കൊറോണ വൈറസ് ബാധയെ പ്രതിരോധിക്കാൻ ഡോക്ടർമാരും നഴ്‌സുമാരും ചെയ്യുന്ന സേവനങ്ങൾക്ക് പുകഴ്ത്തലുമായി പ്രധാനമന്ത്രി നരേന്ദ്രമോദി. കൊറോണ ബാധയെ ചെറുക്കാൻ ആരോ​ഗ്യപ്രവർത്തകരും നഴ്സുമാരും ഡോക്ടർമാരും വളരെ മികച്ച പ്രവർത്തനമാണ് നടത്തുന്നതെന്ന് മോദി ട്വിറ്ററിലൂടെ അറിയിച്ചു . എല്ലാവരും ആരോ​ഗ്യമുള്ളവരായിരിക്കുന്നുവെന്നും രോ​ഗലക്ഷണങ്ങൾ പ്രകടിപ്പിക്കുന്നവർക്ക് കൃത്യമായ ചികിത്സയും പരിചരണവും ലഭിക്കുന്നുവെന്ന് ഉറപ്പുവരുത്തുന്ന കാര്യത്തിൽ ഇന്ത്യയിലെ ആരോ​ഗ്യപ്രവർത്തകർ ബദ്ധശ്രദ്ധരാണെന്നും മോദി ട്വീറ്റിൽ കുറിച്ചു .

നമ്മുടെ ഡോക്ടർമാർ, നഴ്സുമാർ, ആരോ​ഗ്യപ്രവർത്തകർ എന്നിവർ മികച്ച പ്രവർത്തനങ്ങളാണ് നടത്തുന്നത്. അവർ ജനങ്ങൾക്ക് സഹായമെത്തിക്കാൻ സദാസജ്ജരാണ്. അവരുടെ സംഭാവനകൾ എപ്പോഴും വിലമതിക്കും. വൈറസ് നിയന്ത്രിക്കാൻ ഇന്ത്യ സ്വീകരിക്കുന്ന നടപടികളെ വിവിധ രാജ്യങ്ങളിലുള്ളവർ അഭിനന്ദിക്കുകയാണ്. ഇത് നമ്മുടെ ഡോക്ടർമാരുടെയും നഴ്‌സുമാരുടെയും മുനിസിപ്പിൽ ജീവനക്കാരുടെയും വിമാനത്താവള ജീവനക്കാരുടെയും ബന്ധപ്പെട്ട മറ്റുള്ളവരുടെയും ആത്മവിശ്വാസം വർധിപ്പിക്കുമെന്നും മോദി ട്വീറ്റിൽ പറഞ്ഞു.

കൊറോണ വൈറസിനെ പ്രതിരോധിക്കാൻ സംഘടിതമായ പ്രവർത്തനങ്ങളാണു നടക്കുന്നത്. ജനങ്ങളുടെ ആരോഗ്യം സംരക്ഷിക്കുന്നതിന് ആവശ്യമായ എല്ലാ നടപടികളും സ്വീകരിക്കും. ഉത്തരവാദിത്വബോധമുള്ള പൗരന്മാർക്ക് കൊറോണയ്ക്കെതിരേയുള്ള പോരാട്ടത്തെ ശക്തിപ്പെടുത്താൻ കഴിയും. നമ്മുടെ പൗരന്മാർ മറ്റുള്ളവരുടെ ജീവൻ അപകടപ്പെടുത്തുന്ന രീതിയിൽ ഒന്നും ചെയ്യുകയില്ലെന്നും മോദി ട്വീറ്റ് ചെയ്തു.