യുവതിയുമായി ഇടപഴകിയ എല്ലാവരേയും ഇപ്പോള്‍ നിരീക്ഷണത്തിലാക്കിയിരിക്കുകയാണ്. കൂടുതല്‍ വിവരങ്ങള്‍ പുറത്തുവന്നിട്ടില്ല. ഇന്ന് രാവിലെയാണ് ഇവര്‍ക്ക് കൊവിഡ് സ്ഥിരീകരിച്ചത് എന്നാണ് അറിയുന്നത്. കഴിഞ്ഞ ഏതാനും ദിവസങ്ങളായി ഉദ്ദവ് താക്കറെയുടെ വസതിക്ക് പുറത്താണ് ഇവര്‍ക്ക് ഡ്യൂട്ടി.

രാജ്യത്ത് ഏറ്റവും കൂടുതല്‍ കൊവിഡ്-19 കേസുകള്‍ റിപ്പോര്‍ട്ട് ചെയ്ത സംസ്ഥാനമാണ് മഹാരാഷ്ട്ര. എന്നാല്‍ സംസ്ഥാനത്ത് റിപ്പോര്‍ട്ട് ചെയ്ത കൊവിഡ് കേസുകളില്‍ 70 ശതമാനം പേര്‍ക്കും ഒരു രോഗലക്ഷണവും ഇല്ലെന്നാണ് മുഖ്യമന്ത്രി ഉദ്ധവ് താക്കറെ പറഞ്ഞത്. രോഗികള്‍ക്ക് തങ്ങള്‍ക്ക് വൈറസ് ബാധയുണ്ടെന്ന് വരെ അറിയില്ലായിരുന്നെന്നും അദ്ദേഹം പറഞ്ഞിരുന്നു.
സംസ്ഥാനത്തെ ജനങ്ങളോട് വീഡിയോ സന്ദേശത്തിലൂടെ സംസാരിച്ചപ്പോഴാണ് താക്കറെ 70 മുതല്‍ 75 ശതമാനം കേസുകളും രോഗലക്ഷണങ്ങളില്ലാത്തതായിരുന്നെന്ന് പറഞ്ഞത്. ആര്‍ക്കെങ്കിലും ലക്ഷണങ്ങളുണ്ടെങ്കില്‍ മറച്ച് വയ്ക്കരുതെന്നും അധികൃതരെ ബന്ധപ്പെടണമെന്നും താക്കറെ ആവശ്യപ്പെട്ടിരുന്നു.

മഹാരാഷ്ട്രയില്‍ ഇന്നലെ മാത്രം 283 പേര്‍ക്ക് കൂടി രോഗം സ്ഥിരീകരിച്ചിരുന്നു. ഇതോടെ സംസ്ഥാനത്തെ ആകെ രോഗബാധിതരുടെ എണ്ണം 4,666 ആയി ഉയര്‍ന്നു.

ധാരാവിയില്‍ ഇന്നലെ 30 പേര്‍ക്കാണ് രോഗം സ്ഥിരീകരിച്ചതെന്നതും ആശങ്കയുണര്‍ത്തുന്ന കാര്യമാണ്. ഏഷ്യയിലെ ഏറ്റവും വലിയ ചേരിയാണ് കൊവിഡ് ഹോട്‌സ്‌പോട്ടായി മാറിയിരിക്കുന്നത്. ഇന്നലെ റിപ്പോര്‍ട്ട് ചെയ്ത 30 കേസുകളില്‍ 17 പേര്‍ 35 വയസിന് താഴെയുള്ളവരാണെന്നതും ശ്രദ്ധേയമാണ്. രണ്ട് വയസുള്ള കുട്ടിയും 15 വയസുള്ള മറ്റൊരു കുട്ടിയും പട്ടികയിലുള്‍പ്പെടുന്നുണ്ട്.