കാനറാ ബാങ്കിന്‍റെ എടിഎമ്മില്‍ സംഭവിച്ചത് വലിയ പിഴവ്. 100 പിൻവലിക്കാൻ വന്നവർക്ക് കിട്ടിയത് 500 രൂപ. കര്‍ണാടകയിലെ കൊടുഗു ജില്ലയിലെ മടിക്കേരിയില്‍ ബുധനാഴ്ചയായിരുന്നു ഈ സംഭവം നടന്നത്. എടിഎം കൈകാര്യം ചെയ്യുന്ന ഏജന്‍സിക്ക് പറ്റിയ പിഴവായിരുന്നു നൂറു രൂപയ്ക്ക് പകരം അഞ്ഞൂറു രൂപ കിട്ടാൻ കാരണമായത് . 100 രൂപയുടെ നോട്ടുകള്‍ നിറയ്‍‍ക്കേണ്ടുന്ന ട്രേയില്‍ അബദ്ധത്തില്‍ 500 രൂപയുടെ നോട്ടുകള്‍ നിറയ്ക്കുകയായിരുന്നു. ഇതോടെ എടിഎമ്മില്‍ നിന്നും ഏകദേശം 1.7 ലക്ഷം രൂപയായിരുന്നു പിന്‍വലിക്കപ്പെട്ടത്.

നൂറു രൂപയ്ക്ക് പകരം 500 രൂപ ലഭിച്ച ഉപയോക്താക്കളിലൊരാള്‍ ബാങ്കിനെ സമീപിച്ചപ്പോഴായിരുന്നു പിഴവ് സംഭവിച്ച കാര്യം ബാങ്ക് അധികൃതര്‍ അറിഞ്ഞത് . തുടര്‍ന്ന് ഏജന്‍സിയുമായി ബന്ധപ്പെട്ട് പണം തിരികെ വാങ്ങാനുള്ള നടപടികള്‍ ബാങ്ക് തുടങ്ങി.100 രൂപയ്ക്ക് പകരം 500 രൂപ നോട്ടുകള്‍ കിട്ടിയ ഉപയോക്താക്കൾ ആരൊക്കെയാണെന്ന് മനസിലാക്കൻ കഴിഞ്ഞിട്ടുണ്ട് . പക്ഷേ എടിഎമ്മില്‍ നിന്ന് 65,000 രൂപ വീതം പിന്‍വലിച്ച രണ്ടുപേര്‍ പണം തിരികെ നല്‍കാന്‍ തയ്യാറായില്ല. ബാങ്കിന്‍റെ ഭാഗത്ത് നിന്നുണ്ടായ തെറ്റായത് കൊണ്ട് പണം മടക്കി നല്‍കാന്‍ കഴിയില്ലെന്ന് ഇവര്‍ അറിയിക്കുകയായിരുന്നു. എന്നാല്‍ പിന്നീട് ബാങ്ക് പൊലീസിന്‍റെ സഹായം തേടിയപ്പോള്‍ ഇവര്‍ പണം തിരികെ നല്‍കി.