കോവിഡ് ബാധിച്ച മഹാരാഷ്ട്ര ഭവനമന്ത്രിയുടെ നില തൃപ്തികരമെന്നു സര്‍ക്കാര്‍ വൃത്തങ്ങള്‍. ജിതേന്ദ്ര ആവാഡ് (54) താനെയ്ക്കടുത്തു മുളുണ്ടിലെ ഫോര്‍ട്ടിസ് ആശുപത്രിയിലാണിപ്പോള്‍. രാജ്യത്ത് ആദ്യമായാണ് ഒരു മന്ത്രിക്കു കോവിഡ് ബാധ റിപ്പോര്‍ട്ട് ചെയ്യുന്നത്.

ഇദ്ദേഹം പലവട്ടം , ഡല്‍ഹി മതസമ്മേളനത്തില്‍ പങ്കെടുത്തവരെ കണ്ടെത്താന്‍ പരിശോധന നടത്തിയ പൊലീസ് ഉദ്യോഗസ്ഥനുമായി ചര്‍ച്ച നടത്തിയിരുന്നു. ഉദ്യോഗസ്ഥനു പിന്നീട് കോവിഡ് സ്ഥിരീകരിച്ചു.

പിന്നാലെ ആവാഡിന്റെ സുരക്ഷാസംഘത്തിലെ ഏതാനും പേര്‍ക്കും. തുടര്‍ന്നു മന്ത്രിയും കുടുംബവും രണ്ടാഴ്ചയോളം വീട്ടില്‍ ക്വാറന്റീനില്‍ ആയിരുന്നു.

13-ന് നടത്തിയ പരിശോധനയില്‍ കോവിഡ് നെഗറ്റീവായിരുന്നെങ്കിലും പിന്നീടു ശ്വാസതടസ്സം ഉണ്ടായപ്പോഴാണ് ആശുപത്രിയിലെത്തിയത്. തുടര്‍ന്നുള്ള പരിശോധനയില്‍ കോവിഡ് കണ്ടെത്തി. എന്‍സിപി മന്ത്രിയാണ് ആവാഡ്.