പുണെയില്‍ ബിസിനസ് നടത്തുന്ന ചെങ്ങന്നൂര്‍ എണ്ണയ്ക്കാട് കുറ്റിയില്‍ രവികുമാര്‍ നായരെ (ആര്‍.കെ.നായര്‍ - 49), ക്ഷേത്രദര്‍ശനത്തിനെത്തുന്ന വയോധികരെ കബളിപ്പിച്ചു സ്വര്‍ണം അപഹരിച്ചതിന് അറസ്റ്റു ചെയ്തു. സ്‌കൂട്ടറിലെത്തി വഴുവാടിയില്‍ വയോധികയുടെ മാല പൊട്ടിച്ചെടുത്ത കേസിലാണ് അറസ്റ്റ്.

സ്വര്‍ണാഭരണങ്ങള്‍ ധരിച്ചു നടക്കുന്ന ശീലമുണ്ടായിരുന്ന രവികുമാര്‍ ഒരുവര്‍ഷം മുന്‍പ് ബിസിനസ് നഷ്ടത്തിലായതോടെയാണ് തട്ടിപ്പു തുടങ്ങിയത്. നാട്ടില്‍ എത്തിയാല്‍ ദിവസവും മാവേലിക്കര, ചെങ്ങന്നൂര്‍, കാര്‍ത്തികപ്പള്ളി താലൂക്കുകളിലെ ക്ഷേത്രങ്ങളില്‍ പതിവായി ദര്‍ശനം നടത്തും.

ഇതിനിടെ ഇയാള്‍ ക്ഷേത്ര പരിസരത്ത് ഒറ്റയ്ക്കു കാണുന്ന പ്രായമുള്ള സ്ത്രീകളെ പരിചയപ്പെടും. യുഎസില്‍ വലിയ ജോലിയുള്ള ആളാണെന്നും മകളുടെ ജോലി സംബന്ധിച്ചു സ്വര്‍ണമാല വഴിപാട് നല്‍കാമെന്നു പറഞ്ഞിട്ടുണ്ടെന്നും കൈവശം ഉള്ളത് 10 പവന്റെ മാലയാണെന്നും പറഞ്ഞു വിശ്വസിപ്പിക്കും. തുടര്‍ന്നു കൈവശമുള്ള മുക്കുപണ്ടം നല്‍കിയ ശേഷം സ്ത്രീകളുടെ ചെറിയ മാല തന്ത്രത്തില്‍ ഊരി വാങ്ങി മുങ്ങുന്നതായിരുന്നു തട്ടിപ്പുരീതി.

വിമാനത്തില്‍ എത്തി 2 ഇടങ്ങളില്‍ തട്ടിപ്പ് നടത്തിയ ശേഷം സ്വര്‍ണം വിറ്റു പണവുമായി വിമാനത്തില്‍തന്നെ പുണെയിലേക്കു മടങ്ങുന്നതായിരുന്നു പതിവ്. കഴിഞ്ഞ സെപ്റ്റംബര്‍ 1-ന് രാവിലെ വഴുവാടി വായനശാലയ്ക്കു സമീപത്തുവച്ച് വീട്ടമ്മയുടെ രണ്ടര പവന്റെ മാല ബലമായി പൊട്ടിച്ചെടുത്തതാണ് ഇയാള്‍ കുടുങ്ങാന്‍ കാരണമായത്. ക്യാമറ ദൃശ്യങ്ങളുടെ സഹായത്തോടെയാണ് പ്രതിയെ കുടുക്കിയത്.

വഴുവാടിയിലെ മോഷണത്തിനു ശേഷം പുണെയിലേക്കു പോയ ഇയാള്‍ 4 ദിവസം മുന്‍പാണ് നാട്ടിലെത്തിയത്. മാന്നാറില്‍ 6, മാവേലിക്കര 3, ചെങ്ങന്നൂരില്‍ 1 വീതം തട്ടിപ്പുകള്‍ പ്രതി നടത്തിയിട്ടുണ്ടെന്നും തട്ടിയെടുത്ത 12 പവന്‍ ചെങ്ങന്നൂരിലെ ഒരു സ്വര്‍ണാഭരണശാലയില്‍ നിന്നു കണ്ടെടുത്തതായും സിഐ പി.ശ്രീകുമാര്‍ പറഞ്ഞു.

എസ്‌ഐ എസ്.പ്രദീപ്, എഎസ്‌ഐ അരുണ്‍കുമാര്‍, സീനിയര്‍ സിവില്‍ പൊലീസ് ഓഫിസര്‍മാരായ ജി.സുനിമോന്‍, സിനു വര്‍ഗീസ്, സിവില്‍ പൊലീസ് ഓഫിസര്‍മാരായ ജി. ഉണ്ണിക്കൃഷ്ണപിള്ള, ഐ.ഷെഫീഖ്, അരുണ്‍ ഭാസ്‌കര്‍, ജി.ഗോപകുമാര്‍ എന്നിവരുടെ നേതൃത്വത്തിലുള്ള സംഘമാണ് പിടികൂടിയത്.