പാക്ക് അധീന കശ്മീരില്‍ നിന്നും ഇന്ത്യയിലേക്കു നുഴഞ്ഞുകയറാന്‍ തക്കംപാര്‍ത്ത് അവിടെ നിലയുറപ്പിച്ച ഭീകരരുടെ എണ്ണം ഗണ്യമായി വര്‍ധിച്ചതായി മിലിറ്ററി ഇന്റലിജന്‍സ്. അതിര്‍ത്തിക്കപ്പുറത്തെ താവളങ്ങളില്‍ ഏതാനും ആഴ്ച മുന്‍പ് ഇരുനൂറോളം ഭീകരരുണ്ടായിരുന്നിടത്ത് ഇപ്പോള്‍ ഏകദേശം 450 ഭീകരരുണ്ടെന്നാണ് വിവരം.

പാക് സേനയുടെ നേതൃത്വത്തില്‍ ആയുധ പരിശീലനം പൂര്‍ത്തിയാക്കിയ ഭീകരരെ ഷെല്ലാക്രമണത്തിന്റെ മറവില്‍ ജമ്മു കശ്മീരിലേക്കു കടത്തുകയാണു പാക്കിസ്ഥാന്റെ ലക്ഷ്യമെന്ന് ഇന്ത്യന്‍ സേനാ വൃത്തങ്ങള്‍ ചൂണ്ടിക്കാട്ടി. പാക്ക് സേനയുടെയും ചാരസംഘടനയായ ഐഎസ്‌ഐയുടെയും നേരിട്ടുള്ള മേല്‍നോട്ടത്തില്‍ 16 താവളങ്ങള്‍ സജീവമാണെന്നു ഡ്രോണ്‍ നിരീക്ഷണത്തിലൂടെ ഇന്റലിജന്‍സ് കണ്ടെത്തി. ലഷ്‌കറെ തയിബ, ഹിസ്ബുല്‍ മുജാഹിദീന്‍ സംഘടനകളിലെ ഭീകരരാണ് ഏറെയും.

മലനിരകളും വനങ്ങളും നിറഞ്ഞ അതിര്‍ത്തിയില്‍ നുഴഞ്ഞുകയറ്റം തടയുക ദുഷ്‌കരമാണ്. നുഴഞ്ഞുകയറ്റം തുരത്താനുള്ള സേനാ സംവിധാനം ശക്തമാക്കാന്‍ ശ്രീനഗര്‍ ആസ്ഥാനമായ ചിനാര്‍ കോര്‍ മേധാവി ലഫ്. ജനറല്‍ ബി.എസ്. രാജു ഉത്തരവു നല്‍കി. അതിര്‍ത്തിയില്‍ രണ്ടാഴ്ചയിലേറെയായി പാക്ക് സേന വ്യാപക ഷെല്ലാക്രമണം തുടരുകയാണ്. ഇന്ത്യയുടെ ഷെല്ലാക്രമണം തടയാന്‍ ജനവാസ മേഖലകളിലാണു ചില ഭീകരതാവളങ്ങള്‍ സജ്ജമാക്കിയിരിക്കുന്നത്.

ദക്ഷിണ കശ്മീരിലെ കുല്‍ഗാമില്‍ പട്രോളിങ് നടത്തുകയായിരുന്ന കരസേന, സിആര്‍പിഎഫ്, ജമ്മു കശ്മീര്‍ പൊലീസ് സംയുക്ത സംഘത്തിനു നേരെ ഭീകരര്‍ വെടിയുതിര്‍ത്തു. ഭീകരതാവളം വളഞ്ഞ സേന മണിക്കൂറുകള്‍ നീണ്ട ഏറ്റുമുട്ടലിനൊടുവില്‍ 3 പേരെയും വധിച്ചു. ദക്ഷിണ കശ്മീരില്‍ 2 ദിവസത്തിനിടെ നടക്കുന്ന മൂന്നാമത്തെ ഏറ്റുമുട്ടലാണിത്. ആകെ 9 ഭീകരരെ വധിച്ചു.