ജമ്മു കശ്മീരിൽ വീണ്ടും സുരക്ഷാ മുന്നറിയിപ്പ്. നുഴഞ്ഞുകയറ്റ സാധ്യതയുള്ളതിനാലാണ് മുന്നറിയിപ്പ് ഉണ്ടായിരിക്കുന്നത്. ഫിനാൻഷ്യൽ ആക്‌ഷൻ ടാസ്ക് ഫോഴ്സിന്റെ (എഫ്എടിഎഫ്) യോഗം കഴിഞ്ഞിരുന്നു. ഇതിന് പിന്നാലെയായിരുന്നു കശ്മീരിൽ വീണ്ടും പ്രശ്നങ്ങൾക്കു സാധ്യതയുണ്ടെന്ന മുന്നറിയിപ്പ് സുരക്ഷാ ഏജൻസികൾ നൽകിയിരിക്കുന്നത്. കള്ളപ്പണത്തിന്റെയും ഭീകരവാദ ഫണ്ടിങ്ങിന്റെയും പേരിൽ എഫ്എടിഎഫ് ഗ്രേ പട്ടികയിൽ പാക്കിസ്ഥാൻ തുടരുന്നതിന്റെ പശ്ചാത്തലത്തിലാണു സുരക്ഷാ ഏജൻസികളുടെ മുന്നറിയിപ്പ്.

പരിശീലനം നൽകിയ ഭീകരന്മാരെ അഫ്ഗാനിസ്ഥാനിൽനിന്നും ഇന്ത്യയിലെത്തിക്കാനാണു പുതിയ നീക്കം ഉണ്ടാകുക. മാര്‍ച്ചോടെ അഫ്ഗാനില്‍നിന്നുള്ള ഭീകരർ ഇന്ത്യയിലേക്കെത്താൻ ശ്രമിക്കുമെന്ന വിവരങ്ങളും കിട്ടുന്നു. ജമ്മു കശ്മീരിനു പുറമേ പഞ്ചാബ്, രാജസ്ഥാൻ എന്നിവിടങ്ങളിലൂടെയും നുഴഞ്ഞു കയറ്റത്തിനു സാധ്യതയുണ്ടെന്നും കേന്ദ്ര ആഭ്യന്തര മന്ത്രാലയത്തിലെ മുതിർന്ന ഉദ്യോഗസ്ഥൻ പറഞ്ഞു.