ഭീകരാക്രമണ ഭീഷണിയെ തുടര്‍ന്ന് രാജ്യത്തെ വിമാനത്താവളങ്ങളില്‍ ജാഗ്രതാ നിര്‍ദ്ദേശം നല്‍കി. ഭീകരസംഘടനയായ ജയ്‌ശെ മുഹമ്മദ് സംഘാംഗങ്ങളായ നാലോളം പേര്‍ നഗരത്തില്‍ തമ്പടിക്കുന്നെന്ന രഹസ്യാന്വേഷണ വിഭാഗത്തില്‍നിന്ന് ലഭിച്ച വിവരത്തിന്റെ അടിസ്ഥാനത്തില്‍ തലസ്ഥാന നഗരിയായ ന്യൂഡല്‍ഹി കനത്തസുരക്ഷയിലാണ്. രാജ്യാന്തര-ആഭ്യന്തര വിമാനത്താവളങ്ങളിലുള്‍പ്പെടെ സുരക്ഷ ശക്തമാക്കിയിട്ടുണ്ട്.

ശക്തമായ സേനാവിന്യാസത്തിനു പുറമെ, ഡല്‍ഹി പൊലീസിന്റെ പ്രത്യേക വിഭാഗം വിവിധ കേന്ദ്രങ്ങളിലും വാണിജ്യ-വ്യാപാര ഇടങ്ങളിലും ഹോട്ടലുകളിലും പരിശോധന നടത്തി. ദുര്‍ഗ പൂജ, രാംലീല ആഘോഷങ്ങള്‍ക്കായി നഗരം ഒരുങ്ങുന്നതിനിടെയാണ് ഭീകരാക്രമണ ഭീഷണി.