സെന്‍സസ് ചോദ്യാവലിയിലെ 2 ചോദ്യങ്ങള്‍ക്ക് ഉത്തരം നല്‍കേണ്ടെന്നു ജനങ്ങളോട് ആവശ്യപ്പെടാനുള്ള മന്ത്രിസഭാതീരുമാനം നിയമക്കുരുക്കായി മാറിയേക്കാമെന്ന് ഉന്നത ഉദ്യോഗസ്ഥര്‍ക്ക് ആശങ്ക. സര്‍ക്കാര്‍ തീരുമാനം കേന്ദ്ര സെന്‍സസ് നിയമത്തെ വെല്ലുവിളിക്കുന്നതാണെന്ന ആരോപണം ഉയരാം. രണ്ട് ചോദ്യങ്ങള്‍ക്കു മാത്രം മറുപടി നല്‌കേണ്ടെന്ന സര്‍ക്കാര്‍ നിര്‍ദേശം എത്രമാത്രം പ്രായോഗികമാകുമെന്ന സംശയവുമുണ്ട്.

സെന്‍സസില്‍ ജനനതീയതി, മാതാപിതാക്കളുടെ വിശദാംശങ്ങള്‍ എന്നിവ സംബന്ധിച്ച് പുതുതായി ഉള്‍പ്പെടുത്തിയ രണ്ട് ചോദ്യങ്ങളും ഒഴിവാക്കാനായിരുന്നു മന്ത്രിസഭാ തീരുമാനം. പൗരത്വനിയമവുമായി ബന്ധപ്പെട്ട ജനങ്ങളുടെ ആശങ്ക കണക്കിലെടുത്താണ് തീരുമാനമെങ്കിലും നിയമക്കുരുക്കായി മാറിയേക്കാമെന്ന് ഉന്നത ഉദ്യോഗസ്ഥര്‍ക്ക് ആശങ്കയായി പറയുന്നത്. സെന്‍സസ് നിയമപ്രകാരം കേന്ദ്രസര്‍ക്കാരിനാണ് സെന്‍സസ് നടത്തുന്നതിനുള്ള പൂര്‍ണ അധികാരം. സെന്‍സസിനായി സംസ്ഥാന സര്‍ക്കാര്‍ ഉദ്യോഗസ്ഥരെ ചുമതലപ്പെടുത്തുക മാത്രമാണ് ചെയ്യുന്നത്. അതിനായി സംസ്ഥാനത്ത് സെന്‍സസ് ഡയറക്ടറും ഡയറക്ടേറ്റുമുണ്ട്. പൊതുഭരണവകുപ്പിനാണ് സെന്‍സസ് നടത്തിപ്പിന്റെ മുഖ്യചുമതല.

സെന്‍സസ് ചോദ്യാവലിയിലെ മുഴുവന്‍ വിവരങ്ങളും ചോദിക്കേണ്ട ചുമതല ഇതിനായി നിയോഗിക്കപ്പെടുന്ന ഉദ്യോഗസ്ഥര്‍ക്കുണ്ട്. വിവരങ്ങള്‍ എല്ലാം നല്കണമെന്നാണ് നിയമത്തില്‍ പറയുന്നത്. എന്നാല്‍, വിവരങ്ങള്‍ നല്‍കിയില്ലെങ്കിലുള്ള നടപടികളെക്കുറിച്ച് നിയമത്തില്‍ പറഞ്ഞിട്ടില്ല. ഇത് നിയമപോരാട്ടത്തിലേയ്ക്കു നീങ്ങാനുള്ള സാധ്യതയുമുണ്ട്. സെന്‍സസ് നടപടികള്‍ സ്തംഭിച്ചാല്‍ കേരളത്തിനുള്ള കേന്ദ്രസര്‍ക്കാരിന്റെ പ്ലാന്‍ ഫണ്ട് വിഹിതം ഉള്‍പ്പെടെയുള്ളവയെ പ്രതികൂലമായി ബാധിക്കുമെന്നും മുതിര്‍ന്ന ഉദ്യോഗസ്ഥര്‍ പറയുന്നു.