കൊറോണ വ്യാപനത്തിന്റെ പശ്ചാത്തലത്തിൽ ലോക്ക് ഡൗൺ വീണ്ടും നീട്ടിയ സാഹചര്യത്തിൽ ഇന്ത്യയില്‍ ഓരോ ദിവസവും റിപ്പോര്‍ട്ട് ചെയ്യപ്പെട്ടു കൊണ്ടിരിക്കുന്ന കേസുകള്‍ എണ്ണവും തീരെ കുറവല്ല. പല സംസ്ഥാനങ്ങളുടെയും സ്ഥിതി അതീവ ഗുരുതരാവസ്ഥയിലേക്ക് പൊയ്ക്കൊണ്ടിരിക്കുന്നതായി റിപ്പോർട്ട്. അതോടൊപ്പം തന്നെ കൃത്യമായി രോഗികളെ റിപ്പോര്‍ട്ട് ചെയ്യാതെയും ടെസ്റ്റുകള്‍ ചെയ്യാതെയും കണ്ണടച്ച്‌ ഇരുട്ടാക്കുന്ന സംസ്ഥാനങ്ങളും നിലവിൽ ഉണ്ട്.

ഇതിനോടകം തന്നെ രാജ്യത്ത് ഇതുവരെ 775 പേര്‍ കോവിഡ് ബാധിച്ച് മരിക്കുകയുണ്ടായി. കൊവിഡ് സ്ഥിരീകരിച്ചവരുടെ എണ്ണം ഇതിനോടകം തന്നെ 24,506 ആയി. 24 മണിക്കൂറിനുള്ളിൽ 1429 കേസുകളും 57 മരണവും റിപ്പോർട്ട് ചെയ്യുകയുണ്ടായി. ഒപ്പം മഹാരാഷ്ട്രയിൽ രോഗബാധിതർ 6817 ഉം മരണം 310 ഉം കടന്നു. രോഗമുക്തി നിരക്ക് 20.66 ശതമാനത്തിലെത്തി എന്നാണ് ആരോഗ്യ മന്ത്രാലയത്തിന്‍റെ പ്രതികരണം.

എന്നാൽ തന്നെയും ലോക്ഡൗണ്‍ 31 ദിവസം കഴിയുമ്ബോഴും ഇന്ത്യയില്‍ പുതിയ രോഗികളുടെ എണ്ണം കുറയാത്തതെന്തുകൊണ്ടാണെന്ന സംശയം പലര്‍ക്കും ഉണ്ടാവും. അതിന് കൃത്യമായ ഉത്തരം നല്‍കാന്‍ പ്രയാസമാണ് എങ്കിലും പ്രധാനമായും രണ്ടു കാരണങ്ങളാണ് പറയപ്പെടുന്നത്.

ഒന്ന്, ലോക്ക് ഡൗണ്‍ കൃത്യമായി പാലിക്കപ്പെടുന്നില്ല അല്ലെങ്കില്‍ സാമൂഹിക അകലവും വ്യക്തിശുചിത്വവും പലയിടങ്ങളിലും കാര്യക്ഷമമാകുന്നില്ല. രണ്ട്, കൂടുതല്‍ ടെസ്റ്റുകള്‍ ചെയ്തു തുടങ്ങിയപ്പോള്‍ കൂടുതല്‍ രോഗികള്‍ കണ്ടെത്തുന്നത് ആവാം. മുമ്ബ് ചെയ്തിരുന്നതിനേക്കാള്‍ വളരെയധികം ടെസ്റ്റുകള്‍ ഇപ്പോള്‍ ദിവസവും ചെയ്യുന്നുണ്ട്. കഴിഞ്ഞ ദിവസം മാത്രം 35,000-ലധികം ടെസ്റ്റുകള്‍ ചെയ്തതായി ഐസിഎംആര്‍ പറയുന്നുണ്ട്. ഇതുവരെ ആകെ 5.5 ലക്ഷത്തോളം ടെസ്റ്റുകള്‍. ചിലപ്പോള്‍ ഈ രണ്ടു കാരണങ്ങളും ഉണ്ടാവാം.

മറ്റൊന്ന് രോഗികളുടെ എണ്ണം ഇരട്ടിക്കുന്ന സമയം കൂട്ടിക്കൊണ്ടുവരാന്‍ ഈ ലോക്ഡൗണിന് കഴിഞ്ഞു എന്നതാണ്. ഏപ്രില്‍ 6-ലെ കണക്ക് പ്രകാരം ഇത് 4.2 ദിവസമായിരുന്നു. ഏപ്രില്‍ 20 ആയപ്പോളത് 8.6 ദിവസമാണ്.ഈ രീതിയില്‍ തുടര്‍ന്നാല്‍ തന്നെ, മെയ് പകുതിയോടെ ഇന്ത്യയില്‍ ഒരു ലക്ഷത്തോളം രോഗികള്‍ ഉണ്ടാകും എന്നാണ് കണക്കാക്കപ്പെടുന്നത്. അതിനുമുന്‍പ് ലോക്ഡൗണ്‍ മാറ്റിയാല്‍ സ്ഥിതി അതീവ ഗുരുതരമാകുമെന്ന് സാമാന്യ ബുദ്ധി കൊണ്ട് തന്നെ നമുക്കൂഹിക്കാവുന്നതുമാണ്. ഇത്തരത്തിൽ സാഹചര്യം നിലനിൽക്കുമ്പോൾ തന്നെ ഇന്ത്യയിൽ വീണ്ടും ലോക് ഡൗൺ പ്രഖ്യാപിക്കുമെന്നതിൽ സംശയമില്ല.