പ്രധാന മന്ത്രി നരേന്ദ്ര മോദി മുന്നോട്ട് വയ്ക്കുന്ന ചലഞ്ചുകൾ നമ്മെ അമ്പരിപ്പിക്കാറുണ്ട്. ഫിറ്റ്നസ് ചലഞ്ച്‌ അടക്കമുള്ളവ ഇതിനോടകം തന്നെ പ്രസിദ്ധമായി കഴിഞ്ഞു. ഇപ്പോൾ ഇതാ രാഷ്ട്രപിതാവ്‌ മഹാത്മാഗാന്ധിയുടെ നൂറ്റിയന്‍പതാം ജന്മവാര്‍ഷിക ദിനത്തില്‍ ഐന്‍സ്റ്റീന്‍ ചലഞ്ച് മുന്നോട്ടുവെച്ചിരിക്കുകയാണ് പ്രധാനമന്ത്രി.

ഗാന്ധിയോടുള്ള സ്മരണാർത്ഥമാണ് ഐന്‍സ്റ്റീന്‍ ചലഞ്ച് നിര്‍ദേശിക്കുന്നതെന്നദ്ദേഹം പറഞ്ഞു. ഭാവി തലമുറ ഗാന്ധിയുടെ ആദര്‍ശങ്ങള്‍ ഓര്‍ത്തിരിക്കാൻ എന്നത്‌ ഉറപ്പു വരുത്താനാണ് ഈ നീക്കം. ഗാന്ധിയുടെ ആദര്‍ശവും ആശയവും പുതിയ രീതിയില്‍ പ്രചരിപ്പിക്കാന്‍ ചിന്തിക്കുന്നവർക്കും സംരംഭകർക്കും സാങ്കേതിക വിദഗ്ധർക്കും ഈ ചലഞ്ചിൽ പങ്കെടുക്കാമെന്നാണ് പ്രധാനമന്ത്രി നരേന്ദ്ര മോദിയുടെ വീക്ഷണം. ദണ്ഡി യാത്രയെ കുറിച്ചും മോദി പ്രതിപാദിക്കുകയുണ്ടായി. ഒരു നുള്ള് ഉപ്പ് കൊണ്ട് ഒരു മഹാപ്രക്ഷോഭം സംഘടിപ്പിക്കാന്‍ ആര്‍ക്കു കഴിയും എന്നായിരുന്നു അദ്ദേഹം പറഞ്ഞത്. രാജ്യത്തെ നയിക്കുന്ന ഒരു മികച്ച അധ്യാപകനാണ് ഗാന്ധിയെന്നും നരേന്ദ്ര മോദി അഭിപ്രായപ്പെട്ടിരിക്കുന്നു.