മുതിര്‍ന്നവര്‍ക്ക് ജീവനാംശവും വൃദ്ധസദനങ്ങള്‍ക്കും അനുബന്ധ സ്ഥാപനങ്ങള്‍ക്കും രജിസ്ട്രേഷനും നിര്‍ബന്ധമാക്കുന്ന വയോജന സംരക്ഷണ ഭേദഗതി ബില്‍ കേന്ദ്ര സര്‍ക്കാര്‍ ലോക്സഭയില്‍ അവതരിപ്പിച്ചു. പ്രായമായ രക്ഷിതാക്കളുടെയും മുതിര്‍ന്ന പൗരന്മാരുടെയും സംരക്ഷണം ഉന്നമിട്ടുള്ളതാണ് ബില്‍.

അച്ഛന്‍, അമ്മ, ദത്തെടുത്ത അച്ഛന്‍, അമ്മ, ഭാര്യയുടെ മാതാപിതാക്കള്‍, ഭര്‍ത്താവിന്റെ മാതാപിതാക്കള്‍, മുത്തച്ഛന്‍, മുത്തശി എന്നിവര്‍ മാതാപിതാക്കള്‍ എന്ന നിര്‍വചനത്തില്‍ ഉള്‍പ്പെടുമെന്ന് ബില്‍ അവതരിപ്പിച്ച സാമൂഹികനീതി മന്ത്രി താവര്‍ചന്ദ് ഗെലോട്ട് പറഞ്ഞു.

വയോധികരെ ബോധപൂര്‍വം അധിക്ഷേപിക്കുന്നതും അവഗണിക്കുന്നതും ശിക്ഷാര്‍ഹമാണ്.

കുറ്റക്കാരെന്നു കണ്ടെത്തുന്ന മക്കള്‍, ദത്തെടുത്ത മകളുടെ ഭര്‍ത്താവ്, മകന്റെ ഭാര്യ, പേരക്കുട്ടികള്‍ എന്നിവര്‍ക്ക് ആറു മാസം തടവും 10,000 രൂപ പിഴയുമാണു ശിക്ഷ. രക്ഷിതാക്കള്‍ക്ക് അവകാശപ്പെടാവുന്ന ജീവനാംശത്തിനു പരിധി ഉണ്ടാകില്ല. ജീവനാംശത്തില്‍ ഭക്ഷണം, വസ്ത്രം, പാര്‍പ്പിടം, ആരോഗ്യം, സുരക്ഷ എന്നിവ ഉള്‍പ്പെടും. ഇത് നല്‍കുന്നതില്‍ വീഴ്ച വരുത്തുന്ന മക്കള്‍ക്കും ബന്ധുക്കള്‍ക്കും പിഴ ചുമത്താന്‍ ട്രിബ്യൂണലിന് അധികാരമുണ്ടാകും.

80 വയസിനു മുകളിലുള്ളവര്‍ ജീവനാംശത്തിനും തുണയ്ക്കും വേണ്ടി ട്രിബ്യൂണലില്‍ അപേക്ഷ നല്‍കിയാല്‍ 60 ദിവസത്തിനകം തീര്‍പ്പാക്കണമെന്നും വ്യവസ്ഥയുണ്ട്. സര്‍ക്കാര്‍/സ്വകാര്യ ആശുപത്രികളില്‍ മുതിര്‍ന്ന പൗരന്മാര്‍ക്ക് പ്രത്യേകം കിടക്കയും പരാതികള്‍ അറിയിക്കുന്നതിന് സംസ്ഥാനതലത്തില്‍ പ്രത്യേകം ഹെല്‍പ് ലൈന്‍ നമ്പറും ഉറപ്പുവരുത്തുന്നു.