ആ അപകടത്തിലേക്ക് ഇന്ത്യയും; ഭരണ സിരാകേന്ദ്രങ്ങളിലും കൊവിഡ് പടര്ന്നുപിടിക്കുന്നു; പ്രതിരോധ സെക്രട്ടറി അജയ് കുമാറിന് കോവിഡ്; ഉദ്യോഗസ്ഥരെല്ലാം ക്വാറന്റീനില്
പ്രതിരോധ സെക്രട്ടറി അജയ് കുമാറിന് കോവിഡ് സ്ഥിരീകരിച്ചതോടുകൂടി ആശങ്ക ഏറുന്നു. ബുധനാഴ്ച കോവിഡ് പരിശോധന ഫലം ലഭിച്ചതോടെയാണ് പ്രതിരോധ മന്ത്രാലയത്തിലെ 35 ഉദ്യോഗസ്ഥരോട് ക്വാറന്റീനില് പോകാന് നിര്ദേശിച്ചത്. മാത്രമല്ല അജയ് കുമാറുമായി ഇടപഴകിയ എല്ലാവരേയും കണ്ടെത്താനുളള ശ്രമം തുടരുകയാണ്.
കേരള കേഡര് ഐഎഎസ് ഉദ്യോഗസ്ഥനാണ് അജയ് കുമാര്. വീട്ടില് ക്വാറന്റീനില് തുടരുന്ന ഇദ്ദേഹത്തിന്റെ ആരോഗ്യനില തൃപ്തികരമാണെന്നാണ് പുറത്തുവരുന്ന റിപ്പോര്ട്ടുകള്. അതേസമയം അജയ് കുമാറിന് രോഗം സ്ഥിരീകരിച്ച വിഷയത്തില് പ്രതിരോധ മന്ത്രാലയ വക്താവ് ഇതുവരെ പ്രതികരിച്ചിട്ടില്ല. മുന്കരുതല് നടപടിയുടെ ഭാഗമായി പ്രതിരോധ മന്ത്രി രാജ്നാഥ് സിംങ് ബുധനാഴ്ച ഓഫീസില് എത്തിയിട്ടില്ലെന്നാണ് സൂചന. രാജ്നാഥ് സിംങിന് പുറമേ സൈനിക മേധാവി, നാവികസേന മേധാവിയുടേയും ഓഫീസുകള് ഇതേ ബ്ലോക്കിലാണ്.
മാര്ച്ച് 10 വരെ ഇന്ത്യയില് 50 കേസുകള് മാത്രമാണ് ഉണ്ടായിരുന്നത്. അതിന് ശേഷം കൊവിഡ് ബാധയില് ക്രമാനുഗതമായ വളര്ച്ചയാണ് ഉണ്ടായത്. ആദ്യ കേസ് റിപ്പോര്ട്ട് ചെയ്ത് 110 ദിവസത്തിനകം ഇന്ത്യയില് ഒരു ലക്ഷം പേര്ക്ക് രോഗം ബാധിച്ചു. പിന്നീട് 15 ദിവസത്തിനകം ഇപ്പോള് രണ്ട് ലക്ഷമായി. രോഗം ശക്തമായി തുടരുമ്പോഴും രോഗത്തിനെതിരായ പ്രതിരോധ നടപടികള് ശക്തമാണെന്നാണ് കേന്ദ്രസര്ക്കാര് വാദം. മറ്റ് വികസിത രാജ്യങ്ങളെക്കാള് മരണനിരക്ക് രാജ്യത്ത് വളരെ കുറവാണെന്നാണ് അത് പറയാനുള്ള പ്രധാന കാരണം.കൊവിഡ് രോഗ ബാധിതര്ക്ക് രാജ്യത്ത് വളരെ വേഗം രോഗം ഭേദമാകുന്നുണ്ടെന്നും ഇതിന് ഉദാഹരണമായി ചൂണ്ടിക്കാട്ടുന്നു. അടിസ്ഥാന സൗകര്യത്തിലും വ്യത്യാസമുണ്ട്. ഒന്നേകാല് ലക്ഷം പേരെയാണ് ദിവസവും രാജ്യത്ത് പരിശോധനക്ക് വിധേയമാക്കുന്നത്.
നാല്പത് ലക്ഷത്തോളം പരിശോധനകള് ഇന്ത്യയില് നടത്തിക്കഴിഞ്ഞു. ഇക്കാര്യത്തില് ലോകത്ത് ആദ്യ അഞ്ച് രാജ്യങ്ങളില് വരും ഇന്ത്യ. അമേരിക്ക, റഷ്യ, ഇംഗ്ളണ്ട്, സ്പെയ്ന് എന്നിവരാണ് മറ്റ് നാലുപേര്.ആകെ രോഗബാധിതരായവരില് ലോകത്ത് ഏഴാം സ്ഥാനമാണ് ഇന്ത്യ. അമേരിക്ക, ബ്രസീല്, റഷ്യ, ബ്രിട്ടണ്, സ്പെയിന്, ഇറ്റലി എന്നിവയാണ് മുന്നിലുള്ള രാജ്യങ്ങള്. ഏറ്റവുമധികം ജനങ്ങള് മരിച്ച രാജ്യങ്ങളില് ആദ്യ പത്തില് ഇന്ത്യ വരുന്നില്ല. ലോകമാകെ 27 ലക്ഷം പേരാണ് രോഗമോചിതരായത്. 4.6 ലക്ഷം പേര് രോഗമോചിതരായ അമേരിക്ക തന്നെയാണ് ഇതിലും ഒന്നാമത്.
ആദ്യ പത്ത് രാജ്യങ്ങളില് ഇന്ത്യയും ചൈനയുമുണ്ട്.ആക്ടീവ് കേസുകളുടെ കണക്കില് അമേരിക്ക 11 ലക്ഷം പേരുമായി ഒന്നാമതാണ്. ഇന്ത്യ ആദ്യ അഞ്ച് രാജ്യങ്ങളില് പെടും. എന്നാല് രാജ്യത്ത് സാമൂഹ്യ വ്യാപനം ഉണ്ടായി എന്ന് ഇന്ത്യ സമ്മതിച്ചിട്ടില്ല. മാത്രമല്ല രോഗം മൂര്ച്ഛിച്ച അവസ്ഥയിലല്ല രാജ്യം എന്നാണ് സര്ക്കാര് വാദം. 'രാജ്യത്തെ പ്രതിരോധ നടപടികള് വളരെ ഫലപ്രദമാണ്. മറ്റ് രാജ്യങ്ങളുമായി നോക്കുമ്പോള് ഇന്ത്യ ഭേദമായ അവസ്ഥയിലാണ്.' ഐസിഎംആറിലെ ശാസ്ത്രജ്ഞനായ നിവേദിത ഗുപ്തയും ഇത് ചൂണ്ടിക്കാട്ടുന്നു.
https://www.facebook.com/Malayalivartha