അവധിക്കായി ഗള്‍ഫ് രാജ്യങ്ങളില്‍ നിന്ന് ഇന്ത്യയിലെത്തിയ ആരോഗ്യപ്രവര്‍ത്തകര്‍ക്ക് തിരിച്ചുപോകാന്‍ അവസരമൊരുക്കുമെന്ന് വിദേശകാര്യ മന്ത്രാലയം. ഇവരുടെ സേവനം അത്യാവശ്യമാണെന്ന ഗള്‍ഫ് രാജ്യങ്ങളിലെ ആരോഗ്യമന്ത്രിമാരുടെ അപേക്ഷ പ്രകാരമാണ് തീരുമാനം. പ്രധാനമന്ത്രി കഴിഞ്ഞ ദിവസങ്ങളില്‍ ഗള്‍ഫ് രാഷ്ട്രങ്ങളുടെ നേതാക്കളുമായി കോവിഡ് പശ്ചാത്തലത്തില്‍ വിശദമായ ചര്‍ച്ചകള്‍ നടത്തിയിരുന്നു. ഇതിന്റെ തുടര്‍ച്ചയായി വിദേശമന്ത്രാലയവും ചര്‍ച്ച നടത്തിയതിനെത്തുടര്‍ന്നാണ് ധാരണയിലെത്തിയത്. ഗള്‍ഫ് നാടുകളിലേക്ക് ഭക്ഷണം ഉള്‍പ്പെടെയുള്ള അവശ്യവസ്തുക്കള്‍ ഇന്ത്യയില്‍ നിന്നും എത്തിക്കുന്നത് റംസാന്‍ ദിനങ്ങളിലും തുടരുമെന്നും ഇന്ത്യ വ്യക്തമാക്കി.

ഹൈഡ്രോക്‌സിക്ലോറോക്വിന്‍, പാരസെറ്റമോള്‍ എന്നീ മരുന്നുകളും ഇന്ത്യയോട് എത്തിച്ചുനല്‍കാന്‍ പല ഗള്‍ഫ് രാജ്യങ്ങളും ആവശ്യപ്പെട്ടിട്ടുണ്ട്. ഇത് നല്‍കുന്ന കാര്യത്തിലും ഇന്ത്യന്‍ വിദേശകാര്യ മന്ത്രാലയം ഉറപ്പുനല്‍കിയിട്ടുണ്ട്. ഇന്ത്യയും ഗള്‍ഫ് നാടുകളുമായുള്ള ബന്ധം മോശമാക്കുന്ന തരത്തില്‍ സാമൂഹികമാധ്യമങ്ങളില്‍ പ്രചരിക്കുന്ന വ്യാജസന്ദേശങ്ങളുടെ കാര്യത്തില്‍ കര്‍ശനമായ നടപടിയുണ്ടാകുമെന്ന് ഗള്‍ഫ് രാജ്യങ്ങള്‍ വ്യക്തമാക്കിയതായി മന്ത്രാലയം അറിയിച്ചു. കുവൈത്തിന്റെ അപേക്ഷപ്രകാരം ഡോക്ടര്‍മാര്‍, നഴ്സുമാര്‍, പാരാമെഡിക്കല്‍ വിദഗ്ധര്‍ എന്നിവരടങ്ങുന്ന ഇന്ത്യന്‍ സംഘത്തിന്റെ സേവനം ഇന്ത്യ നല്‍കിവരുന്നുണ്ട്.