രാജ്യസഭാ തിരഞ്ഞെടുപ്പ് ഫലം ഇന്നലെ പുറത്ത് വരുമ്‌ബോള്‍ രാജ്യത്തെ ഉപരിസഭയില്‍ അല്‍പംകൂടി അംഗബലം കൂട്ടിയിരിക്കുകയാണ് മുഖ്യ ഭരണകക്ഷിയായ ബിജെപി. പ്രതിപക്ഷ കക്ഷിയായ കോണ്‍ഗ്രസിന് ഉളളതിനെക്കാള്‍ ഇരട്ടിയിലധികം സീറ്റുകള്‍ നിലവില്‍ ബിജെപിക്കുണ്ട്. 41 സീറ്റാണ് കോണ്‍ഗ്രസിന് ബിജെപിക്കോ 86ഉം. രണ്ടുവര്‍ഷത്തിലൊരിക്കല്‍ നടക്കുന്ന രാജ്യസഭയുടെ ഇലക്ഷന്‍ ഫലം വന്നതോടെ ആകെ 245 സീറ്റില്‍ മുഖ്യ ഭരണകക്ഷിയായ എന്‍ഡിഎയ്ക്ക് നൂറിനടുത്ത് അംഗങ്ങളാണ് ഉളളത്. മുന്നണിയുമായി സൗഹൃദമുളള എഐഡിഎംകെ9 സീറ്റ്, ബിജെഡി9, വൈ.എസ്.ആര്‍. കോണ്‍ഗ്രസ്6 എന്നീ പാര്‍ട്ടികളും മറ്റ് ചെറു പാര്‍ട്ടികളും ചേര്‍ന്നാല്‍ രാജ്യസഭയിലും നിലവില്‍ ഭൂരിപക്ഷം എന്‍ഡിഎയ്ക്ക് തന്നെയാണ്.

61 സീറ്റുകളില്‍ നടത്തിയ തിരഞ്ഞെടുപ്പ് ഫലം വരുമ്‌ബോള്‍ 42 പേര്‍ എതിരില്ലാതെ തിരഞ്ഞെടുക്കപ്പെട്ടു. 19 സീറ്റുകളില്‍ തിരഞ്ഞെടുപ്പ് വേണ്ടി വന്നു.ഇതില്‍ വിജയിച്ച അംഗങ്ങളില്‍ എട്ടുപേര്‍ ബിജെപിയും 4 വീതം കോണ്‍ഗ്രസും വൈ.എസ്.ആര്‍. കോണ്‍ഗ്രസുമാണ്. മറ്റ് പാര്‍ട്ടികള്‍ക്ക് മൂന്ന് സീറ്റും ലഭിച്ചു. സംസ്ഥാനങ്ങളില്‍ മറ്റ് പാര്‍ട്ടികള്‍ക്ക് പ്രത്യേകിച്ച് കോണ്‍ഗ്രസിന് ബാധിച്ചിരിക്കുന്ന അപചയമാണ് ബിജെപിക്ക് രാജ്യസഭയില്‍ ഇത്തവണ ഗുണമായത്. ഒന്നാം മോദി ഗവണ്മെന്റിന്റെ സമയത്ത് രാജ്യസഭയില്‍ ബിജെപി ന്യൂനപക്ഷമായതിനാല്‍ നടപ്പാക്കാനാകാത്ത കാര്യങ്ങള്‍ ഇതോടെ നടത്താന്‍ പാര്‍ട്ടിക്ക് ധൈര്യമേറും.

ആകെ സീറ്റുകളില്‍ 17 എണ്ണം ബിജെപിയും 9 സീറ്റുകളില്‍ കോണ്‍ഗ്രസും, ജെഡിയു മൂന്നും, ബിജു ജനതാദള്‍, ത്രൃണമൂല്‍ കോണ്‍ഗ്രസ് ഇവ നാല് വീതവും എഐഡിഎംകെ, ഡിഎംകെ ഇവ മൂന്ന് വീതവും എന്‍.സി.പി,ആര്‍ജെഡി,തെലങ്കാന രാഷ്ട്ര സമിതി ഇവ രണ്ട് വീതവും മറ്റുളളവര്‍ ഓരോന്നും സീറ്റ് നേടി.

കോണ്‍ഗ്രസ്,തൃണമൂല്‍ കോണ്‍ഗ്രസ്, ഇടത് പാര്‍ട്ടികള്‍ എന്നിങ്ങനെ മുഖ്യ പ്രതിപക്ഷ കക്ഷികളുടെ ശക്തി ഇല്ലാതാകുകയാണെന്ന് കഴിഞ്ഞ വര്‍ഷം ലോക്‌സഭ തിരഞ്ഞെടുപ്പില്‍ ബിജെപി നേടിയ 303 സീറ്റുകള്‍ തന്നെ സൂചിപ്പിക്കുന്നുണ്ട്. മുഖ്യ പ്രതിപക്ഷ പാര്‍ട്ടികള്‍ക്ക് തുടര്‍ന്ന് ഓരോ തവണ രാഷ്ട്രീയ പരാജയം സംഭവിച്ചപ്പോഴും ബിജെപി കുതിരകച്ചവടം നടത്തുന്നു എന്ന് ആരോപിക്കേണ്ടി വന്നു.

ഇന്ത്യന്‍ ഭരണഘടനയില്‍ കാശ്മീരിന് പ്രാധാന്യം നല്‍കുന്ന ആര്‍ട്ടിക്കിള്‍ 370 റദ്ദാക്കാനും ജമ്മു കാശ്മീരിനെ രണ്ടായി വിഭജിക്കാനും മുത്തലാഖ് ബില്ല് പാസാക്കാനും, പൗരത്വ ബില്ലിലും ബിജെപിക്ക് ഒപ്പം ലോക്‌സഭ നില്‍ക്കാന്‍ പ്രതിപക്ഷ പാര്‍ട്ടികളുടെ പരാജയവും ഐക്യമില്ലായ്മയും സഹായിച്ചു.

തിരഞ്ഞെടുക്കപ്പെട്ട 61 അംഗങ്ങളില്‍ 43 പേര്‍ പുതുമുഖങ്ങളാണ്. ഇതില്‍ ബിജെപിയുടെ ജ്യോതിരാദിത്യ സിന്ധ്യയും കോണ്‍ഗ്രസിന്റെ മല്ലികാര്‍ജ്ജുന ഖര്‍ഗെയും 2019 ലോക്‌സഭ തിരഞ്ഞെടുപ്പില്‍ പരാജയപ്പെട്ടവരാണ്. മുന്‍പ്രധാനമന്ത്രി എച്ച്.ഡി. ദേവഗൗഡയും മുന്‍ ലോക്‌സഭാ ഡെപ്യൂട്ടി സ്പീക്കര്‍ എം.തമ്ബിദുരൈയും വീണ്ടും തിരഞ്ഞെടുക്കപ്പെട്ടു. രണ്ടാം മോദി സര്‍ക്കാരിന്റെ ആദ്യ വര്‍ഷം രാജ്യസഭയില്‍ വേണ്ടത്ര ഭൂരിപക്ഷമില്ലാത്ത ബിജെപിക്ക് മികച്ച അവസരമാണ് നിലവിലെ ഇലക്ഷന്‍ വിജയം നല്‍കിയിരിക്കുന്നത്. എന്നാല്‍ 2018 നിരവധി സംസ്ഥാനങ്ങളില്‍ സംഭവിച്ച തെരഞ്ഞെടുപ്പ് പരാജയം വരുംകാലങ്ങളില്‍ പാര്‍ട്ടിക്ക് തലവേദനയായേക്കാം.