ഇനി അപരന്മാര്ക്ക് രക്ഷയില്ല, വോട്ടിംഗ് യന്ത്രത്തില് സ്ഥാനാര്ത്ഥികളുടെ പേരിനും ചിഹ്നത്തിനുമൊപ്പം ഫോട്ടോയും
മെയ് ഒന്നിന് ശേഷം നടക്കുന്ന തെരഞ്ഞെടുപ്പുകളില് വോട്ടിംഗ് യന്ത്രത്തില് പേരിനും ചിഹ്നത്തിനുമൊപ്പം സ്ഥാനാര്ത്ഥികളുടെ ഫോട്ടോയും പതിപ്പിക്കുമെന്ന് തെരഞ്ഞെടുപ്പ് കമ്മീഷന്. അപരന്മാരുടെ ശല്യം ഒഴിവാക്കാനാണ് കമ്മീഷന്റെ നടപടി. അതേസമയം രാഷ്ട്രീയപാര്ട്ടികള് സ്വയം നവീകരിച്ചാല് മാത്രമേ തെരഞ്ഞെടുപ്പ് പരിഷ്കരണം സാധ്യമാകൂ എന്ന് മുഖ്യ തെരഞ്ഞെടുപ്പ് കമ്മീഷണര് എച്ച് എസ് ബ്രഹ്മ വ്യക്തമാക്കി..
ഒരു മണ്ഡലത്തില് ഒരേ പേരില് നിരവധി സ്ഥാനാര്ത്ഥികള് മത്സരിക്കുന്ന സാഹചര്യത്തില് വോട്ടര്മാര്ക്കുണ്ടാകുന്ന ആശയക്കുഴപ്പം പരിഹരിക്കാനാണ് തെരഞ്ഞെടുപ്പ് കമ്മീഷന്റെ പുതിയ പരിഷ്കരണം. ബാലറ്റ് പേപ്പര്, പോസ്റ്റല് ബാലറ്റ്, ഇലക്ട്രോണിക് വോട്ടിംഗ് യന്ത്രം എന്നിവയില് സ്ഥാനാര്ത്ഥികളുടെ പേരിനും ചിഹ്നത്തിനുമിടയില് ഫോട്ടോയും പതിപ്പിക്കും. ഇതിനായി നാമനിര്ദ്ദേശപത്രിക സമര്പ്പിക്കുന്ന സമയം സ്ഥാനാര്ത്ഥികള് ഏറ്റവും പുതിയ ഫോട്ടോ കൂടി വരണാധികാരിക്ക് നല്കണം. തൊപ്പിയും കറുത്ത കണ്ണടയും ഒഴിവാക്കിയുള്ള ഫോട്ടോയാണ് സ്ഥാനാര്ത്ഥികള് സമര്പ്പിക്കേണ്ടത്.
ഇത് സംബന്ധിച്ച് സംസ്ഥാന തെരഞ്ഞെടുപ്പ് കമ്മീഷണര്മാര്ക്ക് കേന്ദ്രതെരഞ്ഞെടുപ്പ് കമ്മീഷന് നിര്ദ്ദേശം നല്കി. മെയ് ഒന്നിന് ശേഷം നടക്കുന്ന തെരഞ്ഞെടുപ്പുകളിലാണ് ഇത് പ്രാവര്ത്തികമാക്കുക. അരുവിക്കര ഉപതെരഞ്ഞെടുപ്പില് സ്ഥാനാര്ത്ഥികളുടെ ഫോട്ടോ പതിച്ച തെരഞ്ഞെടുപ്പ് യന്ത്രമാകും ഉപയോഗിക്കുക. ഇതിനിടെ തെരഞ്ഞെടുപ്പ് പ്രക്രിയയിലെ പരിഷ്കരണം സാധ്യമാകണമെങ്കില് രാഷ്ട്രീയ പാര്ട്ടികള് സ്വയം നവീകരിക്കണമെന്ന് മുഖ്യതെരഞ്ഞെടുപ്പ് കമ്മീഷണര് എച്ച് എസ് ബ്രഹ്മ പറഞ്ഞു..
പ്രവാസികള്ക്കും സൈനികര്ക്കും വോട്ട് അവകാശം നല്കുന്നതില് തെരഞ്ഞെടുപ്പ് കമ്മീഷന് തുറന്ന സമീപനമാണുള്ളതെന്നും ബ്രഹ്മ പറഞ്ഞു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha