ചേരി മതിൽ കെട്ടി മറച്ച വിവാദം; മറ്റൊരു ചേരി കൂടി മതിൽകെട്ടി മറച്ചെന്ന ആരോപണം ശക്തമാകുന്നു; ദാരിദ്ര്യത്തെ മതിൽ കെട്ടി മറക്കുന്നു എന്ന് ചേരി നിവാസികൾ
അമേരിക്കൻ പ്രസിഡന്റ് ഡൊണാൾഡ് ട്രംപിന്റെ ഇന്ത്യ സന്ദർശനത്തെ തുടർന്നുള്ള വിവാദങ്ങൾ തുടരുന്നു. ട്രംപിന്റെയും മോദിയുടെയും റോഡ് ഷോ നടക്കുന്ന പാതയോരത്തെ ചേരിയെ മറച്ച് അരക്കിലോമീറ്റര് നീളത്തില് മതില് നിര്മിച്ചെന്ന വാര്ത്തക്ക് പിന്നാലെ മറ്റൊരു ചേരിയെയും മറച്ച് മതില് നിര്മിച്ചെന്ന് ആരോപണമുയരുന്നു . ട്രംപും മോദിയും സഞ്ചരിക്കുന്ന റോഡിന് സമീപത്തെ ചേരിയാണ് നാല് അടി ഉയരമുള്ള മതില് നിര്മിച്ച് ചേരി മറച്ചത്. ദാരിദ്ര്യത്തെ മതില് കെട്ടി മറയ്ക്കാനാണ് അഹമ്മദാബാദ് നഗര ഭരണകൂടം ശ്രമിക്കുന്നതെന്ന് ചേരി നിവാസികള്ആരോപിച്ചിരുന്നു . പുതിയ മതില് വിവാദവും സോഷ്യല് മീഡിയയില് ചർച്ചയാകുകയാണ്.
വാര്ത്ത പുറത്തുവന്നതോടെ അഹമ്മദാബാദ് കോര്പ്പറേഷന് അധികൃതര് പ്രതികരണവുമായി രംഗത്തുവന്നു. ആരോപണം അടിസ്ഥാന രഹിതമാണെന്നും ഒരു മാസം മുമ്പ് മതില് നിര്മിക്കുന്നതിനുള്ള തീരുമാനമെടുത്തിരുന്നെന്നും മുന്സിപ്പല് കമ്മീഷണര് വിജയ് നെഹ്റ പറഞ്ഞു. കൈയേറ്റം തടയാനാണ് മതില് നിര്മിച്ചതെന്നും അദ്ദേഹം ട്വീറ്റില് വ്യക്തമാക്കി. റോഡ് ഷോ നടക്കുന്ന 22 കിലോമീറ്റര് ദൂരം ഇരുവരെും അഭിവാദ്യം ചെയ്യാന് 1 ലക്ഷം പേര് രജിസ്റ്റര് ചെയ്തതായി അധികൃതര് പറഞ്ഞു. രജിസ്ട്രേഷന് ഇപ്പോഴും തുടരുകയാണ്. #theBiggestRoadShowever എന്ന ഹാഷ് ടാഗില് റോഡ് ഷോ ട്വിറ്ററില് ഹിറ്റാണ്. സ്റ്റേജ് ഷോ നടക്കുന്ന മൊട്ടേര സ്റ്റേഡിയത്തില് 1 ലക്ഷം പേര് പങ്കെടുക്കും എന്നാണ് റിപ്പോട്ടുകൾ.
https://www.facebook.com/Malayalivartha