പെട്ട പെണ്‍കുട്ടി, സുപ്രീം കോടതിയുടെ നിര്‍ദേശപ്രകാരം രൂപീകരിച്ച പ്രത്യേക അന്വേഷണസംഘം തന്നെ 11 മണിക്കൂര്‍ ചോദ്യം ചെയ്‌തെന്നും എല്ലാ വിവരവും കൈമാറിയിട്ടും ചിന്മയാനന്ദിനെ അവര്‍ അറസ്റ്റ് ചെയ്തിട്ടില്ലെന്നും ആരോപിച്ചിരുന്നു.

പെണ്‍കുട്ടി അഞ്ചു കോടി രൂപ ആവശ്യപ്പെട്ടെന്നു പറഞ്ഞു ചിന്മയാനന്ദിന്റെ അഭിഭാഷകര്‍ കേസ് കൊടുത്തിട്ടുണ്ട്. ഈ ആരോപണം കളവാണെന്നും പീഡനം സംബന്ധിച്ച് പിതാവ് ഷാജഹാന്‍പുര്‍ പൊലീസിനു പരാതി നല്‍കിയപ്പോള്‍ ജില്ലാ മജിസ്‌ട്രേട്ട് ഭീഷണിപ്പെടുത്തിയെന്നും ആളെ കാണാതായെന്നുള്ള പരാതി നല്‍കാന്‍ നിര്‍ദേശിക്കുകയുമാണ് ചെയ്തതെന്നും പെണ്‍കുട്ടി പറഞ്ഞു.

സുപ്രീം കോടതി സ്വയമേവ കേസെടുത്തതിനെ തുടര്‍ന്നാണ് ഐജി നവീന്‍ അറോറയുടെ നേതൃത്വത്തില്‍ പ്രത്യേക പൊലീസ് സംഘത്തെ യുപി സര്‍ക്കാര്‍ നിയോഗിച്ചത്. അലഹാബാദ് ഹൈക്കോടതിക്കാണ് കേസിന്റെ മേല്‍നോട്ടം. സമൂഹമാധ്യമത്തിലൂടെ പരാതി വെളിപ്പെടുത്തിയ ശേഷം കഴിഞ്ഞ 24-ന് പെണ്‍കുട്ടി അപ്രത്യക്ഷയാവുകയായിരുന്നു. 30-ന് രാജസ്ഥാനില്‍ കണ്ടെത്തി. പിതാവിന്റെ പരാതിപ്രകാരം ചിന്മയാനന്ദിനെതിരെ 27-ന് പൊലീസ് കേസെടുത്തു.