എയര്‍ ഇന്ത്യ വിമാനത്തില്‍ എന്‍.സി.പി എം.പിക്ക് നല്‍കിയ ഭക്ഷണത്തില്‍ മുട്ടത്തോട്. എം.പി വന്ദന ചവാന് നല്‍കിയ ഓംലെറ്റിൽ മുട്ടത്തോട് കണ്ടെത്തുകയായിരുന്നു. എം.പി നൽകിയ പരാതിയില്‍ കാറ്ററിംഗ് കമ്പനിക്കെതിരെ എയര്‍ ഇന്ത്യ പിഴ ചുമത്തുകയുണ്ടായി . പൂനെ-ഡല്‍ഹി എയര്‍ ഇന്ത്യ വിമാനത്തിൽ കഴിഞ്ഞ ആഴ്ചയാണ് സംഭവം നടന്നത്.

''എം.പി നൽകിയ പരാതിയെ എയര്‍ ഇന്ത്യ ഗൗരവമായിട്ടാണ് എടുത്തത്. കാറ്ററിംഗ് കമ്പനി അന്ന് നല്‍കിയ മുഴുവന്‍ ആഹാരത്തിന്റെയും തുകയും ഹാന്റ്‌ലിംഗ് ചാര്‍ജുമടകം പിഴ ചുമത്തി''. എയര്‍ ഇന്ത്യ പ്രതിനിധി ധനജ്ഞയകുമാര്‍ പറഞ്ഞു. ഇനി ഇങ്ങനെ സംഭവങ്ങള്‍ സംഭവിക്കാതിരിക്കാന്‍ കടുത്ത നടപടികള്‍ സ്വീകരിക്കുമെന്നും അദ്ദേഹം വ്യക്തമാക്കി. മാത്രമല്ല തനിക്ക് ലഭിച്ച ഉരുളക്കിഴങ്ങ് മോശമായിരുന്നെന്നും ബീന്‍സ് ശരിയായി വെന്തിരുന്നില്ലെന്നും വന്ദന ട്വീറ്റും ചെയ്തിരുന്നു .